Read Chipaya GÁLATAS 6 Bible Online

GÁLATAS 6 - Chipaya bible

GÁLATAS 6

¹Jilanaka, anćhukki tshi jila ujkiś thxotsi cherasaź nïki, anćhukki tshi Yöś kirïñi jilaźta ni jila ana iya ujkiś thxotsnaxu quśtanćha. Xalla tïki thapa quśtan pä; niźaśa śapamayni ujkiś thxotskiśtan walxax kuytaśla, ana ampacha ujkiś thxotta khiśxapa.

²Niźaśa llakiź thonanaki porapatź yanapasa, xalla nuź anćhukki ni Criśtuź lïxaru qamasaćha.

³Niźaśa yaqhapaki cheqanćha werhki khićhax nïki, xalla nuź khiñi źoñiki anaćha ćhhulumi, niźaśa perśunpachaź q'otćha.

⁴Niźaśa śapamayni perśun quś iwxaśtanćha, niźaśa tshi źoñiki nïź pätanaka śumaćha khićhax nïki, ni źoñiki ana yaqha źoñinakźtan tupśtanćha.

⁵Niźaśa śapamayni perśun uj chhichśtanćha.

⁶Niźaśa ni Yöś śuma kintu thaxinta źoñiki, nïź thaxiñiźtan thappacha nïź śuma katoqitanaka thaxsastanćha.

⁷Niźaśa anćhukki anaź perśunpacha q'ota: Yöśki anaź jëkiź q'otta khesaćha. Niźaśa thapa ni źoñiź ćhhakhtaki, nïśaqaś axźnakićha.

⁸Niźaśa ni xañchiź pektakama ćhhakhñiki, nïź xañchiź anaśumanakaź axźnakićha. Niźaśa ni Espirituźkiśtan ćhhakhñiki, Espirituźkiśtan wiñay źetiź axźnakićha.

⁹Xalla niźtikiśtan ućhumnakki ni śumanaka päśkiśtan anaź otś wakiśićha; niźaśa ućhumnakki anaź q'iwsnasaź nïki, ućhumki ni axś thuñkiś axźnakićha.

¹⁰Niźaśa ućhumnakakiś atchukapanx khila, ućhumnakki thapatiźkiś śumanakapanź päla, niźaśa ni ućhumnaka thapa quśśiś jilanakźkiśimi.

¹¹¡Anćhukki ti weriź perśun qharźtan nuktanaka khjirtaź cherźna!

¹²Xalla ni anćhuk simitu chimpiś pekñi źoñinakaki, źoñinakźkiś pekta khiśxapaqaś nuź päćha, niźaśa ni Criśtuź kuruśhkiś tikhźtikiśtan ana qhurta khiśxapaćha.

¹³Niźaśa thappacha ni chimputanakaki anaź ni lï chïtakama qamćha. Ans ninakaki anćhuk chimpuchiś khisqatś pekćha, ni ućhumnaka xañchikiś niźta päźku chipśxapaqaśśa.

¹⁴Niźaśa werhki anal ćhhulkiśtanami ayt'aś pekućha, ans werhki ni ućhumnaka Jesucriśtuź kuruśhkiśtanqaś ayt'aśućha. Wethkiśtanaki Jesucriśtuki thapa źoñinakź ujnakźkiśtan kuruśhkiś tikhśićha, niźaśa werhki ti źoñinakźxapa tikhśinćha.

¹⁵Niźaśa ni chimputa khiśmi ana chimputa khiśmi anaź ćhhulxapami wakiśićha; ans ni uśhka mathta khiś wakiśićha.

¹⁶Niźaśa thappacha ti lïxaru qamñinakaki śuma qamañax tanźla niźaśa ni oqś qamañami, niźaśa thappacha ni Yöśkin kirïchi Israel źoñinakami.

¹⁷Xaśiki teqhśtan tikchuk anax jëkhmi werh aqacha päla; werhki ni Jesús Tatźkiś kirïtikiśtan añcha t'aqhiśśinćha, niźaśa weth xañchikiś śhoxri t'irinakamiź źelhćha.

¹⁸Jilanaka, ni ućhumnaka Jesucriśtuki thappacha anćhukakiś nïź oqśñi quśx thäla. Xalla nuźox khila.