Read Chipaya 1 TIMOTEO 2 Bible Online

1 TIMOTEO 2 - Chipaya bible

1 TIMOTEO 2

¹Thapa źoñinakaki maykan mayiśiśtanćha, niźaśa thapa źoñinakźta Yöśkin sparakiź khiśtanćha, xalla til chïźinućha.

²Niźaśa thappacha ni irpiñi jilirinakźta mayiśiśtanćha, neqhśtan ućhumnakki śuma oqśñi quśtan śuma qamañkiś quś phiya qamasaćha.

³Xalla tïki ućhum liwrïñi Yöś tukkiś añcha walićha,

⁴niźaśa ni Yöśki thapa źoñinaka liwrïsñiź pekćha, niźaśa ni cheqpach taqu śiśñiź pekćha.

⁵Ans tshi Yöśqaś źelhćha, niźaśa Yöśtan źoñinakźtan tshi tupñiqaź źelhćha: Xalla ni tupñiki Jesucriśtućha.

⁶Xalla ni Jesusaćha thapa ućhumnaka layku źeti apt'ichiki, xalla ti tikhźtaki ti xaśta źoñinakźkiś maśintaćha.

⁷Xalla ti maśinśxapaki werhtćha maśiñi niźaśa apuśtula illśtitki ni ana judiu źoñinakźkiś, niźaśa werhki ni thapa quśkiśtanśaqaś thaxnax khititćha niźaśa ni werarkiśtanami. Xalla ti weriź chïtaki weraraćha anaćha toskara.

⁸Werhki xalla nuź luktaqanakami mätaqanakami thapa yoqaran Yöśkin maśiñil pekućha, niźaśa ninakaki źkayi quśtan ana źaxwchi ninakź qhara tsewkchuk Yöś qhutñi wäśtanćha.

⁹Niźaśa werhki ni mätaqanaka śuma śkiti kuthśñipanl pekućha, niźaśa śuma quśtanx iśt'aśla, ans ninakź charaki anax anawalinakźtan źhikźla, ana qorźtanami, ana champinakźtanami, niźaśa ana jila walurchiś śkitinakźtanami.

¹⁰Ans ninakź iśt'aśtaki Yöśtaxapa śuma quśtan pätax khila, xalla ni Yöś cheqpacha amtiś pekñi mätaqaźta.

¹¹Xalla ni mätaqanakaki śuma quśtan ch'ujpacha ni thaxiñi nonśtanćha;

¹²niźaśa ni mätaqanakaki ana qhanakama thaxiñi pekućha, niźaśa ana luktaqa mantiśtanćha. Ans ninakaki ch'uj źelhśtanćha,

¹³Yöśki tuki Adán pächićha, neqhśtan Ewa pächićha;

¹⁴niźaśa Adanki anataćha q'otta, ans nïź thuntaćha q'ottaki; xalla nuź q'otta khisku ujkiś thxotsinćha.

¹⁵Neqhśtan na mätaq źonki na mä ćhhultaqinaka śuma päkiź nïki, niźaśa thapa śuma oqśñi quśtan niźaśa źkayi quśśiś khekiź nïki liwrïsnakićha.