Read Chipaya HEBREOS 11 Bible Online

HEBREOS 11 - Chipaya bible

HEBREOS 11

¹Xalla ni Yöśkin thapa quśśiś khiśki, nïź thewźta cheqpachapan tanźnaqa khićha; niźaśa ni ana cherta ćhhultaqinaka cheqpachapan cherakićha neqhśtan quś źethchiź khekićha.

²Niźaśa ućhumnaka achchi ephnakaki thapa quśśiś khen tanźtaćha.

³Niźaśa Yöśki nïź thapa quśtan ti yoqa pächićha niźaśa nïź atźtan, niźaśa ućhumnakki ni ana cherchuk ćhhultaqinakkiśtanź cherćha.

⁴Niźaśa Abelki thapa quśtan khisku, Yöśkin wilana Cainźkiśtan tshan khjusa thächićha, xalla niźtikiśtan Yöśki ni źkayi quśśiśamćha khichićha niźaśa nïź wilananaka tanśićha. Neqhśtan ućhumnakki ni Abel tikhśiź khenami nïź Yöśkin thapa quśśiś khen tirapanź nïźkiśtan parlićha.

⁵Niźaśa Henocź thapa quśśiś khen, Henocki źethchiśpacha chhichtaćha ana ti yoqkiś tikhźnaxu, niźaśa ti źoñinakaki ana ni waćhi atchićha, ans Yöś ni chhichtqalćha. Xalla ni Yöś śuma kintu Khjirtikiśiki, tuź khićha, ima Henoc chhichan, Henocki Yöśkin thapa quśśiśtaćha.

⁶Ana thapa quśtanaki anapanź Yöś quś chipqatasaćha; ans ni Yöśkin makhatśxapaki tshi źoñiki kirïśtanćha, niźaśa ni qhurñinaka waćhakeqa khiśtanćha.

⁷Niźaśa Noeź thapa quśśiś khen, Yöś nïźkiś ana cherta ćhhultaqinaka watakićha khikan maśinchićha, neqhśtan Noeki kaśśićha niźaśa tshi paqh walsa nïź qhuy źoñinaka liwrïśxapa pächićha. Xalla ni thapa quśtanśaqaś Noeki ti yoq źoñinaka ujchiśśa khichićha, niźaśa nïki thapa quśśiś khen ni juchjiptayś tanśićha.

⁸Niźaśa Abrahamź thapa quśśiś khen Yöśki ni qhawśićha, neqhśtan Abrahamki ni kaśśićha niźaśa nïź thëźta yoqa tshi pataźtaqaś tanśxapa ulanchićha. Niźaśa Abrahamki nïź yoqkiśtan ulanźku ana śiśta yoqa oqhchićha,

⁹niźaśa nïki thapa quśtan ni Yöś nïźkiś thäta yoqkiś tshi yaqha yoqchiś źoñiźtaqaś qamchićha. Niźaśa nïki tshi pañ qhuykiśqaś qamchićha, niźaśa Isaacmi niźaśa Jacobumi neqhśtan tinakaki ni taqu onźta tanśiśaqaśśa.

¹⁰Ans ni Abrahamki ni thurt'ichi śuyluchiś chawkh watha thewźnatćha, xalla ni wathkiśtanaki Yöśśa ni pirqiñiki niźaśa qhuyñiki.

¹¹Niźtaśaqaś Saraź thapa quśśiś khen, Sarki qhaźta machurimi ikśxapa aśi tanśinćha; neqhśtan näki chawk źon khisku mathchinćha, niźaśa näkiź taqu onśñiki näź thapa quśśiś khen nïź taqu onźta kumlichićha.

¹²Xalla nuź Abrahamki nïź tikhś thuñ kheźuź khen, tama nïźkiśtan oqhñinakchiś khissićha ni tsewkta wara waranakaźtaqaś niźaśa paqh qot at philaźtaqaś, xalla ni źoñinakaki ana wira qanchukaćha.

¹³Thappacha ni źoñinakaki Yöś śuma kintu onźta ana tanźku tikhśićha; ans ninakaki thapa quśśiśtaćha neqhśtan ninakaki aźkiśtan cherchićha, niźaśa ninakaki śumpacha paxasku tsänassićha, tshi yaqha wathchiś źoñi ti yoqa nuź watñiźtaqaś.

¹⁴Xalla nuź chïñinakaki qhanakamaź näsqatćha, ninakaki tirapanź tshi watha qhurkan oqhlayćha.

¹⁵Niźaśa ninakaki ninakź mathta yoqkiśtan pinsitasaź nïki, ninakaki ni mathta yoqaź kephtasaćha;

¹⁶ans ninakaki tshan śuma wathaź pekatćha, xalla nïki tsewkta yoqaćha. Xalla niźtikiśtan Yöśki ninakź Yöś khiś anaź aśśa, xalla ni Yöśki ninakźta tshi chawkh watha thakśinchićha.

¹⁷Niźaśa Abrahamź thapa quśśiś khen, Yöśki ni Abraham quś yanśićha, Abrahamki Isaac wilana thäśxapa ćhelhśićha. Niźaśa Abrahamki nïź śinta machhlla konśxapa iyawpachataćha, ans Yöśki ni Abrahamźkiś taqu onśitaćha, tuź khikan:

¹⁸“Xalla ni Isaacźkiśtan amki tama oqhñinakchiśam khekićha.”

¹⁹Niźaśa Abrahamki Yöś ni tikhśinakkiśtanami jakatatsqatñi muspa aśśiś paxchićha; xalla nuź Abrahamki nïź machh jakatatchiźtaqaś tanśićha.

