Read Chipaya HEBREOS 13 Bible Online

HEBREOS 13 - Chipaya bible

HEBREOS 13

¹Niźaśa anćhukki tshi Yöś kirïchi jilaźta anaź porapat oqsas apatata.

²Niźaśa anćhukki ni anćhuka qhuykiś thonśñi źoñinakźtan thapa quśtanpanź khella, anćhukakiśtan yaqhapanakaki ana śiśku anjilanaka qhuykiś qhawśićha.

³Niźaśa anćhukki ni karsilkiś chawkhta źoñinakźkiśtanź khuñśna, niźaśa anćhuk ninakźtan chika tanta źelhtaźuźtaqaś. Niźaśa anćhukki ni śhoxrichta źoñinakźkiśtan pinsa, niźtaśaqaś anćhukki śhoxrichta khesaćha.

⁴Niźaśa thappacha źoñinakaki ni śalźtax waqaychila, niźaśa ninakaź kaśarta śuma ch'uwax waqaychila; Yöśki ni iź iźñi źoñinaka niźaśa iźiwir źoñinakaź juchjiptayakićha.

⁵Niźaśa anćhukki anaź päśqaś peka; ni anćhuka źelinśnakallźtan kuntintuź qama, Yöśki tuź khićha: “Werhki anapan am ekaćha niźaśa anapan xaytaćha.”

⁶Xalla nuź ućhumnakki ana jiwjatźku chiyasaćha: “Ni Yöś Tataki werh yanapñićha; neqhśtan werhki anal eqhsnaćha: ¿Ti źoñinakaki xaqhnuźt werh päsaxo?”

⁷Niźaśa anćhukki ni anćhukakiś Yöś śuma taqu thaxiñi jilanakźkiśtanź khuñśna; niźaśa ninankź źeti xaqhnuźupan źeranchita xalla nïź näśna, neqhśtan anćhukki ninanakź thapa quśśiś qamta irataź qama.

⁸Jesucriśtuki śeśkumi, töximi, niźaśa watay watxapa nïpachaćha.

⁹Niźaśa anćhukki ni tshemata thaxinśnakkiś niźaśa ana paxta thaxinśnakkiś anaź chhichqata. Ans ućhumnakki ni ćhherkiśtan llakiśhpachaki Yöś oqśñi quśkiś thurt'iś wakiśićha; xalla ni ćhherkiśtan llakiśhnakaki anapanź ućhumnak śuma qamañkin chhichasaćha.

¹⁰Ućhumnakki tshi altarchiśćhumćha, xalla ni altarkiśtan ni timlu jilirinakaki anaź lulhś wakiśićha tuki lulhñitaźlax niźta irataki.

¹¹Timlu chawkh jiliri irpiñiki ni uywi lhokhnaka timlu chhichñićha, ni ujnakkiśtan pertunta khiśxapa, neqhśtan ni uywi chhiświnakaki ni wathź thiykin ujñitaćha.

¹²Xalla nuźuśaqaś Jesusaki wathź thiykin tikhźkan t'aqhiśichićha, xalla ti źoñinaka perśun lhokhźtan źkayi quśśiś khisqatśxapa.

¹³Neqhśtan ućhumnakki Jesusiźtan chika wathź thiya oqhlalla, niźaśa ućhumnakki ni Jesusaź t'aqhiśta irataśaqaś t'aqhiślalla.

¹⁴Niźaśa ućhumnakki ti yoqkiś ana watay wata thurñi chawkh wathchiśćhumćha, ans ućhumnakki uśhka thonñi chawkh wathaź qhurćha.

¹⁵Xalla niźtikiśtan ućhumnakki Jesucriśtuź qharkiśtan Yöś alt'iśpanź wakiśićha. Xalla ti ućhumnakaź alt'itaki tshi wilanaźtaqaśśa. ¡Ućhumnakki perśun atpulźtanź Yöś alt'ilalla!

¹⁶Niźaśa anćhukki anaź ni śumanaka päś thatźna, niźaśa ni anćhuka źelinśnaka yaqhanakźkiś toxunśnakkiśtanami; xalla ti śuma pätanakaćha Yöś quś chipqatñiki.

¹⁷Niźaśa anćhukki, anćhuk irpiñi źoñinakźkiś ćhhulu thäśmiź peka niźaśa ninakźkiś tasna, ninakaki ana jejźku anćhuk kuytićha, niźaśa ninakaki anćhukaź lanqźta Yöśkin thäś śiśśa. Niźaśa anćhukki śuma lanqśkinpanź peka, ans ana llakiśhśhukaki, niźaśa ni anćhukaź ana śuma lanqźtaki anćhuka qamañkiś ana wakiśiñiź khesaćha.

¹⁸Niźaśa anćhukki wethnakaltaxapaź mayiśa, niźaśa werhnakki phiya quśśiśpan qamś pekućha, niźaśa werhnakki thapa ćhhultaqkiś śumapan päś pekućha.

¹⁹Niźaśa anćhukki wethtaxapaź mayiśalla, Yöś waxilla werh anćhukatan śalqataxu.

²⁰Ni śuma qamañchiś Yöśki ućhumnaka Jesucriśtu tikhśikiśtan jakatatsqatchićha, niźaśa nïki chawkh üśi awatirićha, xalla nïki perśun lhokhźtan ti watay watxapa palt'ita thulśićha,

²¹niźaśa nïki anćhuk źkayi quśśiś niźaśa thapa ćhhultaqkiśimi śumapanx khisqatla, niźaśa nïź quś pektakama oqaxu; niźaśa nïki ućhunnakatan nïź quś pektakamax päla ni Jesucriśtuź qharkiśtan. ¡Niźaśa Criśtuki watay wata aśśiśx khila! Xalla nuźox khila.

²²Jilanaka werhki anćhuk rokt'ućha, ti weriź qolukulla anćhukakin quśkan khjirźkita paśinśiźtan katoqalla.

²³Niźaśa anćhukki śiśakićha ućhumnaka Timill jilaki liwriśśićha; niźaśa ni jilaź waxilla thonakiź nïki, werhki anćhuk cherśñi thonkan ni jila śhikkul thonaćha.

²⁴Niźaśa anćhukki thappacha anćhuk irpiñi źoñinakźkin tsänakićha, niźaśa thappacha ni Yöś kirïchi źkayi quśśiś jilanakźkiśimi. Ni Italia wathchiś jilanakaki anćhukakin tsänźkićha.

²⁵Niźaśa Yöśki nïź oqśñi quś thappacha anćhukakiśx thäźkila. Xalla nuźox khila.