Read Chipaya 1 TESALONICENSES 5 Bible Online

1 TESALONICENSES 5 - Chipaya bible

1 TESALONICENSES 5

¹Jilanaka ni Jesús tata kephś thuñkiśtanaki anćhukakin khjirś anaź wakiśićha.

²Anćhukkiź śiśśa ni Jesús Tatź kephśkiś thuñiki ana pinsanź khekićha, niźaśa tshi wën thonñi thañ źoñiźtaqaś thonakićha.

³Ti źoñinakaź “Thappacha ućhumnakki añcha śumaź qamćha” khikan nuź chiyan, neqhśtan ninakaź ana pinsan ninakaź qäyi thonakićha, tsha mätaq źon mati xawq'aśiñla xalla niźta irata; neqhśtan ninakaki ti qäykiśtan anapanź atipi atakićha.

⁴Jilanaka anćhukki anaćha ni sumchi laqhkiś, ni Jesús Tata tshi thañ źoñiźtaqaś kephśkiś thuñkiś tansxapaki.

⁵Niźaśa thappacha anćhukki maxiñta qhanćhukćha. Niźaśa ućhumnakki anaćha ni sumchi laqhćhumki;

⁶Xalla niźtikiśtan ućhumnakki Yöś ana kirïchi źoñinakaźta ana thxaxśtanćha, ans ućhumnakki źkayi quśśiś ana thaxkan źelhśtanćha.

⁷Niźaśa ni thxaxñi źoñinakaki wënpanź thxaxćha, niźaśa ni likhñinakami wënśaqaś likhćha;

⁸ans ućhumnak maxiñta khiñinakaki źkayi quśśiś naynayi źelhchukapanćha. Niźaśa ućhumnakki thapa oqśñi quśtan tshi xañchi śhoxñi qhxapchiśtaqaś kuytiśtanćha, xalla niźtaśaqaś ućhumnakki ni uśhka thonñi liwrïñi taquźtan tshi thup q'ośtu skarźtanźtaqaś śhoxśtanćha.

⁹Niźaśa Yöśki ućhumnak ana ni kaśtiku tanźnax onanchichićha, ans ni ućhumnaka Jesucriśtu Tatź qharkiśtan ni liwrïś tanźnax khitaćha.

¹⁰Niźaśa Jesucriśtuki ućhunlayku tikhśićha, ućhumnak ana thxaxaxu, uśh thxaxaxumi, niźaśa nïźtan chika źetaxumi.

¹¹Xalla niźtikiśtan anćhukki porapatź p'eqintayasa niźaśaź quśsasa, xaqhnuź anś anćhukki päćhaxa xalla nuźupan.

¹²Jilanaka werhnakki anćhuk rokt'ućha, ni anćhukatan chika lanqśñi jilanakźtan anćhukki śumapanź qamakićha, niźaśa anćhukki ni jilanaka Yöś Tatź jikhśkiśpan chhichakićha niźaśa śumpachaź thaxźna.

¹³Niźaśa anćhukki ninakaź lanqźtikiśtan thapa quśtanź peka. Niźaśa anćhukki porapat śumapanź qamakićha.

¹⁴Jilanaka werhnakki anćhuk wiltal rokt'ućha, anćhukki ni ana kaśñinaka ujźna, niźaśa anćhukki ni eqhsñi jilanaka p'eqintaya, niźaśa anćhukki ni upa quśśiś jilanaka yanapa niźaśa anćhukki thapatiźtan śuma quśtan awanta.

¹⁵Niźaśa anćhukki kuytaśakićha, anax jëkhmi porapat ana śumanaka päsla. Ans anćhukki śumanakapanź päś peka, anćhukkamami niźaśa ti yoqkiś źelhñi źoñinakźtanami.

¹⁶Niźaśa anćhukki kuntintupanź khekićha.

¹⁷Niźaśa tirapan mayiśa.

¹⁸Niźaśa anćhukki thapa ćhhultaqkiśtan Yöśkin sparakiźpan khekićha, xalla ni Jesucriśtuźkiś kirïchiź khen, xalla tïćha Yöś pektaki.

¹⁹Anćhukki ni Espirituź uj anaź thessa.

²⁰Niźaśa anćhukki ni Yöśkiśtan chïñiź taqunaka anaź iñara.

²¹Niźaśa anćhukki thappachaź phalźna, neqhśtan ni śumanakaź quśkiś katoqakićha.

²²Niźaśa anćhukki thappacha ni anaśumanakkiśtanź saraqa.

²³Niźaśa ni śuma qamañchiś Yöśpachax anćhuk źkayi quśśiś päla, niźaśa thappacha anćhuka źeti, animu, xañchi, ana jëkhźlami atchukax śhoxla, ni ućhumnaka Jesucriśtu Tata thonśkama.

²⁴Xalla ni ućhumnak qhawśñiki śuma thapa quśśiśśa, neqhśtan nïki thappacha tinaka kumlisqatakićha.

²⁵Jilanaka, anćhukki wethnakatapanź mayiśakićha.

²⁶Niźaśa anćhukki thappacha Yöś kirïchi źkayi quśśiś jilanaka tshi chhulśñiźtan tsänakićha.

²⁷Xalla tïki Yöś Tata jilir achkiś khiwćha, niźaśa ti karta thapa Yöś kirïchi jilanakźkin lïźinakićha.

²⁸Xalla ni ućhumnaka Jesucriśtu Tatź oqśki anćhukakiśx thäla. Xalla nuźux khila.