Read Chipaya TITO 1 Bible Online

TITO 1 - Chipaya bible

TITO 1

¹Werhtćha Pawlutki Yöś manta päyin źoñćha, niźaśa Jesucriśtuź kuchanźkita źoñćha, tshanti quśśiś khisqatśxapa, niźaśa Yöś qamañkiśtan oltim werara śiśqataxo,

²niźaśa tsewkta yoqkin Yöśtan wiñaya qamś thewsqataxu. Yöśki ana toskara chiyasaćha, xalla nïki tsewkta yoqkin wiñaya qamśxapa taqu thächićha tuki qallantiś kiśtanpacha;

³neqhśtan nïź pinsita pachśkiś pacha Yöśki ni qamśkiśtan qhanst'ichićha palxayta liwrïñi Yöś tawqkiśtan, ni liwrïñi taqu palxayaxu, werhćha kuchanźkititki. Xalla niźtikiśtan werhćha liwrïñi taqu palxayinki.

⁴Tito jila, xaśiki werhki amkin ti kartal khjirźkućha weth mati kuntamćha, amki Yöśkin quś cheqpacha thächamćha, xaśiki pukultan ućhumki Yöśkin quśśiśćhumćha. Yöś Ephźtan niźaśa Jesucriśtu ućhum liwrïñiźtan amkiś yanapila, niźaśa amkiś oqźla, waliqax qamqatla.

⁵Werhki am ni qhaśiź muyuntita Creta khita wathkiś ekchinla, ni Yöś kirïchi źoñinakźkiś tshanti śuma qamañanakchiś khisqataxu, niźaśa weriź kuchanźkitakama śapa wathkiś ni Yöś kirïchi jila kullakinaka irpiñi qamchi ephnaka thulźnaxu kuchanchinćha.

⁶Niźaśa tshi Yöś kirïchi qamchi ephki śuma qamañchiś khiśtantaćha ana jëkhmi nïź ujmi thëźnasaćha, luku thiñi qamñi źoñi khiśtanćha, niźaśa nïź matinakami Yöśkin kirïchi kama khiśtanćha, niźaśa nïź matinakami śuma qamañchiś, ana ćhhul ujchiś khiśtanćha.

⁷Niźaśa ni Yöś kirïchi jila kullakinaka irpiñiki śuma Yöś ćhhultaqi kuytiśtanćha, xalla nïki śuma qamañchiś khiśtanćha. Niźaśa ana perśun quś kama pekñi khiśtanćha, ana oralla źaxwñi quśśiś khiśtanćha, ana likhñi quśśiś khiśtanćha, ana qichasñi quśśiś khiśtanćha, ana añcha päś pekñi quśśiś khiśtampanćha.

⁸Ćhhul thonśñinakźkiśimi śuma qhawśñi quśśiś khiśpanćha, niźaśa śumanakapan pekñi khiśtanćha, śuma quśśiś khiśtanćha, Yöś kuchanźkitakama qamñi khiśtanćha, perśun quś śuma iwxaśñi khiśtanćha, ćhhul uj päś khenami.

⁹Cheqpacha Yöś tawqkiś thurt'ichi quśśiś khiśtanćha, niźaśa werar Yöś śuma kintu śuma palxayta źoñinakźkiś waytasaćha, niźaśa Yöś śuma kintu moq'u chïñinakami näśqatasaćha.

¹⁰Creta khita yoqkin walxa ana śuma źoñinaka źelhćha, ana jiliri kaśñi, niźaśa ina taqunaka chïñinaka, Yöś kirïchi źoñinakźkiś q'otćha, ninakaki judiu źoñinakź usa xaru qamñitaćha ninakaki tshan ana śumaź qamatćha.

¹¹Ni ana śum źoñinakaki ana wali thaxinćha, ana ni źonakźkiś palxaysqata ninakaki qhuyapachaź muspayćha, xalla ninakź ana śuma chïñi ataki ch'ujtaychukaćha, ana niźta thaxnaxu, päś kanśxapaqaś nuź chiyatćha.

¹²Tshi, Cret wathchiś Yöś kuchanźkita chïñi źoñi źelatćha, ni Cret źoñipacha khichićha: “Cret wathchiś źoñinakaki toskar źoñinakaćha ñexu, añcha lulhñi źoñinakaćha, xayranaka śaqaśśa.”

¹³Xalla niźtikiśtan cheqpacha khichićha; śuma iwxt'ita khexo niźaśa śuma quś Yöśkiś thurt'axu,

¹⁴niźaśa chïźinakićha judiu kintunaka ana nonźnaxu, yaqhap źoñinakaki werar Yöś śuma kintu anaź katoqś pekćha.

¹⁵Xaqsiltat Yöś quśkama śuma qamćhaxa, xalla nïki ćhhulu päkanami Yöśkin quśśiśpanćha, ana śuma qamañchiśnakaki ana śumapanćha, niźaśa ninakź quśmi ninakź chïśmi ana śuma panćha.

¹⁶Ninakaki khiñićha Yöś paxućha khikan, ultimkiśiki ana śuma qamñiź khen Yöś moq'u paniqaś qamćha. Yöśki ninakaź ana śuma qamñiźkhen anaź juśtaśśa, ninakaki Yöś kuchanźkita ana kaśñipanćha, niźaśa ninakaki ana ćhhulumi śuma päyi atasaćha.