Read Chipaya HEBREOS 4 Bible Online

HEBREOS 4 - Chipaya bible

HEBREOS 4

¹Ućhumnakki ni Yöś jejś thuñkiś taqu onźtichiś khikanaki tuytaź wakiśićha, anax anćhukakiśtan xaqhsiltami ana atla.

²Niźaśa ućhumnakćha ni Yöś śuma taqu tanśñiki ni źoñinaka irataki; ans ni źoñinakźtaki anapan nonśxapami wakiśsqatchićha, ni źoñinakaki ana thapa quśśiśtaćha, ni Yöś śuma kintu nonśñi źoñinakźkiśtanaki.

³Ans ućhumnak Yöś kirïchinaka ni Yöś jejś thuñkiś luśhakićha; xalla tïźkiśtan Yöśki, tuź khichićha: “Xalla niźtikiśtan werhki źaxwchi thurt'ichinćha, ni ujchiśnakaki ni weth jejś thuñkiś anaź luśhakićha.” Ans Yöśki ti yoqa thulźtikiśtanpacha nïź lanqś źerźtqalćha;

⁴Xalla ni Yöś śuma kintu Khjirtikiśiki ni towqu khiñi thuñkiśtan, tuź khićha: “Yöśki thappacha lanqźku towqu khiñi thuñkiś jejśićha.”

⁵Neqhśtan ni Yöś śuma kintu khjirtikiśiki, tuź śaqaś khićha: “Ni ujchiś źoñinakaki ni weth jejś thuñkiśiki anaź luśhakićha.”

⁶Ans yaqhapanakaki iyapanź ni jejś thuñkiś luśh phalhtićha, xalla ni Yöś śuma kintu tuki tanśinakaki ana kaśśićha, neqhśtan ninakaki ana luśhśićha.

⁷Xalla niźtikiśtan Yöśki wilta tshi thuñi thäźkichićha, xalla nïki ew “töxta thuñićha”, xalla nïki Davidź atkiśtan ni Yöś śuma kintu Khjirtikiśiki, tuź khjirtaćha: “Anćhukki töx thuñiź ni Yöś chïźkita nonźnakiź nïki, anćhukki anaź choxru quśśiś khisna.”

⁸Niźaśa Josueki ni Israel źoñinakźkiś jejś thuñiź thätasaź nïki, Yöś anaź yaqha jejś thuñkiśtan chïtasaćha.

⁹Xalla niźtikiśtan ni Yöś kirïchi źkayi quśśiś jilanakźtaki tshi jejś thuñiź źelhćha.

¹⁰Xalla ni Yöś jejś thuñkiś luśhñi źoñiki, nïź lanqśkiśtanź jejźa, xalla nuź Yöśki lanqźku jejśiśaqaśśa.

¹¹Niźaśa ućhumnakki ni jejś thuñkiś luśhxapaki walxa lanqśtanćha, ana xaqhsilta źoñimi ni ana Yöś kirïchi źoñinaka irata khexu.

¹²Xalla ni Yöś śuma kintu źetchiśśa niźaśa aśśiśśa. Xalla nïki ćhhuluź chëchi porapqhuttan archiś paqh kuchillźkiśtan tshan arićha, xalla ni ariki źoñź qosta quś niźaśa nïź animumiź larźa, niźaśa tshi źoñź tsjij śalśñimi niźaśa tsjij parpami, niźaśa ni ariki źoñź quśkiś pinsitanakamiź phalźa.

¹³Niźaśa ni Yöś pätanakaki anapanź nïź tukkiśtan śhoxźnasaćha; thappacha ti ćhhultaqinakaki ni ućhum qhanakama maś Yöś źhukkiś qhanapacha chertaqaśśa.

¹⁴Jesusa Yöś Matiki ućhumnaka timlu chawkh jilirićha, xalla ni Jesusaki ni tsewkta yoqkin luśhśićha. Xalla niźtikiśtan ućhumnakki thapa quśtan khiśtanćha.

¹⁵Xalla ni ućhum timlu chawkh jiliriki ućhumnakaź upa quśśiś khen quśkasaćha, xalla nïki niźtaśaqaś uj thxotuntataćha ana ujchiś khenpacha.

¹⁶Niźaśa ućhumnakki ni ućhumnaka Yöś śuma irpiśkiś thapa quśtanź makhatila, xalla ni ućhumnak oqźnaxu, niźaśa ućhumnakakiś phaltiźinanx yanapźkila.