Read Chipaya HEBREOS 5 Bible Online

HEBREOS 5 - Chipaya bible

HEBREOS 5

¹Thapa ni timlu chawkh jilirinaka irpiñiki ni źoñinakźkiśtan illśtaćha, Yöś tukkiś ni źoñinakźkiśtan phalt'iźinaxu niźaśa ujnakkiśtan wilananaka thänaxu.

²Niźaśa ni timlu chawkh jiliriki ni źoñinakźtan chika ujź attaśaqaśtaćha, niźaśa ni uj päñi ina quśśiś źoñinaka oqźnasaya;

³niźaśa nïź upa quśśiś khen, nïź ujkiśtan wilananaka thxotśtanćha niźaśa ni wath źoñinakź ujnakkiśtanami.

⁴Anaź jëkhmi perśunpacha ti jiliri luśh pekasaćha, ans Yöś ni qhawźa niźaśa śuma źoñićha khićha, xalla niźtaśaqaś Yöśki ni Aarón illśićha.

⁵Xalla niźtaśaqaś Criśtuki ana perśunpacha ni timlu chawkh jiliri irpiñi khissićha, ans Yöśśa ni śuma źoñi khisqatchiki, niźaśa nïpachaź tuź khichiki: “Amki weth Matimćha, töx thuñi werh am pächinćha.”

⁶Neqhśtan ni Yöś śuma kintu Khjirtikiśiki, tuź śaqaś khićha: “Amki watay wata thurñi timlu chawkh jilirimpanćha, xalla ni Melquisedec irata.”

⁷Ni Criśtuki ti yoqkiś qamkan kalaru xorźtan niźaśa muspa qaxźtan Yöśkin mayiśichićha niźaśa rokt'ichićha, ni Yöśki ni tikhśikiśtan liwrïś aśśiśtaćha; neqhśtan nïź kaśñiź khen Yöśki ni nonśićha.

⁸Niźaśa Criśtuki Mati khikanpacha, ti yoqkiś t'aqhiśiźku ni kaś katoqchićha;

⁹xalla nuź śumanaka päźku, nïki ni kaśñinaka watay watxapa liwrïñi khissićha,

¹⁰xalla neqhśtan Yöśki ni timlu chawkh jilirinaka irpiñi uchchićha ni Melquisedec irata.

¹¹Wethnakaltaki ti ćhhultaqkiśtan wakchiź chïś źelhćha, ans anćhukki ana uri katoqinćhukćha neqhśtan ch'amaćha ti ćhhultaqkiśtan näsqatśki.

¹²Niźaśa anćhukki aźqaź ti taqunaka nonźa niźaśa anśkamaki thaxiñi khiśtantaćha; ans anćhukki ni Yöś ćhhultaqkiśtan phaśil näśuk taqunakźtan wiltaź thaxiñi pekćha. Niźaśa anćhukki ni śuma ćhheri khiśpacha upa quśśiś khissinćhukćha, niźaśa anćhukki ni lichi likhśtanćha.

¹³Niźaśa ni lichi likhñinakaki tshi piś ichñi wawaźtaqaśśa, ninakaki ni werar juchjiptayś anaź atasaćha.

¹⁴Xalla ni śuma ćhheriki chawk źoñinakźtaćha, ninakaki juchjiptayi śiśśa, niźaśa ninakaki ni śumanaka niźaśa ana śumanaka phalśñipanź śiśśa.