Read Chipaya HEBREOS 7 Bible Online

HEBREOS 7 - Chipaya bible

HEBREOS 7

¹Ti Melquisedecki Salem wathź reytaćha, niźaśa ni tsewkta Yöś timlu chawkh jiliriśaqaśtaćha. Neqhśtan ni Abrahamź ni reynakź śultatunaka atipźku kuttiźkitan, Melquisedecki Abraham śali ulanchićha neqhśtan Yöś nïźkiś yanapila khichićha;

²neqhśtan Abrahamki ni Melquisedecźkiś ni kira śalźku thappacha kantanakkiśtan qhalukhiñikiś t'aqźinchićha. Xalla ni Melquisedec thüki, tuź khićha “śuma juchjiptayñi reyćha”, neqhśtan nïki Salem reyśaqaśtaćha, xalla nïki tuź khićha “śuma qamañchiś rey.”

³Xalla ni Melquisedecź mä ephki anapantaź śiśśuka niźaśa nïź achchi ephnakami; niźaśa nïź mathta thuñkiśtanami anapantaź śiśśuka niźaśa ana nïź tikhźta thuñimi; xalla niźtaśaqaś ni Yöś Machhki watay wata timlu chawkh jilirićha.

⁴Ni Melquisedec cheqan źoñi khitataćha anćhukki nïź cherźna, niźaśa ućhum achchi eph Abrahampachaź ni reynakź śultatźtan kira śalźku kanta ćhhultaqinakkiśtan qhalukhiñikiś thächiki.

⁵Xalla ni Moisés lïkiśiki ni timlu jilirinakaki Leví t'aqkiśtan oqhñinakaćha, xalla ti jilirinakaki ni wathźkiśtan qhalukhiñikiś thapa ćhhultaqkiśtan mayś wakiśićha, ni źoñinakaki ninakź qhuy źoñinakaćha niźaśa Abrahamźkiśtan oqhñinakaćha ninaka irata.

⁶Niźaśa Melquisedecki anataćha ni Leví t'aqkiśtan oqhñi, xalla ti jiliriki ni Abrahamź qhalukhiñikiś ćhhultaqinaka thäta tanśićha, xalla nuź Melquisedecki Abrahamźkiś Yöś yanapila khichićha;

⁷niźaśa anaź jëkhmi anaź khesaćha, ni upañaźtaki nïź jilaź yanapila khitapanćha.

⁸Xalla ti qamañkiśiki ni qhalukhiñikiś ćhhultaqkiśtan mayñi źoñinakaki tikhśñikamaćha; ans ni Yöś śuma kintu Khjirtikiśiki tuź khićha, ni Melquisedec tira źethñi źoñźkiśtanźtaqaś chïćha.

⁹Xalla tuź śaqaś chïchuka khesaćha, xalla ni Leví t'aqkiśtan oqhñi timlu jilirinakaki, anśiki ni qhalukhiñikiś ćhhultaqinakkiśtanź mayćha, ninakaki niźtaśaqaś ni Melquisedecźkiś qhalukhiñi ćhhultaqinakkiśtan pakchiśaqaśśa, xalla ni Abraham nïźkiś paktikiśtan.

¹⁰Xalla tïki tuźutaćha, ni Melquisedec Abraham śali ulantan ni Abrahamki nïź xañchikiś nïźkiśtan oqhñinaka chhichatćha, xalla ninakaki ni oraki ima mathtataćha.

¹¹Xalla ni Israel wathaki ni Leviki timlu jilirinakźkiśtan lï tanśićha. Xalla ni timlu jilirinakaki ni źoñinaka źkayi quśśiś khisqati attasaź nïki, anaź yaqha timlu jiliri thonñi wakiśtasaćha, ana ni Aarón t'aqkiśtan oqhñi ans Melquisedecźkiśtan oqhñi.

