Read Chipaya HEBREOS 12 Bible Online

HEBREOS 12 - Chipaya bible

HEBREOS 12

¹Niźaśa ućhumnakki, Yöśkin wakchi thapa quśtan qamñi źoñinakaź muytata źelhćha, neqhśtan ućhumnakki thappacha ni ućhumnak aqñi ćhhultaqinaka tshi qhutñiź nonźla, niźaśa ućhumnaka uj päśnakami, neqhśtan ućhumnakki paśinśiźtanź ti uśhka thonñi qamañkiś qamla.

²Niźaśa ućhumnakki Jesusiźkinpanź cherźla, xalla ni ućhumnaka thapa quśki nïźkiśtanź thonćha, niźaśa nïćha źkayi quśśiś khisqatñiki. Niźaśa Jesusaki ni kuruśha awantichićha, ana ni aśi tikhśkiśtan aśku, niźaśa Jesusaki ni t'aqhiśiźku kuntintu niźaśa chipchi khiś śiśatćha; neqhśtan Jesusaki Yöś julś źewqhuttan julśićha.

³Niźaśa anćhukki ni Jesuscriśtuź qamtaź khuñśna, ni uj päñi źoñinakaki Jesusa añcha t'aqhisqatchićha; xalla niźtikiśtan anćhukki anaź oćha niźaśa anapanź qiwsna.

⁴Niźaśa anćhukki ni uj päśkiśtan t'aqhiśkan, imaśipan tikhśkiś thonchinćhukćha,

⁵ans anćhukki Yöś mati khiskiśtan maśinta thatśinćhukćha. Xalla ni Yöś śuma kintu khjirtikiśiki, tuź khićha: “Weth mati, ni Yöś Tatź qamaña ana iñaralla, niźaśa anapan q'iwsnalla nïź amkiś ujźnanami.

⁶Yöś Tataki jëkhźlax nïź pekta, nïźkiś ujźa, niźaśa jëkhqaś nïź matiźtaqaś naytaki xalla nïźkiś kaśtikakićha.”

⁷Niźaśa anćhukki anćhuka quś askichta khiśxapaź t'aqhiśi: Yöśki anćhuk nïź matiźtaqaś añcha pekćha. ¿Xaqhsilta matit epiź ana ujźta źelasaxo?

⁸Niźaśa Yöś thappacha nïź matinaka iwxt'iñiź nuź anat anćhuk iwxt'ićhax nïki, anćhukki anaź cheqpacha Yöś mati khesaćha.

⁹Niźaśa ućhumnak okhala khikanaki, ućhumnaka ephnakaki iwxt'iñitaćha, niźaśa ućhumnakki ninaka kaśinćhumtaćha. ¿Qhaźtikiśtanź ućhumnakki ana ni tsewkta Yöś Ephźkiś ana tasnasaxo? Xalla nïźkiś tshan tas wakiśićha nïźkiśtan źeti tanśxapaki.

¹⁰Niźaśa ućhumnaka mä ephki ti yoqkiś qamkan ućhumnak ixwt'iñitaćha, ninakź śuma pinsitakama; ans Yöśki ućhumnak ni irata źkayi quśśiś śuma qamañchiś khexuź ixwt'ićha.

¹¹Niźaśa anaź xaqhsilta kaśtiku thänmi khjusaki, ans nïkipanź miśqatćha; niźaśa tshi źoñiki ni chïźinta katoqićhax nïki, nïź qamañaki śuma śoq'u qamañaćha.

¹²Xalla niźtikiśtan anćhuka thxotsi qhara niźaśa źoxsi owami tshitsqata,

¹³niźaśa anćhukki ni śoq'u jikhś qhura, ni anćhuka źoxsi qhxocha źetaxu, niźaśa ana iya źoxsnaxu.

¹⁴Niźaśa anćhukki thapa źoñinakźtan śuma ch'uwa qamañchiśpanź khispeka; niźaśa ana źkayi quśtanaki anaź jëkhmi ni Yöś Tata cheri atasaćha.

