Read Chipaya HEBREOS 8 Bible Online

HEBREOS 8 - Chipaya bible

HEBREOS 8

¹Ućhumnakataki tshi cheqan timlu chawkh jiliriź źelhćha, xalla ni jiliriki ni tsewkta yoqkin julśićha, xalla ni Yöś irpiś julś źewqhuttan,

²niźaśa nïki tshi timlu chawkh jiliriźtaqaś irpićha ni werar Yöś tawqkiś, xalla nïki Yöś pätaćha anaćha źoñiź pätaki.

³Thapa timlu chawkh jilirinakaki wilana niźaśa ofrendanaka thäñixapa uchśtaćha, xalla niźtikiśtan Jesucriśtuki ućhumnakkiśtan Yöśkin thäśnasaćha.

⁴Niźaśa nïki ti yoqkiś khitasaź nïki, anapan timlu jilirimi khitasaćha, xalla ti yoqkiśiki ni Moisés lïxaru wilananaka thäñi źelhćha.

⁵Xalla ti timlu jilirinakaki ni tsewkta yoq ćhhultaqinakź śiwśllaqaś thäćha, xalla nuź ni Moisesaź ni Yöś timlu qhuyawk khen Yöśki nïźkiś tuź khichićha: “Amki weriź ni chawkh kurkiś thëźta Yöś timlu iratam päkićha.”

⁶Ans ućhum timlu chawkh jiliri irpiñiki, tshan khjusa irpiś tanśićha ni Yöś śuma kintu onźta patxparu.

⁷Xalla ni tukita lïki ch'uwaź khitasaź nïki, anaź wilta palt'iś wakiśtasaćha.

⁸Yöśki ni źoñinaka ana khjusa naychićha, neqhśtan tuź khichićha: “Yöś Tataki tuź khićha: Ni thonñi thuñkiś werhki ni Israel źoñinakźtan niźaśa Judá źoñinakźtan uśhkal palt'aćha.

⁹Xalla ti palt'itaki anaź ni anćhuka achchi ephnakźtan palt'ita irata khekićha, weriź ni Egiptu yoqkiśtan anćhuk jeskitanaki; anćhukki ni wethtan palt'ita ana kumlichinćhukćha, xalla neqhśtan werhki anćhuk ekchinćha, Yöś Tataki nuź khićha.

¹⁰Werhki ni Israel źoñinakźtan palt'aćha, neqhśtan tshi qhaź thuñkiśtanaki weth lï ninakź achkiś makhźinaćha, xalla nuź khićha Yöś tataki, niźaśa ninakź quśkiśl khjiraćha. Werhki ninakź Yöśl khećha niźaśa ninakaki weth wathaź khekićha.

¹¹Neqhśtan anaź jëkhmi nïź źoñ maśi thaxnakićha, niźaśa anaź jëkhmi nïź jilźkiśimi, tuź khekićha: Yöś Tatam paxqaya khikan; ans thapa źoñinakź werh paxakićha, ni źoñinakźkiśtan okhala khiñimi chawk źoñi khiñimiź werh paxakićha.

¹²Weril ninakź uj pätanaka pertunaćha niźaśa ninakź ujnakkiśtan anal iya khuñśnaćha.”

¹³Yöś ni ew palt'itikiśtan parlićhax nïki, ni tukita palt'itaki chawkchićha khićha; xalla ni chawkchi khitaki wax qatśmayaćha.