Read Chipaya 1 PEDRO 1 Bible Online

1 PEDRO 1 - Chipaya bible

1 PEDRO 1

¹Piru Jesucriśtuź apuśtulaki ni judea wathkiśtan nakhuñ źelhñi jilanakźkin tsänźkićha, niźaśa ni Ponto yoqkiś źelhñinakźkinami niźaśa Galacia, Capadocia, Asia niźaśa Bitinkin źelhñinakami tsänźkićha,

²xalla ti wathanaka Yöś Ephki nïź amtitikiś tukipan illśtqalćha. Niźaśa nïź Espirituźtan anćhuk źkayi quśśiś khisqatchićha anćhuk ni kaśaxu niźaśa ni Jesucriśtuź lhokhźtan źkayi khexu. Neqhśtan anćhukki Yöś śuma qamaña tanźnaxu.

³Ućhumnakki Yöśkin niźaśa ućhumnaka Jesucriśtu Tatź Ephźkinź aynaqila, xalla nïki nïź añcha oqśñi quśtan ućhumnak wilta mathqatchićha, ni Jesucriśtuźtan chika jakatataxu. Xalla tïki ućhumnakakiś tshi wiñay źetiź thäćha,

⁴niźaśa ni Yöśki anćhukakiś ni tsewkta yoqkin śhoxta pataź tansqatakićha, xalla ni pataki anapan palhta khesaćha niźaśa anapanź khjuchinsnasaćha niźaśa anapanź tikhźnasaćha.

⁵Xalla ni anćhukaź Yöśkiś thapa quśtan khikan, nïź anćhuk nïź aśtan liwrïś śalaxu kuytićha, xalla nïki ni thuñi źerañikinź paxqatakićha.

⁶Xalla niźtikiśtan anćhukki kuntintućhukpanćha, niźaśa tshi qhaźtapacha t'aqhiśiś wakiśanaki ti pachkiś añcha t'aqhiśakićha.

⁷Niźaśa ni anćhuka thapa quśki tshi qoriźtaqaśśa: Xalla ni qorź waluraki ujźtan yanźta khiśtanćha. Xalla ni t'aqhiśiśnaka awantiñi thapa quśki tshi qorkiśtan tshantiź walćha, xalla ni qoriki thatnasaćha. Niźaśa ni anćhuka quśki nuź yanźta khenaki, ni Jesucriśtuź aśtan thonan iyawkhita khiś wakiśićha.

⁸Niźaśa anćhukki Jesucriśtuź pekćha qhaźta ana cherźkumi; niźaśa xaśiki ana ni cherźku kirïchinćhukćha, niźaśa anćhukki tshi chawkh chipśtanź chipćha ni chawkh aśiki ana xaqhnuź chï atchukaćha,

⁹Anćhukki anćhuka thapa quś śalćha, xalla nïki ni liwrïśa.

¹⁰Xalla ni Yöśkiśtan chïñinakaki ti liwrïskiśtan qhurchićha niźaśa purwiychićha, niźaśa Yöś anćhukakiś thäśkiśtan parlichićha.

¹¹Xalla ni Criśtuź Espirituki ni Yöśkiśtan chïñinakźkis tukitanpacha śiśqatñitaćha, xalla ni Criśtuź t'aqhiśiśkiśtan niźaśa nïź xaru chawkh aśi thonśkiśtan; neqhśtan ninakaki ninakźkiś źelhñi Espirituźtan ni thuñi niźaśa ćhhul orat wataćhaxa xalla ni śiśpekatćha.

¹²Ans Yöś ninakźkiś śiśqatchiki, niźaśa ninakaź maśintaki anataćha ninakźtaxapa, ans anćhukataxapataćha. Xaśiki ti Espíritu Santuź aśtan ni Yöś śuma kintu anćhukakiś maśintaćha, xalla ni Espirituki tsewkta yoqkiśtan kuchanźkitaćha. ¡Xalla tinakaśaqaś ni anjilanakaki śiśpekatćha!

¹³Xalla niźtikiśtan anćhukki thakśipan źela niźaśa śuma qamañchiśpanź qama. Niźaśa thappacha anćhukki, anchuka quśtan ni oqśñi Yöśkinź tasna, xalla nïki ni Jesucriśtuź thonan thäta khekićha.

¹⁴Niźaśa anćhukki tshi k'uñchi matinakaźta, anaź ima ni Yöś paxkan quś pektakama qaminćhuktaćha xalla niźta anaź qama.

¹⁵Ans anćhukki śuma źkayi qamañchiśpanź qama, xalla ni anćhuk qhawśñi Yöśki źkayićha;

¹⁶Xalla ni Yöś śuma kintu Khjirtikiśiki, tuź khićha: “Anćhukki źkayi quśśiśpanź khella, werhki źkayi quśśiśtćha.”

¹⁷Niźaśa anćhukki ni Yöś “Ephćha” khićhax nïki, ni źoñiki śapa źoñiź pätanakkiśtan ana phal phalźku juchjiptayñićha, neqhśtan anćhukki thapa anćhuka qamañkiś nïź thü aynaqśtanćha, anćhukaź źethtakama.

¹⁸Ans Yöśki anchuka achchi ephnakź tikhśilanti qamañkiśtan wathchićha; niźaśa anćhukki śumaź śiśśa, xalla ti wathźtikiśtanaki anaćha qorźtanami päśtanami niźaśa anaćha anaśum ćhhultaqinakźtanami paktaki,

¹⁹ans ni Criśtuź k'achha lhokhźtan paktaćha, xalla nïki tshi üśi wilanaźtaqaś ana ćhhul khjuchirara niźaśa ana ujchiś wilana uchśtaćha.

²⁰Niźaśa Criśtuki ima ti yoqa thulźkan tixapa uchśtapantaćha, xalla ti thuñi źerañikinaki anćhukaltaxapa thensićha.

²¹Niźaśa anćhukki Jesucriśtuź khen Yöśkin kirïćha, xalla ni Yöśki Jesusa tikhśikiśtan jakatatsqatchićha niźaśa aśi thächićha; xalla niźtikiśtan anćhukki ni Yöśkiś quś thächinćhukćha niźaśa nïźkiś tassinćhukćha.

²²Xaśiki anćhukki ni werar Yöś śuma kintu kaśku źkayi quśśiś khissinćhukćha, niźaśa ni Yöś kirïchi jilanaka cheqpachapan pekśxapa. Xalla nuź anćhukki thapa quśtan niźaśa thapa aśtan porapak pekastanćha.

²³Niźaśa anćhukki wilta mathta khissinćhukćha, ana ni tikhśñi mä ephźkiśtan, ans ni Yöś tawqkiśtan xalla ni taquki watay wata źethñipanćha.

²⁴Xalla ni Yöś śuma kintu Khjirtikiśiki, tuź khićha: “Thapa źoñiki tshi paśtuźtaqaśśa, niźaśa nïź aśiki tshi paśtu phxaqallaźtaqaśśa. Xalla ni paśtuki qhonćha, neqhśtan nïź phxaqallaki thxotssa,

²⁵ans ni Yöś śuma kintuki watay wataź thurćha.” Xalla ti taqućha anćhukakiś maśintaki.