¹⁵Niźaśa anćhukki anaź jëkh źoñźkiśimi ni Yöś onanźkita phalhtisqata, niźaśa anax jëkh źoñimi tshi xar śep'ichiśtaqaś khila, neqhśtan ni śep'iźtan źoñinakaź aqasaćha.

¹⁶Niźaśa anćhukakiśtan anax jëkhmi ni iź iśkiś quś thäla, niźaśa anax ni źkayi quśśiś jilanaka ćhhaxwla; ni Esauki nuź pächićha, xalla ni Esauki tshi ćhherźtanqaś nïź jilir machh tanś qama turkiźinchićha.

¹⁷Neqhśtan anćhukkiź śiśśa, ni źoñiki nïź ephźkiśtan qama tanśpektikiśtan, nïź ephki ana munchićha; neqhśtan qhaźta qäźkumi anapan tanśićha.

¹⁸Niźaśa anćhukki anapan ni Israel źoñinakaźtaqaś makhatchinćhukćha, niźaśa ni sumchi t'aqhiśiś llakiśhiśkiśiki tshi uj asñi laphiñi lanśukataćha;

¹⁹niźaśa anćhukki ni tothi qhawñi niźaśa ni Yöś chïźkiñi xora ana nonśinćhukćha. Niźaśa ni xora nonśñi źoñinakaki Yöśkin rokt'ichićha ana tira palxayźkaxu,

²⁰niźaśa ninakaki ni chïźkita lï anaź awanti atatćha, ni xoraki tuź khetćha: “Xalla ni kurkiś qhxocha thekśñi źoñiki, maśtan uśh tshi paqh ar achchiś jirźtan konś wakiśićha, qhaźta tshi uywa khenami.”

²¹Xalla ni thenñiki anawal iśpantichukataćha, niźaśa ni Moisespachaź, tuź khichiki: “Werhki tsukhchil kharkatućha”

²²Ans anćhukki ni Sión khita kuru makhatchinćhukćha, niźaśa ni źethñi Yöś tsewkta Jerusalén chawkh watha makhatchinćhukćha, niźaśa śmali tama anjilanakźkiś makhatchinćhukśaqaśśa ni Yöśtan chika itsxapa,

²³niźaśa ni Yöś jilir matinakźkiśimi, ninakź thüki ni tsewkta yoqkin katoqtaćha. Neqhśtan ninakaki thapa juchjiptayñi Yöśkiś makhatchićha, niźaśa Yöśki ni śuma animuchiś źoñinakźkiś źkayi quśśiś khisqatchićha,

²⁴niźaśa anćhukki ni Jesusiźkiś makhatchinćhukćha nïki uśhka palt'ita thaxśñićha, niźaśa ućhumnakki nïź lhokhźtan źkayi quśśiś khisqattaćha, xalla ni lhokhki Abelź lhokhkiśtan tshan khjusas chïźinćha.

²⁵Xalla niźtikiśtan anćhukki, ni ućhumnakatan parliźkiñi źoñinakźtan ana anaź khiś wakiśićha. Niźaśa nïź manta päqatśxapa qhawźnan anaź khiñi źoñinakaki anaź atipakićha, niźaśa ućhumnakki ni ućhum tsewkta yoqkiśtan qhawśñiźkiś tax thëźax nïki, ućhumnakki tshantiź ana atipi atasaćha,

²⁶Xalla ni pachaki Yöś chïta xoraki ti yoqa cheqhinsqatchićha, ans xaśiki, tuź khićha: “Werhki tshïźtan anal ti yoqaqaś cheqhinsqataćha, ans ni tsewkta pachami.”

²⁷“Xalla nuź tshïźtan chïkuśti”, tuź khićha: Nïź päta ćhhultaqinakaź qhañakićha, uśh qisqattaśaqaś khesaćha, xalla ni ana qisqati atchukaki tira thuraxu.

²⁸Niźaśa ni Yöś irpiś wathaki ućhunkiś thätaćha, xalla ni irpiś wathaki anaź qisqatta khesaćha. Ućhumnakki xalla tïźkiśtan Yöśkin sparakiź khila, niźaśa ućhumnakki Yöś quś pekchukaź amtila.

²⁹Niźaśa ućhumnaka Yöśki, tshi thapa ujñi ujźtaqaśśa.