Read Chipaya 1 PEDRO 2 Bible Online

1 PEDRO 2 - Chipaya bible

1 PEDRO 2

¹Niźaśa anćhukki ni ana śuma päś ćhhultaqkiśtanź saraqa, niźaśa ni q'otśkiśtanami, ni toskarkiśtanami, niźaśa ni moq'uśiśkiśtanami, niźaśa thapa taqu chhalanśkiśtanami.

²Niźaśa tshi uśhka mathta wawaźtaqaś ni ch'uw Espirituź lichi añcha qhura, xalla ni lichkiśtan anćhukki liwrïś tanźnasaćha,

³niźaśa anćhukki ni Yöś Tatź taqu juśtaśśinćhukźlax nïki.

⁴Niźaśa anćhukki Yöś Tatźkinź makhatiźka, xalla ni źethchiś maś ti źoñinakaki arśićha, ans Yöśkiśiki ni maśki śuma walurchiś illśtaćha.

⁵Yöśki anćhukatan niźtaśaqaś ni źethñi maśkiśtanźtaqaś päkićha, niźaśa tshi Yöś kirïchi źkay jilanakaźtaqaś, niźaśa tshi źkayi quśśiś timlu jiliriźtaqaś, xalla ninakaki Jesucriśtuźkiśtan tshi anim wilanaźtaqaś Yöś quś pektakama thäsaćha.

⁶Xalla niźtikiśtan ni Yöś śuma kintu Khjirtikiśiki tuźśaqaś khićha: “Werhki ni Sión kurkiś tshi maś nonźnućha, xalla ni maśki cheqan maśśa; niźaśa ni maśkiś tasñiki, anaź ćhhaxwta khekićha.”

⁷Niźaśa anćhukakiś Yöś kirïñinaka ni maśki añcha walurchiśśa; ans ana ni Yöś kirïchi źoñinakźkiśiki ni Khjirtaź kumlissa: “Xalla ni qhuya qhuyñi źoñinakaź arźta maśki, cheqan wakiśiñi maś khissićha.”

⁸Neqhśtan tuźśaqaś khićha: “Tshi maś aqhi, niźaśa tshi maś xalla neqhśi źoñinakaki texakićha.” Xalla ni źoñinakaki ni Yöś śuma kintu ana kaśku neqhś texćha: Xalla nïćha nïź pakaki.

⁹Ans anćhukki illśta qhuy źoñinakćhukćha, tshi Reyź manta päñi timlu jiliriźtaqaś, niźaśa tshi źkay chawkh wathaźtaqaś, niźaśa tshi Yöś thulźta wathaźtaqaś. Xalla tïki nuźupan khiśtanćha ni Yöś iśpantichukanaka maśnaxu, xalla ni Yöśki anćhuk ni sumchilaqhkiśtan ulanźkaxu qhawśićha, nïź añcha k'achha qhankiś luśhqatśxapa.

¹⁰Niźaśa anćhukki tukiki anapantaćha tshi wathami, ans anćhukki anśiki Yöś wathćhukćha; niźaśa tuki Yöśki anaź anćhuk oqźnatćha, xaśiki Yöś anćhuk oqźa.

¹¹Weth q'ay jilanaka, werhki anćhuk rokt'ućha tshi yaqha wathchiś ti yoqkiś watñi źoñiźtaqaś, anćhukki anaź ni xañchiź pektakama oqalla, xalla nïki ućhum animuźtanź qichassa.

¹²Niźaśa anćhukki ni ana Yöś kirïchi źoñinakźtan śumapanź qama. Anśiki ninakaki qhaźtamit anćhuka moq'u parlićhani, anćhuk ana śumanaka päñi źoñiźtaqaś, neqhśtan ninakaki ni anćhukaź śumanaka päta cherakićha, neqhśtan ninakaki Yöś thü aynaqakićha xalla ni thappacha juchjiptayś thuñkiśiki.

¹³Niźaśa anćhukki Yöś Tataź khen, thappacha ti yoq jilirinaka kaśa: Niźaśa ni chawkh watha irpiñiźkiśimi, xalla ni jiliriki thapa jilirinakźkiśtan tshan chawkh jilirićha,

¹⁴niźaśa nïki ni ana śuma päñi źoñinaka ni jilirinakźkiś kaśtikaxu khićha, niźaśa ni śuma päñi źoñinakźkiś śuma źoñi aynaqax khićha.

¹⁵Niźaśa Yöśki anćhuk śumanaka päñipanź pekćha, xalla ni ina quśśiś źoñinaka niźaśa sumsunaka ana anćhuka ćhhul moq'umi chiyaxu.

¹⁶Niźaśa anćhukki liwri źoñinakaźtaś qama, qhaźta ni anćhuka liwri qamaña ana waqaychiźkumi ni anaśumanaka pächinćhukćha. Ans anćhukki Yöś manta päñiźta qama.

¹⁷Niźaśa anćhukki thapa źoñinakaź rispita. Niźaśa ni Yöś kirïchi jilanaka oqźna niźaśa Yöś amta, niźaśa ni chawkh watha irpiñi jiliri rispita.

¹⁸Manta päñi źoñinaka, anćhukki anćhuk uywiñiźkiś thapa quśtan tasna, ana ni śuma näśñiźkiśqaś, ans ni ñexunakźkiśimi.

¹⁹Xalla ni kaśki Yöśta añcha walićha, tshïsuñaki ana śuma khitamiź awantićha, ninakaź Yöśkin quśśiś khen Yöśki ninaka yanapćha.

²⁰Niźaśa anćhukaź ana śuma pätikiśtan kaśtikasaź nïki, ¿anćhukaź awantitaki ćhhul anćhukata wali khesaxo? Niźaśa anćhukki śumanaka pätikiśtan t'aqhiśasaź nïki, niźaśa ni t'aqhiśiś paśinśiźtanź awantasaź nïki, xalla nïki Yöśta añcha walićha.

²¹Niźaśa Yöśki anćhuk tixapa qhawśićha, niźaśa Criśtumi anćhukakiśtanśaqaś t'aqhiśichi, nïź qamta irata anćhuk qamaxu.

²²Niźaśa Criśtuki ana ćhhul ujmi pächićha, niźaśa ana jëkhmi q'otchićha.

²³Niźaśa nïźkiś ar aran ana niźta irata ar archićha; niźaśa ni t'aqhiśsqatan ana thajwaychićha, ans nïki Yöś ninaka śuma śoq'u juchjiptayaxu thïśićha.

²⁴Niźaśa Criśtupachaź ućhum ujnaka nïź xañchikiś kuruśhkiś chhichchiki, ućhumź ujkiś atta tikhźnawk khen, neqhśtan ućhum śoq'u jikhśkiś qamaxu, niźaśa Criśtuki anćhuk ćhhetinta khexu śhoxrichtaćha.

²⁵Niźaśa anćhukki tuki tshi qatchi uśhaźtaqaś oqhlayinćhuktaćha, niźaśa anśiki Criśtuźkin kephźkichinćhukćha, xalla nïki anćhuk tshi üśi awatiriźtaqaś kuytikan ichcha.