Read Chipaya 2 TIMOTEO 1 Bible Online

2 TIMOTEO 1 - Chipaya bible

2 TIMOTEO 1

¹Pawluki Jesucriśtuź apuśtulaćha niźaśa Yöś quś pektakama kuchanźkitaćha, niźaśa ni wiñay źetiki onźtaki Jesucriśtuźkiśtanź thonćha,

²Niźaśa ni Timill q'ay matźkiś tsänźkićha. Ni Yöś Eph niźaśa ućhumnaka Jesucriśtu Tataki ninakź śuma quśx thäźkila, niźaśa ninakź oqś śuma qamaña amkiśx khila.

³Werhki am khuñśku wënami maxiñami Yöśkin mayiśikan tirapan sparakiź khiwćha, werhki xalla nïźkiś ch'uwa quśśiśpan manta pawućha, xaqhnuź weth achchi ephnaka manta pätćhaxa xalla niźta irata.

⁴Niźaśa werhki am qaxanakkiśtan khuñśnućha, niźaśa werhki kuntintu khiśxapa am cherśpanl pekućha.

⁵Niźaśa werhki ni am cheqpacha thapa quśkiśtanl khuñśnućha. Tukiki am chawk mä Loida niźaśa am mä Eunice Yöś paxchiki, niźaśa werhki am śaqaś Yöś paxźkä khiwćha.

⁶Xalla niźtikiśtan werhki am iwxt'ućha, amki Yöś onanchita ujźtan walxam khïkhiyakićha, xalla ni weth qharźtan amkiś lanźtikiśtan ni ujki amkiśśa.

⁷Niźaśa Yöśki ućhumnakakiś ana eqhsñi animu thächićha, ans tshi aśśiś animu, śuma oqśñi niźaśa śuma qamñchiś qamaxu.

⁸Niźaśa amki ni ućhum Yöś Tatź śuma kintu maśinś anam aśakićha; niźaśa amki wethkiśtanami anam aśakićha, niźaśa werhki Criśtuź khen karsilkiś chawkhtitćha. Ans amki ni Yöś taquź khen Yöś aśtanam t'aqhiśakićha.

⁹Niźaśa Yöśki ućhumnak qhawśićha nïź źkayi quśśiś watha khisqatśxapa, ana ućhumnakaź pätikiśtanqaś, ans Yöś muntakama nuź pächićha niźaśa ućhumnakakiś Jesucriśtuźkiśtan oqśñi quś thätaćha ima ti yoqa päkanpan.

¹⁰Xalla ti oqśki ni ućhumnaka liwrïñi Jesucriśtuźkiśtan qhanakama thëźtaćha, xalla tïki ni tikhś aśi thatanchićha, niźaśa ni Yöś śuma kintuźtan ni tikhśkin chhichñi źeti ana tikhś qhankin jeskićhićha.

¹¹Yöśśa wethkiś ti taqunaka maśnax khichiki, niźaśa werhki ni ana judiu źoñinakźkin apuśtula niźaśa thaxiñi kuchanźkititćha.

¹²Xalla niźtikiśtan werhki thapa ti ćhhultaqkiśtan t'aqhiśućha. Ans werhki ninakkiśtan anapanl aśućha, niźaśa werhqal śiśućha jëkhźkiśqaśt tassinta; niźaśa werhki ni muspa aśiśhśal khiwćha, nïź onanchita thuñikama werh śhoxwaxu.

¹³Niźaśa amki ni wethkiśtan śuma taqunaka tanźta thaxinś aphźna, niźaśa ućhumnakki Jesucriśtuź khen thapa oqśñi quśtan qamćha.

¹⁴Niźaśa ni ućhumnakakiś qamñi Espíritu Santuź yanapta, niźaśa amki ni śuma taqunaka thaxnax khitanaka kuyta.

¹⁵Niźaśa amkim śiśśa ni Asia yoqkiś źelhñi jilanakaki werh xaytichićha; xalla ninakźkiśtanaki tinakaćha, Figelo niźaśa Hermogenestaćha.

¹⁶Niźaśa ni Yöś Tataki ni Onesíforź qhuy źoñinakax oqźla, xalla ni jilaki wakchi wilta werh quśkichićha, niźaśa nïki weriź karsilkiś chawkhta khen ana aśićha.

¹⁷Ans ni jilaki Roma watha irantiźku ana jejźku werh qhurchićha, werh waćhañkama.

¹⁸Niźaśa Yöś Tataki ni thuñi irantiźkitan nïźkiś nïź oqś thäla. Amki śumam śiśśa nïki ni Éfeso wathkiś ućhumnak yanapchićha.