Read Chipaya HEBREOS 10 Bible Online

HEBREOS 10 - Chipaya bible

HEBREOS 10

¹Xalla ni Moisés lïki ni uśhka śuma thonñinakź śiwśqaśtaćha, niźaśa ni lïki anataćha cheqpacha. Xalla niźtikiśtan ni lïki śapa wata Yöśkin wilanźtan makhatñi źoñinakźkiś, anaź źkayi quśśiś khisqati atasaćha.

²Niźaśa ni lïź cheqpacha źoñinaka ujkiśtan źkayinsqatasaź nïki, ni źoñinakaki anaź ujchiśtqa khesaćha, niźaśa ni wilana thxotśkiśtanmiź apatatasaćha.

³Ans ti wilana thxotśnakaki, ni ujnakkiśtan śapa wata khuñśxapaź wakiśićha.

⁴Niźaśa ni turunakź lhokhki niźaśa ni chiwunakź lhokhki anaź uj päśkiśtan liwrïi atasaćha.

⁵Niźaśa Criśtuki ti yoqkiś thonkan Yöśkiś, tuź khichićha: “Amki anam wilana niźaśa ofrendanakami pekćha, ans werh xañchichiś pächamćha.

⁶Amkiśiki ni wilananaka niźaśa ofrendanakami anaź am quś phiya khisqatćha.

⁷Neqhśtan werhki, tuź khichinćha: ‘Werhki teqhśitćha, xaqhnuź ni liwrukiś wethkiśtan khjirtaźlax xalla nikama, Yöśśa amki am munañpa päśxapa.’ ”

⁸Niźaśa Jesucriśtuki khichićha, Yöśki ni wilananaka niźaśa uywi ofrendanakami niźaśa ni ujkiśtan thxotta wilananakami anaź pekćha, xalla tinakaki ni lïź nuź päx khićha.

⁹Neqhśtan werhki wilta chïchïnćha: “Werhki teqhś am quś pektakama päyi thonchinćha.” Xalla nuź chïkuśti tuź khiwćha, xalla ni tukita wilana thxotśnaka apatatsqata, neqhśtan ni wilananaka thxotśkiśtan tshi ew qamaña thulźna.

¹⁰Xalla ni Jesucriśtuź Yöś quś pektakama päñiź khen, niźaśa nïź perśun xañchi tshi wilanaźtaqaś watay watxapa tshi wiltaqaś thxottikiśtan, Yöśki ućhumnak źkayi quśśiś khisqatchićha.

¹¹Thappacha ni judiu źoñinakź timlu jilirinakaki śapuru ni wilananakaź thxotćha, xalla tinakaki ni uj pätikiśtan anapanź źkayi quśśiś khisqatćha.

¹²Ans Jesucriśtuki thapa ujnakkiśtan tshi wilanaqaś watay watxapa thächićha, neqhśtan Jesucriśtuki Yöś źewqhuttan julśićha.

¹³Jesucriśtuki xalla nikhu ni Yöś nïźtan moq'u khiñinaka nïź qhxoch qostan thekźta khiśkama thewźa,

¹⁴niźaśa tshi wilanźtanqaś ni Yöśkin quś thächinaka watay watxapa ch'uwa quśśiś khisqatchićha.

¹⁵Niźaśa ni Espíritu Santuki ućhumnakakiś qhanakamaź tuź khićha:

¹⁶“Werhki ninakztanl qaśnaćha, ni thuñinakaź wattan tinakaź khekićha, nuź khićha Yöś Tataki: Werhki weth lïnaka ninakź quśkiś makhźinaćha niźaśa ninakź achkiś ni lï khjirźinaćha.

¹⁷Neqhśtan werhki ninakź ujkiśtan niźaśa ninakaź ana walinaka pätikiśtanami anal iya khuñśnaćha.”

¹⁸Xalla nuź ni ujnakaki pertunta khissićha, xalla niźtikiśtan ni ujnakkiśtan anaź iya wilananaka thäś źelhćha.

¹⁹Jilanaka, ni Jesús lhokh thawqtikiśtan ućhumnakki ni timluź qhullta qhuy ch'uwa yoqkiś ana jiwjatźkuź luśhasaćha,

²⁰niźaśa nïćha ni źetchiź ew jikhś apźnaxu niźaśa ućhumnakata ni timlu pañu khetźinchiki, xalla tïki nïź xañchikiśtanćha.

²¹Niźaśa ućhumnakki ni Yöś qhuy tukkin timlu chawkh jilirchiśćhumćha.