²⁰Niźaśa Isaacki thapa quśtan Jacobźkiś niźaśa Esauźkiśmi uśhka thonñinakkiś Yöś anćhuk yanapakićha khichićha.

²¹Niźaśa Jacobki wax tikhźnata khen, thapa quśtan Joseź matinakźkiś Yöśx anćhukakiś yanapila khichićha, niźaśa Yöśkin nïź athstan thurt'iźku amtichićha.

²²Niźaśa Joseki tikhźkan thapa quśtan, ni israelitanakźkiś wiruñ anćhukki ni Egiptu yoqkiśtan ulnakićha khichićha, niźaśa nïki ni źoñinakźkiś nïź tsjijnakkiśta mantiźku ekchićha.

²³Niźaśa Moisés mä ephki thapa quśtan, Moisés chheph jïś śhoxchićha; niźaśa ninakaki ni uśha añcha k'achha naychitaćha, niźaśa ni reyki thappacha lukmach wawanaka konax mantichitaćha, ninakaki xalla ni anaź eqhsnatćha.

²⁴Niźaśa Moisesaki thapa quśtan, thowa khisku ni faraonź mata machh ana khis pekchićha;

²⁵neqhśtan nïki ni Yöś wathźtan chika śhoxrichta khiś pekchićha, niźaśa tshi qoluk ni uj päśnakkiś kuntintu qamś pekchićha.

²⁶Niźaśa Moisesaki ni Egiptuź źelinśnakźtan kuntintu qamśmayaki, ni Mesías xaqhnuź t'aqhiśaćhaxa xalla ni irata t'aqhiśiś wali naychićha. Niźaśa nïki Yöś tshi wali onanś thäñi śiśatćha.

²⁷Niźaśa Moisesaki thapa quśtan ni Egiptu yoqkiśtan ni reyź źaxwa ana eqhsku oqhchićha; niźaśa nïź quśkiś amtita thurt'ichipan waqaychichićha, ni ana cherchuk Yöś cherchiźtaqaś.

²⁸Niźaśa Moisesaki thapa quśtan ni Paśku phiśta pächićha, niźaśa ninakź qhuy śana lhokhźtan thawqźnax khichićha, xalla neqhśtan ni tikhsqatñi anjila ni Israel źoñinakź jilir machh ana lanźnaxu.

²⁹Niźaśa ni Israel źoñinakaki thapa quśtan ni paqh lhokh qota tshi qhoñ yoqaźtaqaś watchićha; neqhśtan ni Egiptu źoñinakaki ninaka irata qhuykiś watś pekatćha ans ninakaki qhaśiź lhxapźta tikhśićha.

³⁰Niźaśa ni Jericó wathź thiyuñ pirqita urmutaki thapa quśśiś khen palhsićha, ni Israel źoñinakaź ni wath muytata towqu thuñi muytitan.

³¹Niźaśa Rahab iźiwir źonki thapa quśśiś khen, ni ana kaśñi źoñinakźtan chika ana tikhśinćha, niźaśa na źonki ni Israelź muśñi źoñinaka śuma tanźtqalćha.

³²¿Werhki ćhhulut iya chiyasaxo? Wethtaki Gedeón źoñinakiśtan chïś thuñiqaź phalhtićha, niźaśa Barac, Sansón, Hefte, David, Samuel, niźaśa Yöśkiśtan chïñinakźkiśtanami.

³³Niźaśa tinakaki Yöśkin thapa quśśiś khen ti yoqanaka kanchićha, niźaśa śumapan juchjiptaychićha niźaśa tinakaki ni Yöś śuma kintu onźta tanśićha, niźaśa ni liwunanakź ata phukźinchićha,

³⁴niźaśa aqñi ujnaka thessićha, niźaśa tinakaki paqh kuchillźtan konta tikhśkiśtan śhoxśićha, niźaśa ni qochikiśtan aśśiś khissićha, neqhśtan tinakaki ni kirkiś walxa aśśiś khisku ni tama moq'u źoñinaka atipchićha.

³⁵Niźaśa mätaqanakaki ninakź tikhśi qhuy źoñinaka wilta źethñi tanśićha. Niźaśa yaqhapanakaki ana liwrïta khiś pekźku ni chawkh llakkiś tikhśićha, xalla ti źoñinakaki tshan khjusa źetchiś jakatatś śiśatćha.

³⁶Niźaśa yaqhapanakaki iñarta karinźtan xwatta t'aqhiśichi, niźaśa karsilkiś chawkhtataćha.

³⁷Niźaśa yaqhapaśti maśtan ćhakhxawi kontataćha, niźaśa taypikiś xañchi murźinta uśh paqh kuchillźtan kontataćha; niźaśa ti źoñinakaki teqhśtan nawkhchuk ni üśi śqiśi niźaśa kawri śqiśi kuthchi oqhlaychićha; t'aqhiri, llakita niźaśa śhoxrichta.

³⁸Niźaśa ti źoñinakaki ti yoqkiś źelhś anaź wakiśatćha, niźaśa tinakaki ni ch'eqti yoquñ oqhlaychićha, niźaśa kururan niźaśa maś aqh qaqaranmi niźaśa ti yoq phetaranmi.

³⁹Ans ni Yöś śuma kintu onźtaki ni źoñinakźkiśtan ana xaqhsiltami tanśićha, qhaźta thapa quśśiś khita źoñinaka khenami;

⁴⁰Niźaśa Yöśki ućhumnak khuñśku tshan khjusa pinsitqalćha, ni źoñinaka ućhumnakatan chika khissiź khen, ni źoñinakaki źkayi khisqatta khekićha.