Read Chipaya FILEMÓN 1 Bible Online

FILEMÓN 1 - Chipaya bible

FILEMÓN 1

¹Werhćha, Pawlutki Jesucriśtuźkin śirwiñiź khen karsilkiś chawkhtitćha, Filemón jila, amki Yöśkin śirwiñi maśimćha, niźaśa pekta jilamćha. Wethtan Timoteo jilźtan amkin ti kartal khjirźkućha.

²Niźaśa am qhuykiś akhsñi, Criśtuźkin kirïchi źoñinakźkin. Niźaśa Apia kullakakin, ni Arquipu jilźkin, ućhum śuma lanqśñi maśićha.

³Ućhum Yöś Ephźtan niźaśa ućhum Jesucriśtu Jilirźtan, anćhukakiś śumapan yanapila, niźaśa waliqax qamqatla.

⁴Filemón werhki tirapan sparakiź khiwćha Yöśkin, śapa mayiśita am khuñśnućha.

⁵Werhki kintu śiśśinćha, amki śuma munaśiñi quśśiś Jesucriśtu jiliriźkin, niźaśa kirïchi jilanaka thapa Yöś wathkiśtan.

⁶Yöś Ephźkin mayućha am munaśiś quś, niźaśa śuma paxśxapa khesaćha ni munaśiś quś Criśtuźtan.

⁷Filemón jila, amiź khen kirïchi jilanakź quśnakaki kuntintu khisqattaćha, werhki śaqaś kuntintu khissinćha, am śuma munaśiñi quśśiś khen.

⁸Werhki Criśtuź illśta apuśtultćha, xalla niźtikiśtan werhki xaqnuźt am qamś wakiśićhaxa, xalla ni amkiś mantasaćha.

⁹Amkiśtan ans rokt'asaćha Yöś thükiś, am śuma quś cherźku, werhki chawk źonallitćha, niźaśa Jesucriśtuźkin manta päñiźkhen carsilkiś chawkhta źelućha.

¹⁰Werh rokt'asaćha ni Onésimo śuma tanźnalla, ti carsilkiś źelhkan, werhki nïźkiś Yöś śuma kintu palxaychinćha, neqhśtan Onesimuki Yöśkin kirïchiź khen weth Mati kunta khissićha.

¹¹Nïź tukiki Onesimuki ana wal qamañkiś luśhśitaćha, anśiki śuma qamañkiś luśhśićha, xaśiki nïki amtami wethtami walipanćha.

¹²Xaśiki wilta amkin kuchanźkućha, niźaśa nïź irantiźkitan amki śuma tanźnakićha, xaqnuźt werh tanśñamtaźlaxa xalla nuź.

¹³Teqhś wethtan chika eklićhax khiwćha, carsilkiś źelhkan am kuntikiśtan wethkiś śirwasaćha, werhki Yöś śuma kintu palxaytikiśtan ti carsilkiś źelućha.

¹⁴Anal ćhhulumi päsaćha am watźinźku, ni rokt'aśta anax weth quśkama khila, am perśun quśkiśtan kuchanźkitaź nïl pekućha.

¹⁵Tshi pachaki Onesimuki kunami amkiśtan saraqchitaźlani, amtan chika tshi kirïchi jilaźta watay wata tanźnalla.

¹⁶Xaśiki anaćha mantapäñiź taqaśki, śuma q'ay jilaźtaqaśśa, q'ayachućha perśun qhuy xamilla kunta.

¹⁷Niźaśa amki wethkiś śuma quśśiś jila, nuźuśaqaś am ni Onésimo śuma tanźnalla.

¹⁸Tukiki Onesimuki amkiś ana wali pächitaźlan nïki, weril thepnaćha, niźaśa Onesimuki amkiś ćhhulu qaxa khenami, wethkiśtan mayakićha.

¹⁹Werh pacha ti letranaka perśun qharźtan khjirźkućha, werhki thapal pakaćha. Werh am khuñs qatasaćha, weriź khen amki Yöśkin kirïchamćha.

²⁰Filemón jila am rokt'ućha, Yöśkin kirïchi jilaźta werh quśnalla, Criśtuźkin kirïchi jilaźta.

²¹Werh khjirźkućha amkin, Yöś quśkama qamñamćha, weriź maytikiśtan tshantim päsaćha.

²²Niźaśa wethta tshi qhuya thakśinalla, anćhukaź mayiśiñiź khen Yöś noźnasaćha, Yöś munan anćhuk cherśñi thonasaćha.

²³Epafraski amkin tsänźkićha, nïki wëtan chika carsilkiś źelhćha, Jesucriśtuźkin śirwiñiź khen.

²⁴Marcuźtan, Aristarkuźtan, Demastan, niźaśa Lucastan, xalla ninakaki amkin śaqaś tsänźkićha, ninakaćha weth Yöśkin śirwiñi maśinakaki.

²⁵Ućhum Jesucriśtu jiliriki amkiś śumax yanapila. Xalla nuźox khila.