²²Xalla niźtikiśtan ućhumnakki thapa quśtan Yöśkinź makhatila, niźaśa cheqpacha thurt'ichi quśtan, niźaśa ućhumnaka pinsiśnakaki ni ana wali pinsiśnakkiśtan ch'uwa khiśtanćha, niźaśa ućhumnaka xañchimi ni ch'uwa qhaśtan axunta khiśtanćha.

²³Niźaśa ućhumnakki thurt'ichi ana teqenaśkuź qamla, xalla ni ućhum thapa quśtan taqu onźta patxparu, niźaśa Yöśki nïź taqu onźta ućhumnakakiś kumlakićha.

²⁴Niźaśa ućhumnakki porapat yanapas qhurla, niźaśa tshanti oqśñi quśśiś khiśxapa niźaśa śumanaka päśxapami.

²⁵Niźaśa ućhumnakki ni ućhumnaka akhsnakkiśtan anaź apatatla, yaqhapanakaki nuź päñićha, ans ućhumnakki porapatź p'eqintayasla; niźaśa ni Yöś tatź thonś thuñi keźunskanaki ućhumnakki tshanti thapa quś thäś wakiśićha.

²⁶Niźaśa ućhumnakki ni śuma taqu paxźpacha qos quśkiś tiraź uj päsaź nïki, anaź iya ni uj päśkiśtan wilana thxotś źelasaćha;

²⁷ans ućhumnakaltaki ni juchjiptayś thuñiź thajwayćha niźaśa ni asñi ujkiśtan, xalla nïki Yöśtan moq'u khiñi źoñinakaź thatnakićha.

²⁸Niźaśa xaqhsilta źoñit ni Moisés lï ana kaśśax nïki, niźaśa pukultan uśh chhepultan cherñi źoñinaka nïź moq'ut źelhćhax nïki, ni źoñi ana oqźku konta khiśtanćha.

²⁹¿Anax tshanti ni Yöś Mati thekśñinaka niźaśa nïź lhokh iñarñinaka niźaśa ni Yöś Espíritu ar arñinakami kaśtikta khiś wakiśixo? Xalla ni lhokhki ni qaśta nuźupanśaćha khićha, niźaśa ninakaki nïźtan źkayi quśśiś khisqattaćha.

³⁰Niźaśa ućhumnakkiź śiśśa, Yöśki tuź khichićha: Wethlaź ni juchjiptayś wakiśićha; niźaśa weriź pakaćha.” Neqhśtan tuź khichiśaqaśśa: “Ni Yöś Tataki nïź wathaź juchjiptayakićha.”

³¹¡Xalla ni źethñi Yöś qharkiś thxotsnakiź nïki, wira ana waliź khekićha!

³²Ans anćhukki ni watchi thuñinakaź khuñśnalla, niźaśa Yöś śuma kintu tshi qhanaźtaqaś tanźkanami anćhukki thapa quśtan ni t'aqhiśiśnaka niźaśa chawkh llakinakami thurt'ichinćhukćha.

³³Niźaśa anćhukakiśtan yaqhapanakaki ar arta kankichićha, niźaśa źoñinakź tukkiś śhoxrichta, niźaśa yaqhapanakaśti tiźta t'aqhiśiñinakkiś junthapsićha.

³⁴Niźaśa anćhukki ni karsilkiś źelhñi jilanaka oqśinćhukćha, niźaśa anćhukki ni anćhuka ćhhultaqinaka kuntintu ni jilirinakźkiś qhañqatchinćhukćha, anćhukki ni tsewkta yoqkin tshan khjusa niźaśa watay wata thurñi ćhhultaqchiśtqa khichinćhukćha.

³⁵Niźaśa anćhukki ni anćhuka Yöśkin tas anaź thatźna, xalla ni Yöśki anćhukakiś tshi chawkh pakaźtaqaś śhikakićha.

³⁶Niźaśa anćhukki ni t'aqhiśiśkiś aśi thäta khiś wakiśićha ni Yöś pektakama päśxapa, neqhśtan nïź taqu onźtakama tanśxapa.

³⁷Xalla ni Yöś śuma kintu Khjirtikiśiki, tuź khićha: “Waxilla, anśillapan ni thonñi khita źoñiki thonakićha. Niźaśa anapanź en enakićha.

³⁸Niźaśa ni źkayi quśśiś źoñiki, nïź thapa quśkiśtanź źetakićha, xalla ni wirqhutñi kephsñi źoñźkiśtan, Yöśki ni źoñźkiśtan anaź kuntintu khekićha.”

³⁹Niźaśa ućhumnakki anaćha ni wirqhutñi kephsñi źoñinaka iratićhumki, niźaśa ninakaki t'aqhiśiśkinź oqhćha, ans ućhumnakki ni thapa quśtan ni liwrïś tanśñi źoñinaka śalinćhumćha.