Read Chipaya HEBREOS 2 Bible Online

HEBREOS 2 - Chipaya bible

HEBREOS 2

¹Xalla niźtikiśtan ućhumnakki ni liwrïñi tawqiśtan nonźta katoqś añchaź wakiśićha, ućhumnak ana ni jikhśkiśtan saraqśxapaki.

²Niźaśa ni anjilanakź atkiśtan chïta taqunakaki ew werarataćha, niźaśa thappacha uj päñi źoñinaka niźaśa ana kaśñi źoñinakami ninakźkiś wakiśiñi kaśtiku tanśićha.

³Niźaśa ućhumnakki ni cheqan chawkh liwrïñikiśtan anaź juśhu päkiź nïki, ¿xaqhnuźupan ućhumnakki atipasaxo? Niźaśa tuki Yöś Tata pachaćha ti liwrïñi taqu maśinchiki, neqhśtan ti taqu nonśñi źoñinakaki ućhumnakakiś katoqsqatchićha.

⁴Niźaśa Yöśpachaćha ninakź atkiśtan iśpantichuk chimpunakźtan niźaśa wakchi milajrunakźtan thëśiki, niźaśa ni Espíritu Santu nïź quś pektakama ućhumnakakiś thächićha.

⁵Yöśki ana ni anjilanakź qharkiś ni uśhka thonñi yoqa uchchićha, ućhumnakki xalla tinakkiśtanź parlićha.

⁶Ans ni Yöś śuma kintu khjirtikiśiki, tuź khićha: “¿Ćhhulut ni źoñixo? Am nïźkiśtan khuñśxapaxo niźaśa am ni źoñź Mati thonśxapaxo.

⁷Niźaśa amki ni anjilanakźkiśtan tshi qoluk upaqaś pächamćha, Ans amki nïźkiś chawkh aśśiś śuma źoñi khisqatchamćha;

⁸Niźaśa amki thappacha nïź qhxoch qostan thekśamćha.” Xalla nuź thappacha ni ćhhultaqinaka nïź qhxoch qostan thekźku, Yöśki anapan ćhhulumi nïźkiś ana thekźku ekchićha. Ans ućhumnakki imaśipanź thappacha nïź qhxoch qostan cherćha.

⁹Niźaśa Yöśki tshi upakama ni Jesusa ni anjilanakź qostuñ uchchićha, neqhśtan nïź t'aqhiśiźku tikhźtikiśtan muspa qhan aśtan pilluytaćha. Yöśki nïź oqśñi quśtan ni Jesusaź tikhźta thapa źoñinakźta añcha wali khisqatchićha.

¹⁰Niźaśa thapa ćhhultaqinakaki Yöś pätakamaćha niźaśa nïźtaxapaź źelhćha, niźaśa thappacha nïź matinaka nïź irpiś wathkiś źelhñiź pekćha. Xalla nuź Jesusaź t'aqhiśitikiśtan Yöśki źkayi quśśiś khisqatchićha ti źoñinaka liwrïśxapaki.

¹¹Thappacha źoñinakaki tshi Ephchiśqaśśa: Yöś kirïchimi ana Yöś kirïchimi. Xalla neqhśtan ni Yöś Machhki jilanaka khiś anaź aśśa,

¹²Xalla ni Yöś śuma kintu khjirtikiśiki, tuź khićha: “Werhki weth jilanakźkiś am thül maśnaćha, niźaśa Yöś kirïchi jilanakź taypikiśtan iranakal itsnaćha.”

¹³Neqhśtan tuź khichiśaqaśśa: “Werhki nïźkiśl tasnaćha.” Neqhśtan wilta khichiśaqaśśa: “Werhki teqhś, Yöś wethkiś thäta Yöś matinakźtan źelućha.”

¹⁴Xalla nuź tshi qhuy źoñinakaki tshi xañchichiśśa niźaśa tshi lhokhchiśśa, niźtaśaqaś Jesusaki źoñź xañchichiśśa niźaśa lhokhchiśśa, xalla ni konśxapa aśśiś źoñi kanśxapaki, xalla ni źoñiki Saxraćha.

¹⁵Xalla nuź tikhźku Jesusaki ni tikhśkiśtan eqhskan qamñi źoñinaka liwrïchićha.

¹⁶Niźaśa Jesusaki ana ni anjilanaka yanapi thonchićha, ans ni Abrahamźkiśtan oqhñi źoñinaka yanapi thonchićha.

¹⁷Xalla tixapa Jesusaki thapa ćhhultaqkiśtan nïź jilanakźtan irata khiśtanćha, xalla nuź thapa quś Yöś manta päśkiś irpiñi khiśxapaki, xalla nuź Yöśki ni ujnakźkiśtan pertunś pekćha.

¹⁸Niźaśa ni Jesusapachaćha Saxraź llaki thäta t'aqhiśichiki, xaśiki ni Jesusaki llaki thäta źoñinakźkiś yanapasaćha.