Read Chipaya 1 TIMOTEO 3 Bible Online

1 TIMOTEO 3 - Chipaya bible

1 TIMOTEO 3

¹Xalla tïki cheqpachapanćha. Niźaśa tshïsuñaki ni Yöś kirïchi źoñinakat irpićhax nïki, śuma lanqśñiź lanqźa.

²Xalla ti lanqśiś jilaki anaź jëkhmi aqasaćha. Xalla ni jilaki tsha mätaqchiśqaś khiśtanćha, niźaśa ch'uwa qamañchiś khiśtanćha, niźaśa muspa khïkhichi śuma rispitta khiśtanćha. Niźaśa thonśñi źoñinaka qhawśñi khiśtanćha, niźaśa thaxinśxapami walxa khiśtanćha;

³xalla ni irpiñiki ana likhñi khiśtanćha, niźaśa ana ni qichasñi źoñinakźtan munaśñi, ans oqśñi quśśiś khiśtanćha, llanu quśśiś khiśtanćha, niźaśa ni päśnakkiś ana quś thäñi khiśtanćha.

⁴Niźaśa ni irpiñiki nïź qhuy źoñinaka śuma irpiśtanćha, niźaśa nïź matinakaki śuma kaśñi niźaśa śuma quśśiś khiśtanćha;

⁵xalla ni perśun qhuy źoñinaka ana irpi atñiśti, ¿xaqhnuźt ni Yöś kirïchi jilanaka irpasaxo?

⁶Niźaśa ni irpiñi źoñiki ana uśhka Yöś kirïchi khiśtanćha, anax nïpacha mit quśśiś khisku Saxraźtaqaś ujkiś thxotsla.

⁷Niźaśa ni irpiñiki Yöś ana kirïchi źoñinakźkiś śuma źoñi khita khiśtanćha, ana źoñźkiś aśi khiśxapa niźaśa ana ni Saxriź chalkiś tansxapaki.

⁸Xalla niźtaśaqaś ni Yöś kirïchi źoñinaka irpiñiki, śuma quśśiś ana taqu kerhñi khiśtanćha, niźaśa ana likhñi, niźaśa ana päs kanśnakkiśqaś quś thäñi khiśtanćha.

⁹Niźaśa ninakaki ućhum cheqpach tawqkiś kirïtala xalla ni tawqkiśpan quś thäśtanćha, niźaśa ch'uwa quśśiś qamśtanćha.

¹⁰Tuki ninakaki llakinakźtan yanźta khiśtanćha, xalla neqhśtan ninakźta ana moq'u źelan ninakaki ni irpiś manta päsaćha.

¹¹Niźtaśaqaś ninakź mätaqaki śuma quśśiś khiśtanćha, niźaśa ana inapanqaś chïchiñi khiśtanćha, ans thappachkiś werarapan chïñi khiśtanćha.

¹²Niźaśa ni diacononakaki, tsha mätaqchiśqaś khiśtanćha, niźaśa nïź okhalami, qhuy źoñinakami śuma irpi śiśtanćha.

¹³Niźaśa ni diacononakaki śumaź lanqźnakiź nïki, xalla nïki cheqan śuma źoñi khitaź khekićha, niźaśa nïź thapa quśśiś khen niźaśa Jesucriśtuź khen śumaź qamakićha.

¹⁴Werhki waxillal am cherśñi oqaćha; ans werhki ti kartaqal khjirźkućha

¹⁵niźaśa werhki qataź nïki, anćhukki tshi Yöś kirïchi źoñinakaźtaś qamakićha, niźaśa ni źethñi Yöś kirïchi jilanakaźta, ti jilanakaki ni werar tawqkiśtanpanź thurt'ićha.

¹⁶Niźaśa ni weraraki ućhum Yöś tawqkiśtan thonñiki añcha paqhićha, xalla ni werar taqukiśtanaki anapanź teqinaśśuka: Criśtuki źoñi irata xañchichiś thonchićha, niźaśa nïź Espirituźtan atipchićha, neqhśtan anjilanakaź chertataćha. Xalla ti chertaki thapa chawkh wathanakqhuñik maśintataćha, ti yoqkiś źelhñi źoñinakaki nïźkiś kirïchićha, neqhśtan tsewkta qhankin tanźtaćha.