Read Chipaya 1 TIMOTEO 6 Bible Online

1 TIMOTEO 6 - Chipaya bible

1 TIMOTEO 6

¹Xalla ni ujź atta qamñi źoñinakaki, ninaka uywiñiźkiś śuma quśtan pekśtanćha, ana ni Yöś thü ana śuma parlita khexu niźaśa ni wethnaka thaxinśnakkiśtanami.

²Niźaśa yaqhapanakaki Yöś kirïchi uywiñichiślax nïki, anax tshi thapa quśśiś jilaź khiźkuqaś ana rispitla. Ans ninakaki tshanti thapa quśtan manta päśtanćha, xalla ni manta päta tanśñi tuyñunakaki Yöś kirïchi śuma jilanakaź khesaćha. Amki ti thaxna niźaśa maśna:

³Niźaśa yaqhapaki yaqha ćhhultaqkiśtan thaxinćhax nïki, niźaśa ni ućhumnaka Jesucriśtu Tatź źkayi taqunaka anat juśtaśśax nïki, niźaśa Yöś onanś taqunaka thaxinś anat juśtaśśax nïki,

⁴xalla ni źoñiki mitaćha anaź ćhhulumi śiśśa. Xalla ni źoñźtan chiyaski tshi konaźtaqaśśa; xalla neqhśtanź ni ćhhaxwqatś, ana munś, ar arś, xamachaka thonćha,

⁵niźaśa ana miransñi porapat ana näśñi źoñinakaki qichassa ninakaki anaź ni werar taqu paxćha, niźaśa ninakaki ni Yöś śuma taqu tshi źelinchiś khiśxapaqaź pekćha.

⁶Xalla ni perśun źelinśallźtan kuntintu qamñiźtaki, ni Yöś śuma kintu qhanapacha tshi chawkh źelinśtaqaśśa.

⁷Niźaśa ućhumnakki ti yoqkiś ana ćhhulumi śhiktaćha, neqhśtan ućhumnakki anaź ćhhulumi chhichtasaćha;

⁸niźaśa ućhumtaki lulhś ćhheri niźaśa kuthś śkitit źelhćhax nïki, xalla tïźtan kuntintuź qamla.

⁹Ans ni źelinchiś qamś pekñi źoñinakaki, tshi chalkiśtaqaś anawalkiś thxotsa, niźaśa ni źoñinakźtaki ni ćhhaxwqatś, śmaśnaka anawali päśnaka niźaśa aqñinaka, xalla tinakaki źoñinaka ujkiśpanź thxotsqatćha.

¹⁰Thappacha ni anawalinaka päś śep'aki ni päś pekśa, neqhśtan yaqhapanakaki ni päś śmaśku ninakź thapa quśkiśtan śqhxeśśićha, xalla neqhśtan ninakaki ni anawal t'aqhiśiśkin thatźtaćha.

¹¹Ans am Yöś kirïchi źoñimki thapa ti ćhhultaqinakkiśtan saraqa. Niźaśa tshi śoq'u źetchiś jikhśkiś, niźaśa śuma oqśñi quśśiś, niźaśa thapa quśtan qama, xalla ni t'aqhiśiśkiś thapa aśtan thurt'ichipan niźaśa llanu quśśiś qama.

¹²Niźaśa amki ni thapa quśkiśtan qichasa anapan ni wiñay źeti atipsqata; Yöśki am tixapa qhawśićha, xalla niźtikiśtan amki ni thapa cherñi źoñinakź tukkiś añcha wali maśinchamćha.

¹³Werhki xaśiki thapa ćhhultaqinakkiś źeti thäñi Yöś tukkiś am kuchnućha, niźaśa ni Jesucriśtuki ni Poncio Pilatuź tukkiś añcha śuma maśinchićha,

¹⁴amki ti weriź chïtanaka kaśalla śuma qamaña ana aqchuka chhichkan, ni ućhumnaka Jesucriśtu Tata nïź chawkh aśtan thonśkama.

¹⁵Yöśki nïź pekta thuñkiśpanź tinaka chhichakićha, xalla nïki ni alaxaź śinta śuma chawkh irpiñi jiliriki, niźaśa nïki reyźkiśtan tshan chawkh Reyćha, niźaśa tatźkiśtan tshan chawkh Tataćha.

¹⁶Xalla ni Yöśki ana tikhśñićha, niźaśa nïki ana jëkhźlami makhatchuk qhankiś qamćha. Niźaśa anaź jëkh źoñimi ni cherchiki, niźaśa anaź jëkhmi cherasaćha. ¡Xalla nïźkiś tirapan ni chawkh aśi śuma alt'ita qamakićha! Xalla nuźox khila.

¹⁷Xalla ti yoqkiś qamkan źelinchiś źoñinaka anax mita quśśiś khila, niźaśa anax ninakź źelinśnakkiś tasla, xalla ni źelinśnakaki anaćha cheqpachxapa. Ans ninakaki Yöśkinx tasla, xalla ni Yöśki ućhumnaka qamañxapa ana miransñi thapa ćhhultaqiź thäćha.

¹⁸Amki ninaka śumanakapan päqata, niźaśa ninakaki ni śuma päś ćhhultaqinakkiś źelinchiśx khisla niźaśa ninakaki onanśxapa niźaśa toxunśxapami liśhtox khila.

¹⁹Xalla nuź anćhukaltaki ni uśhka thonñi thuñixapa thurt'ichipanź khekićha, neqhśtan anćhukki ni wiñay werar qamañaź irantakićha.

²⁰Niźaśa Timilla amki ni amkiś thätanaka śumam kuytakićha. Amki ni anaśum taqunaka niźaśa ina taqunaka anam nonźinakićha, niźaśa ana ni toskar taqunakami, xalla ni taquki ti yoq śiśnaka khitaćha;

²¹Niźaśa yaqhap źoñinakaki ti ćhhultaqkiśtanpan thaxinćha, xalla ti źoñinakaki ni thapa quśkiśtan śqhxeśśićha. Ni Yöś Tataki anćhukakiś nïź oqśnakax thäźkila. Xalla nuźox khila.