Read Chipaya 2 TESALONICENSES 1 Bible Online

2 TESALONICENSES 1 - Chipaya bible

2 TESALONICENSES 1

¹Pawluźtan, Silvanźtan, Timillźtan ni Tesalónica wathchiś Yöś kirïchi jilanakźkin tsänźkićha, ni ućhumnaka Yöś Eph niźaśa ni Jesucriśtu Tatami anćhukatan chikapanćha.

²Niźaśa ni ućhumnaka Yöś Eph niźaśa ni Jesucriśtu Tatami anćhukakiś śuma qamañax thäźkila.

³Jilanaka, werhnakki anćhukakiśtan tirapan Yöśkin sparakiź khiśtanćha, anćhuka thapa quś paqan werhnakki nuź päśpan wakiśićha, niźaśa śapamayni ni anćhuka oqśñi quśki śapuruź paqćha.

⁴Niźaśa werhnakki anćhukakiśtan śumapan ni Yöś kirïchi jilanakźkiś maśninćha, niźaśa anćhukki thapa quśtan ni llakinakź taypikiś t'aqhiśikan thëśinćhukćha.

⁵Xalla tïki ni Yöś werara juchjiptayś chimpu thëźtaćha, xalla nuź anćhukki ni Yöś irpiś wathkiś śuma quśśiś luśhax khitaćha, xalla niźtikiśtan anćhukki t'aqhiśi.

⁶Yöśki źkayi quśśiśpanćha, ni anćhuk t'aqhiśsqatñi źoñinaka cheqpachapanź t'aqhisqatakićha,

⁷niźaśa anćhuk t'aqhiśiñinaka wethnakatan chikaśaqaś jejsqatta khekićha. Xalla tïki ni Jesús Tataź ni tsewkta yoqkiśtan nïź aśśiś anjilanakźtan niźaśa ujźtan thonan watakićha.

⁸Xalla ni Jesusaki ni Yöś ana kirïñi źoñinaka kaśtikśxapaź thonakićha, niźaśa ni ućhumnaka Jesús Tatź śuma kintu ana kaśñi źoñinaka kaśtikśxapami.

⁹Xalla ti źoñinakaki wiñayaź t'aqhiśakićha, niźaśa ninakaki Jesús Tatź chawkh qhan aśkiśtan aźkin chhetqattaź khekićha,

¹⁰xalla ni Jesús Tataź thonś thuñkiśiki, ni źkayi quśśiś jilanakaki nïź amtakićha niźaśa thapa ni Yöś kirïchi jilanakaki añchaź iśpantakićha; niźaśa werhnakaź anćhukakiś ni śuma taqunaka maśintikiśtan anćhukki kirïchinćhukćha.

¹¹Werhnakki xalla tinakkiśtan tirapan Yöśkin mayiśućha, xalla ni ućhumnaka Yöś anćhuk źkayi quśśiśpan qhawźnaxu, niźaśa thappacha nïź aśtan śuma amtitanaka niźaśa anćhukaź thapa quśtan lanqźtanakax kumlisla.

¹²Xalla tiźtikiśtan ni ućhum Jesús Tatź thüki anćhukaź khen amtita khekićha, niźtaśaqaś nïki ni Yöś niźaśa Jesucriśtu Tataź oqśñi quśtan ućhumnak śuma khitaź khekićha.