Read Chipaya 1 TIMOTEO 1 Bible Online

1 TIMOTEO 1 - Chipaya bible

1 TIMOTEO 1

¹Werh Pawlutki Jesucriśtuź apuśtultćha ni ućhum liwriñi Yöś kuchanźkitakama, niźaśa Jesucriśtuki ućhumnaka uśhka śuma thuñićha,

²Timoteo weth q'ay thapa quśśiś jila, amkin tsänźkućha. Niźaśa ni ućhumnaka Yöś Eph niźaśa Jesucriśtu ućhumnaka Tataki, amkiś nïź oqśñi quśx thäźkila niźaśa nïź oqśñi śuma qamañami.

³Niźaśa werhki ni Macedonia yoqa oqhkan am ni Éfeso wathkiś eklaxu rokt'ichinćha, niźaśa am ni toskar pinsitanaka thaxiñi źoñinaka chïźinaxu

⁴niźaśa jilanakaki anax ti źoñinakź kintukiś quś thäla niźaśa ni tukita achchi ephnakź ana miransñi kintukiśimi. Xalla ti ćhhultaqinakaki aqśkinpan chhichcha, niźaśa anaź ni Yöś amtitanaka paxqatćha, xalla ti amtitanakaki thapa quśtanpanź paxasaćha.

⁵Niźaśa ti porapat oqsaskiśtan chïźintanakaki tshi ch'uwa quśkiśtanź thonćha, niźaśa śuma oqśñi quśkiśtan niźaśa tshi werar quśkiśtanź thonćha.

⁶Niźaśa yaqhap jilanakaki ti qamañkiśtan tshi qhutñi qhxeśśićha, niźaśa tinakaki ni ina parlanakkiśqaś quś thächićha.

⁷Niźaśa tinakaki Yöś lï thaxiñiź khiś pekćha, neqhśtan tinakaki perśuna chïtami niźaśa tinakaź thaxintami anaź näśa.

⁸Niźaśa ućhumnakki ti lï śumakhita śiśśa, neqhśtan xaqhnuźt ti lï khićhaxa nikamaź oqasaź nïki;

⁹xalla tuź khuñś wakiśićha, ni lïki anaź źkayi quśśiś źoñinakźta thätaki. Ni lïki ni ujchiś źoñinakźtaxapaćha niźaśa ana kaśñi źoñinakźta, nexunakźta, ujpäñi źoñinakźta, niźaśa Yöś ana kaśñi źoñinakźta, niźaśa perśun mä eph konñi źoñinakźta niźaśa thappacha ni źoñi konñi źoñinakźtaxapa thätaćha,

¹⁰niźaśa ni iź iźñi źoñinakźta, niźaśa ni luktaqpora iźasñi źoñinakźta niźaśa ni uywita źoñinaka tuyñinakźta, ni toskar źoñinakźta, niźaśa ni toskarkiśtan thurt'iñinakźta; niźaśa ti lïki ni źkayi thaxiñinakź moq'u päñi źoñinakźtaxapa thonchićha.

¹¹Niźaśa tïćha ni k'achha Yöś śuma kintu thaxinśki, ni śuma Yöśki wethkiś ti taqunaka thaxnax khikan thächićha.

¹²Werhki ni ućhumnaka aśi thäñi Jesucriśtu Tatźkiś sparakiź khiwćha, nïki werh thapa quśśiś paxchićha niźaśa nïź manta päñi werh uchchićha,

¹³nïź tuki werhki Jesucriśtuź moq'u chïchintaćha, niźaśa ni tanśxapa qhurintaćha niźaśa ni ar arintaćha. Ans Yöśki werh oqśićha, werhki ima Yöś kiriyatućha niźaśa ćhhulut pätućhaxa xalla nïmi anal śiśatućha.

¹⁴Niźaśa ni ućhumnaka Jesús Tataki nïź oqśñi quś wethkiś ana miransñi thächićha, niźaśa weth thapa quś niźaśa ti oqś quśnaka ućhumnakki Jesucriśtuźkiśtanpan waćhasaćha.

¹⁵Xalla tïki weraraćha, niźaśa thappacha ućhumnakki kirïśtanćha: Ni Jesucriśtuki ti yoqkiś ujchiś źoñinaka liwrïi thonchićha, xalla tinakźkiśtan tshïsuña tuki khiñiki werhtćha.

¹⁶Ans Yöśki werh oqśićha, ni Jesucriśtu nïź paśinśichś quś wethkiś thëźnaxu. Xalla nuź werhki nïźkin kirïchi jilanakźkiśtan ni wiñay źeti tanśxapa śuma qamaña thëśtanćha.

¹⁷¡Niźaśa ućhumnakki ni wiñay aśśiś śinta Yöśkinpanź alt'ila, niźaśa ana tikhśñi, ana cherchuk Yöśkin! Xalla nuźox khila.

¹⁸Timilla weth q'ay mati kuntamćha, werhki amkiś chïźinućha, amki thapa quśtan niźaśa śuma quśtan ni anawalinakźtanam qichasasaćha, xalla tïki amkiśtan am tuki Yöśkiśtan chïñinakaki chïchićha xalla nikamam päsala.

¹⁹Niźaśa yaqhapanakaki ni am śuma quś ana kaśku, nïź quśkiś ana atchićha.

²⁰Xalla tïki ni Himeneuźkiś niźaśa Alijuźkiś watchićha, werhki tinaka ni Saxriźkiś thächinćha tinakź quś ćhakaxu niźaśa ana iya Yöśtaxapa moq'u chiyaxu.