¹²Xalla ni timlu jiliri kampiyakiź nïki, ni lïśaqaś kampiyśtanćha;

¹³Xalla ni ućhum Yöś Tatźkiśtanaki ni Yöś śuma kintu Khjirtikiśiki, tuź khićha: Ni Jesusaki anataćha ni Aaronź t'aqkiśtan oqhñiki, ans Judá t'aqkiśtan oqhñitaćha, ni Judá t'aqkiśtanaki anapan timlu jiliri ulanśtanćha, niźaśa anapanź neqhśtan ulanchićha.

¹⁴Niźaśa ućhumnakki śumaź śiśśa ućhumnaka Jesús Tataki ni Judá t'aqkiśtan thonchićha, niźaśa Moisesaki ti t'aqkiśtan anapan ni timlu jilirinakźkiśtan chïkanaki chïchićha.

¹⁵Niźaśa xalla tïki tshant qhanaćha ni ew timlu jiliri thonchiźlax nïki, ni Melquisedec irataćha,

¹⁶xalla ti timlu jiliriki anataćha ni źoñiź amtita lï patxparu, ans tshi ana aqchuk aśśiś źetkiśtan thonatćha.

¹⁷Yöśki xalla nïźkiśtan tuź khichićha: “Amki watay wata thurñi timlu chawkh jilirimćha, xalla ni Melquisedec irata.”

¹⁸Xalla ni tukita irpiś lïki ana wakiśiñi niźaśa upa aśśiś khen t'oqhźtaćha,

¹⁹niźaśa ni Moisés lïki anapan źkayi quśśiś khisqatchićha, neqhśtan ućhumtaki ni lïkiśtan khen tshan khjusa lïchiśćhumćha, xalla nïźtan ućhumnakki Yöśkin makhatićha.

²⁰Yöśki tshi tawqźtan ti thurt'ichićha. Ni yaqhap timlu jilirinakaki anataćha tshi tawqźtan thurt'itaki,

²¹ans ni Jesús Tatźkiśtanaki tshi thurt'iś taqu źelhchićha, xalla ni Yöś śuma kintu khjirtikiśiki, tuź khićha: “Ni Yöś Tataki tshi tawqźtan thurt'ichićha, ni thurt'itikiśtan anapanź kephsnakićha: ‘Amki watay wata thurñi timlu chawkh jilirimćha.’ ”

²²Xalla niźtikiśtan Jesusaki, ni tukita tawqkiśtan tshan khjusaź palt'iźinćha.

²³Niźaśa ni tukita timlu jilirinakaki tamataćha, neqhśtan ninakź tira źetawk khen ni tikhś ninaka aqatćha;

²⁴ans ni Jesusaki ana tikhśićha, niźaśa nïź timlu jilir lanqśki anapanź jëkh źoñźkinami thatźnakićha.

²⁵Xalla niźtikiśtan Jesusaki nïź qharkiśtan ni Yöśkin makhatñi źoñinaka watay watxapaź liwriyasaćha, xalla nïki ti źoñinakźkiśtan Yöśkin watay wata qamśxapa palt'iźiñićha.

²⁶Xalla nuź ni Jesusaki ućhumnakaź pektaćha timlu chawkh jiliri irpiñićha. Xalla nïki źkayi quśśiś, ana ujchiś, niźaśa ana khjuchiraraćha, niźaśa nïki ni uj päñi źoñinakźkiśtan t'aqsićha, niźaśa nïki ti tsewkta laram pachkiśtan tshan tsewkta yoqkin uchśtaćha.

²⁷Niźaśa nïki anaćha ni yaqha timlu jilirinaka irata, ni jilirinakaki uywanaka konñitaćha niźaśa śapuru wilana thxotqatñitaćha, tuki perśun ujnakkiśtan thxotñitaćha, neqhśtan wath źoñinakź ujkiśtan thxotñitaćha. Ans Jesusaki perśunpacha tshi wiltaqaś niźaśa watay watxapa wilana thxotsićha.

²⁸Niźaśa ni Moisés lïki ni ujchiś źoñinaka ni timlu chawkh jilirinaka irpiñi uchcha; ans ni Yöś tshi taqu thurt'itaki ni lï xarutaćha, niźaśa Yöśki nïź Machh timlu jiliri uchchićha, xalla ni jiliriki watay watxapa źkayi quśśiś uchśtaćha.