Read Chipaya FILIPENSES 2 Bible Online

FILIPENSES 2 - Chipaya bible

FILIPENSES 2

¹Niźaśa werhki khiwćha, Criśtućha anćhukakiś ni yaqha jilanaka p'eqinchayś thächiki, niźaśa ni anćhuka oqśñi quśki yaqha jilanakaź quśśa, niźaśa thappacha anćhukki niźta Espirituchiśćhukćha niźaśa anćhukki oqśñi quśśiśćhukćha,

²niźaśa anćhukki śuma qamkan werh thapa quś chipsqatalla, tshi śuma oqśñi quśśiśta, niźaśa tshi Espirituchiśta niźaśa tshi amtichiśtaqaś.

³Ans anchukki anaź ćhhulumi qichaspekkuqaś mita quśtan päkićha, niźaśa anćhukki śapamayni ni yaqha źoñinaka perśunkiśtan tshan khjusa nayśtanćha.

⁴Niźaśa anax xaqhsiltami perśunaltaxapaqaś śuma päla, ans ni yaqha źoñinakźtami śuma päśtanśaqaśśa.

⁵Niźaśa porapat ućhumnakakiśki, ni Jesucriśtu irata quśśiś khiś pinsiśx źelhlalla,

⁶xalla nïki tuźućha: qhaźta Yöś irata khikumi, Jesucriśtuki anapan ni Yöś irata khiś pekchićha,

⁷ans nïki perśunpacha aźkin khissićha, tshi uywita źoñiźtaqaś thapa źoñinaka irata niźaśa thapa źoñinakź manta päñi źoñiźtaqaś,

⁸Niźaśa nïki perśunpacha llanu quśśiś khissićha, niźaśa nïki ni kuruśhkiś tikhśañkama k'uñchi quśśiś pantaćha.

⁹Xalla niźtikiśtan Yöśki nïźkiś chawkh jiliri thächićha, niźaśa thapa źoñinakźkiśtan tshan k'achha thü thächićha,

¹⁰Xalla ni Jesusiź thükiś thapa źoñinakź owanaka killśnaxu, ni tsewkta yoqkinami niźaśa ti yoqkiśimi, niźaśa ti yoq qosimi,

¹¹niźaśa thappacha ti źoñinakaki Jesucriśtu Tatamź amki khekićha, niźaśa ni Yöś Ephki añcha śuma khitaśaqaś khekićha.

¹²Xaśiki weth q'ay jilanaka, anćhukki xaqhnuź tirapan werh kaśinćhukźlaxa, werh ana anćhukatan khikanami, xaśiki weriź aźkin khen anćhukki tshantiź werh kaśalla. Niźaśa anćhukki liwrïsxapa thapa quśtanź qhura;

¹³niźaśa Yöś ućhumnak ni śumanaka päqatćha, niźaśa ni śumanaka päśkiś yanapćha, neqhśtan nïki nïź pektakamaź päćha.

¹⁴Niźaśa anćhukki ana Jëkhź źoñźtan chuchkan niźaśa ana jëkhźtanami ch'ärasku päkićha,

¹⁵xalla nuź anćhukakiś anaź jëkhmi uj thxotnasaćha, niźaśa anćhukki ana ujchiś Yöś matiź khella ti ñexw śqarant źoñinakź taypikiś. Xalla ni źoñinakź taypikiśtan anćhukki tshi warawaraźtaqaś ti yoqkiś k'ajćha,

¹⁶xalla ni źetchiś taqu thurt'ichi waqaychikan. Werhki ni Criśtuź thonan anćhukakiśtan chipaćha, xalla ni weriź ana ina lanqźtikiśtan śiśku.

¹⁷Weth qamaña qhaźta ch'amameqax khila ni anćhukaź thapa quśtan Yöśkin thätanakkiśtan phxoqśxapaki, werhki añchal chipźnućha niźaśa ni thappacha anćhukatan kuntintutćha.

¹⁸Niźaśa anćhukmiź chipźna, niźaśa wethtan chika kuntintuź khella.

¹⁹Werhki Jesús Tatźkin tassi, waxilla Timilla anćhukakin kuchanśkiśl pekućha, werhki ni anćhuka kintu śiśkul chipaćha.

²⁰Niźaśa wethtaki anaź niźta weth quśkiś luśhñi maśi źelhćha, xalla nïki cheqpachapanź anćhukakiśtan llakt'aśśa;

²¹thappacha źoñinakaki perśun qamañaxapaqaś pinsićha, ans ana Jesucriśtuź qamañkiśtanaki.

²²Niźaśa anćhukki ni Timillź quś śiśśa, xaqhnuź wethtan chika ni Yöś śuma kintu maśinśkiś lanqśiźlaxa, tshi weth matiźtaqaś yanapchićha.

²³Niźaśa werhki ni weth ćhhultaqkiśtan śiśku, Timillal anćhukakin kuchanźkaćha;

²⁴niźaśa werhki Yöś Tatźkiśl tasnućha niźaśa werhki waxilla anćhuk cherśñi oqaćha.

²⁵Xalla niźtaśaqaś Epafrodito jila anćhukakin kuchanś waliźtaqal nayućha, xalla tïki weth lanqśñi maśićha niźaśa nïki wethtan chika ti Yöś tawqkiśtan thurt'iñićha, xalla ti jilaki anćhukpaćha weth manta päxu kuchanźkichinćhukki.

²⁶Xalla ti jilaki anćhuk añcha cherś pekatćha, niźaśa anćhukaź ti jila läkhichi kintu śiśtikiśtan ti Efrodituki añcha llakt'aśśićha.

²⁷Xalla ti Efrodituki tikhśmaya läkhichipanśataćha xalla nïki weraraćha; ans Yöś ti jila oqśiki, ana ti jilźkiśqaś ans wethkiśimi, ana iya werh ni llakinakkiśtan llakiśhaxu.

²⁸Xalla niźtikiśtan werhki ti jila anćhukakin phexwal kuchnućha, anćhuk xalla ti jila cherźku wilta chipaxu, niźaśa werhmi ana añcha llakita khiśxapa.

²⁹Niźaśa anćhukki ti jila thapa quśtanź tanźna, tshi Yöś kirïchi jilaźta, niźaśa anćhukki ti jilaź thapa quśtan peka, xaqhnuź ti jilaki anćhuk pektćhaxa xalla niźta irata,

³⁰Xalla ti jilaki Criśtuź manta päkan tikhśmaya läkhichitaćha, xalla ti weth manta päñiźkhen tïź źeti anawalkiśtaćha, niźaśa anćhukki perśunpacha anaź nikama weth manta päyi atatćha.