Read Chipaya HEBREOS 3 Bible Online

HEBREOS 3 - Chipaya bible

HEBREOS 3

¹Anćhukki Yöś kirïchi źkayi wathchiś jilanakćhukćha, xalla niźtikiśtan Yöśki nïźtaxapa anćhuk qhawśićha, niźaśa anćhukki Jesucriśtu Apuśtulaźtaqaś niźaśa ni timlu chawkh jiliri irpiñiźtaqaś paxakićha, xalla nïź khen ućhumnakki thapa quśśiśśa.

²Xalla ni Jesusaki Yöśkin thapa quśtanpanćha, niźtaśaqaś Moisesmi ni Yöś kirïchi jilanakźtan thapa quśtan Yöś manta pächićha.

³Ans ni Jesusaćha ni Moiseskiśtan tshan śuma źoñi khitaki, xalla niźtaśaqaś tshi qhuya qhuyñi źoñiki nïź qhuy źoñinakźkiś śuma źoñi khitaćha.

⁴Niźaśa thapa qhuyaki tshi źoñiź qhuytapan khiśtanćha; ans Yöśśa thapa ti źelhñinaka pächiki.

⁵Xalla nuź Moiseski Yöś manta päñiźta thapa ni Yöś kirïchi jilanakźkiśtan thapa quśśiśtaćha, niźaśa nïź lanqśki ni Yöś chïtakama maśinśtaćha.

⁶Ans Criśtuki tshi Matiźta Yöś qhuykiś thapa quśśiśtapantaćha, xalla ni qhuyaki ućhumnakćha, niźaśa ućhumnakki thurt'ichipanź ni źeranśkama khekiź nïki, ni uśhka thonñi irpiś wathkiś chipźnakićha.

⁷Xalla niźtikiśtan ni Espíritu Santuki ni Yöś śuma kintu khjirtikiś, tuź khićha: “Anćhukki töx thuñiź ni Yöś chïźkita nonźnakiź nïki,

⁸anćhukki anaź choxru quśśiś khisna ni kephsi źoñinakaźta, ni źoñinakaki ch'eqti yoqkin Yöś yanśićha.

⁹Xalla nikhu ni anćhuka achchi ephnakaki werh ujkiś thxotś pekchićha, ninakaki weriź pätanaka paqhpikqhalu wata cherchićha.

¹⁰Xalla niźtikiśtan werhki ni źoñinakźxapa źaxwchinćha, neqhśtan ninakźkiś khichinćha: ‘Anćhukki quśqatchipanź oqhlayćha, niźaśa anćhukki anapan weth jikhś paxś pekchinćhukćha.’

¹¹Xalla niźtikiśtan werhki źaxwźku thurt'ichinćha, xalla ni źoñinakaki ni weth jejś thuñkiś anaź luśhakićha.”

¹²Jilanaka, anax xaqhsiltami anćhukakiśtan ana kirïñi ñexw quśśiś khila, ni źethñi Yöśkiśtan saraqśxapaki.

¹³Ans anćhukki śapuru porapatź p'eqintayasa ti ućhum qamś thuñkama, niźaśa anćhukakiśtan anax xaqhsiltami ujkiś thxotźta khila, neqhśtan choxru quśśiś khiśxapaki.

¹⁴Niźaśa ućhumnakki Criśtuźtan chika khistaćha, neqhśtan ućhumqaź ni ućhumnakaź qallantita thapa quś ti pacha źerañikama thurt'ichi quśśiśpanź khila.

¹⁵Xalla ni Yöś śuma kintu khjirtikiśiki tuź khićha: “Anćhukki töx thuñiź ni Yöś chïźkita nonźnakiź nïki, anćhukki anaź choxru quśśiś khisna ni kephsi źoñinakaźta.”

¹⁶¿Xaqhsilta źoñinakat ni Yöś śuma kintu nonźku kephsixo? Moisesaź ni Egiptu yoqkiśtan thappacha jeskita źoñinakaćha.

¹⁷¿Niźaśa Yöśki jëkhnakźxapa paqhpikqhalu wata źaxwchitaxo? Xalla ni uj päñinakźtan, neqhśtan ninakaki ni ch'eqti yoqkin tikhśićha.

¹⁸¿Yöśki jëkhnakźkiś thurt'iś tawqźtan chïchita ana nïź jejś thuñkiś luśhakiź khikanxo? Xalla ni ana kaśñi źoñinakźta.

¹⁹Cheqpacha ni źoñinakaki ana kirïtikiśtan, ni Canaán yoqa ana luśhi atchićha.