Read Chipaya 1 TIMOTEO 4 Bible Online

1 TIMOTEO 4 - Chipaya bible

1 TIMOTEO 4

¹Xalla ni Yöś Espirituki qhanakamaź tuź khićha, xalla ti pacha źeranśkinaki yaqhapanakaki ni q'otñi espiritunaka niźaśa Saxriźkiśtan thonñi thaxinśnaka nonźku, ninakź thapa quś kephsqatakićha.

²Neqhśtan ni źoñinakaki ni q'oturar toskara chïñi źoñinaka kaśakićha, ninakź quśki ninakaź ana śumanaka pätanakźtan tshi jiruźtaqaś mathachaśśićha.

³Ti źoñinakaki anaź śalźnax khekićha, niźaśa Yöś thäta ćhherinaka ni Yöś kirïchi źoñinaka Yöśkin sparakiź khiźku lulax khitanaka, niźaśa ni werar taqu paxñinaka ana nuź lulax khekićha.

⁴Niźaśa thappacha Yöś pätanakaki añcha śumanakaćha; niźaśa anapan xaqhsiltami ana pekta khiśtanćha, ans ućhumnakki Yöśkin sparakiź khiźkuź tanźla,

⁵Xalla ni Yöś śuma kintu niźaśa nïźkin mayiśiźku, ućhumnak źkayi quśśiś päćha.

⁶Xalla ti ćhhultaqinaka ni Yöś kirïchi jilanakźkinź thaxźna, neqhśtan anćhukki Jesucriśtuź śuma manta päñiź khekićha, niźaśa thapa quśtan niźaśa śuma taqunakźtan amiź qamtakama amki tshi śuma ćhheri lulhchiźtaqaś khekićha.

⁷Niźaśa anćhukki ti yoq kintunaka niźaśa sumsu taqu chïtanaka anaź kaśa. Ans anćhukki ni śuma oqśnakkiśpanź quś thäla;

⁸xalla ni xañchiź ijirśiśśhuki xañchiźxapaqaś wakiśićha, ans ni oqśki thapatiźta wakiśiñićha, xalla nïki ti qamañxapa niźaśa uśhka thonñi qamañxapami źeti thäś taqu onśićha.

⁹Xalla tïki cheqpachapanćha, niźaśa thappacha źoñinakaki ti kirïśtanćha.

¹⁰Xalla niźtikiśtan werhnakki añcha t'aqhiśkan lanqźnućha, werhnakki ni źethñi Yöśpan thewźnućha, xalla ni Yöśki thapa źoñinaka liwrïñićha, niźaśa nïźkiś cheqpacha kirïñi źoñinakapan.

¹¹Niźaśa amki ti taqunakźtan thaxna niźaśa chïźina.

¹²Niźaśa amiź thowa khen anax jëkhmi iñarla; ans amki ni Yöś kirïchi źoñinakźkiś śuma taqunakźtan, oqśñi quśtan, thapa quśtan am qamañkiś thëśtanćha.

¹³Niźaśa amki weriź irantiźkitanaki, ni Yöś śuma kintu khjirtanaka qhanakamam ni źoñinakźkiś liyakićha, niźaśa ni Yöś kirïchinaka p'eqintayakićha niźaśam thaxźnakićha.

¹⁴Niźaśa amki ni Yöś amkiś onanchitanaka anam thatźnakićha, xalla ni onanchitaki amkiś ni Yöśkiśtan chïñinakź qharźtan lanźtaćha.

¹⁵Amki ti ćhhultaqinakkiśpan quś thä; niźaśa neqhśipan qama, xalla ni amiź katoqtanakaki thapatiźkiś thëźta khiśxapa.

¹⁶Niźaśa amki perśunpacha kuytaśa niźaśa ni yaqha źoñinaka thaxinśnakkiśtanami, niźaśa amki thurt'ichi quśśiśpan khella. Amki tuźupanim päkiź nïki perśunpacham liwrïsnakićha niźaśa ni am taqu nonśñi źoñinakami liwrïtaź khekićha.