Read Chipaya 2 TIMOTEO 4 Bible Online

2 TIMOTEO 4 - Chipaya bible

2 TIMOTEO 4

¹Werhki am rokt'ućha ni Yöś niźaśa Jesucriśtu muspa aśśiś tshi Reyźtaqaś thonñiź tukkiś, xalla nïki tikhśinaka niźaśa źethñi źoñinakami juchjiptayiź thonakićha

²niźaśa amki ni Yöś śuma taqum maśnakićha, niźaśa amki ni źoñinaka chïźinchukaź khenami ana chïźinchukaź khenamim chïźinakićha. Nïnaka śuma tawqźtan iyawkhisqatakićha, niźaśa ujźna, niźaśa añcha paśinśiźtan thaxinźku p'eqintayakićha.

³Niźaśa tshi thuñiź irantiźkakićha xalla ni thuñkiśiki źoñinkaki anaź ni Yöś śuma taqu tanś pekakićha; ans ninakaki ninakź quśkamaź khekićha, niźaśa ni źoñinakaki thapaman thaxiñi źoñinakaź qhurakićha, niźaśa ninakaki ninakź quś wali khisqatñi thaxiñiqaś nonś pekakićha.

⁴Niźaśa ni źoñinakaki ni werar tawqkiś taxź thëźnakićha, neqhśtan ninakaki ćhhuluź chëchi kintunakameqaś kaśakićha.

⁵Ans amki ni śuma qamaña waqaycha, niźaśa ni t'aqhiśiśnaka awanta, niźaśa ni Yöś śuma taqunapan maśna, niźasá am lanqś śumapan lanqźna.

⁶Niźaśa werhki wax wilanaźtaqaś konta khiś mayaćha, niźaśa ni weth tikhś thuñiki waxź irantiźkićha.

⁷Niźaśa werhki Yöś kaśku śuma qichassinćha, niźaśa ni weth lanqś thapa quśtan źerśinćha.

⁸Xaśiki wethtaki ni wethkiś wakiśiñi pilluź thewźa, xalla ni Yöś Tata źkayi quśśiś juchjiptayñi jiliriź ni thuñkiś wethkiś thäkićha. Ans anaź wethkiś alaxaqaś thäkićha, thappacha nïź thonś thewśñi jilanakźkiśimi.

⁹Amki waxilla werh cherśñi thonś pekalla;

¹⁰xalla ni Demaski inapanqaś ti qamañ ćhhultaqi pekatćha, ni jilaki werh śina thxotku Tesalónica watha oqhchićha. Niźaśa ni Cresentimi Galacia yoqa oqhchićha, niźaśa ni Titumi Dalmacia watha oqhchićha.

¹¹Ans Lucas alaxaqaś wethtanaki źelhćha. Niźaśa amki Marcu qhurźku amtan wethkin śhika, xalla nïki weth lanqśkiś tshi yanapiñiź khesaćha.

¹²Niźaśa werhki ni Tíquico Éfeso watha kuchanchinćha.

¹³Neqhśtan am thonkanaki ni weriź Troadikin Carpuź qhuykiś ekta irś śhiknalla; niźaśa ni liwrunakami niźaśa ni pergaminupanim śhiknakićha.

¹⁴Niźaśa ni Aliju jiru ch'eqñiki wethtan ana śumapan qamchićha; ni Yöś Tataź nïź pätanakkiśtan nïźkiś wakiśiñi pakakićha.

¹⁵Amki nïźkiśtanśaqaś kuytaśakićha, xalla ni źoñiki muspa ućhum tawq moq'u khissićha.

¹⁶Weriź ni jilirinakźkiś thurt'i qallantiśkiśiki, anaź jëkhmi werh yanapchiki; thappacha werht śina thxotchićha. Yöśki tinakź uj anax qanla.

¹⁷Ans Yöś Tataź wethkiś aśi thäśiki niźaśa yanapchiki, xalla nuź wethkiśtan ni Yöś śuma kintu maśinś kumlissa, niźaśa ni ana judiu źoñinakami nonźa. Xalla nuź werhki ni liwunź atkiśtan liwrïtitćha.

¹⁸Niźaśa Yöśki werh thapa anawalinakkiśtan liwriyakićha, neqhśtan werh nïź źkayi irpiś watha chhichku liwriyakićha. ¡Nïź thüki wiñaya alt'itax khila! Xalla nuźox khila.

¹⁹Werhki Prisca, Áquila, niźaśa Onesíforo qhuy źoñinakaki tsänźkućha.

²⁰Niźaśa ni Erastuki Corinto wathkiś eklichićha, niźaśa ni Trófimuki ni Mileto wathkiś läkhichi ekchinćha.

²¹Ans amki ima awti irantiźkan thonś pekalla. Amkin ti jilanakaź tsänźkićha Eubulo, Pudente, Lino, Claudia niźaśa thappacha ni Yöś kirïchi jilanakami.

²²Xalla ni Jesucriśtu Tataki am animukiśx khila. Niźaśa nïź oqśñi quśki ućhumnakatanx khila. Xalla nuźox khila.