Read Chipaya 1 PEDRO 4 Bible Online

1 PEDRO 4 - Chipaya bible

1 PEDRO 4

¹Xalla niźtikiśtan Criśtuki nïź perśun xañchikiś añcha t'aqhiśichićha, niźtaśaqaś anćhukmi ni irata t'aqhiśiśtanćha. Xalla ni perśun xañchikiś t'aqhiśichiki ni uj päśnakkiśtan saraqchićha,

²niźaśa Yöś muntakama nïź źetkiś tira qamśxapa, ans ana ni quś pektakama qamśxapa.

³Niźaśa anćhukki aźqa wata ni ana Yöś kirïchi źoñinakź ćhhultaqi irata pächinćhukćha, niźaśa anćhukki ni anaśum qamañkiś qamatćha, niźaśa ni ana śumanaka pinsikan, niźaśa ni phiśtanaka päkan, niźaśa ni likhkan, niźaśa ni źoñiź päta yöśnaka amtikan, neqhśtan anćhukki ana amaychiś likatćha.

⁴Xaśiki anćhukaź ni źoñinakź ana śum qamañkiś ana qhutźnan ni źoñinakaki añchaź anćhuk phaltachcha, neqhśtan anćhukakiśtan anaśumanakaź parlićha.

⁵Ans ni źoñinakaki ni źethñi źoñinaka niźaśa tikhśi źoñinaka juchjiptayñiźkiś, juchjiptayta khekićha.

⁶Xalla niźtikiśtanśaqaś ni tikhśi źoñinakźkiśiki ni Yöś śuma kintunaka maśintaćha, xalla ni źoñinakź animu Yöśtan tira qamaxu, ni źoñinakaki qhaźtami ti yoqkiś ninakź xañchikiś źoñinakaź juchjiptaytamiźlani.

⁷Thappacha ti ćhhultaqinakź źeranśki irantiźkićha. Xalla niźtikiśtan anćhukki naynayipanź khella, niźaśa thapa quśtanpanź mayiśa.

⁸Niźaśa thapa anćhukakiś ni oqśx źelhla, xalla ni oqśki wakchi ujnakaź pertunćha.

⁹Niźaśa anćhukki porapatź perśun qhuykiś qhawsasa, ana jëkhźxapami chuchaśkan.

¹⁰Niźaśa ni Yöś onanchiźkita śuma irpiñi jiliriźtaqaś waqaychakićha, niźaśa anćhukki śapamayni anćhukaź tanźtikiśtan xama ni yaqha jilanaka yanapakićha.

¹¹Niźaśa yaqhapa anćhukakiś chïźinanaki, anćhuka taquki Yöś taquźtaqaś khiśtanćha. Niźaśa tshïsuñaki Yöś qhuy mantat päćhax nïki, Yöś aśtanpanx päla. Niźaśa thapa anćhukaź pätanakaki Jesucriśtuź qharkiśtan tanźtax khila, xalla ni Jesucriśtuźkiś ni chawkh aśśiś qhana wakiśićha. Xalla nuźupanx khila.

¹²Weth q'ay jilanaka, anćhukki ni ujkiś thxotsku anaź llakiśha, xalla ni ujki tshi anawal tsukhchukaźtaqaśśa.

¹³Ans anćhukki ni llakiź thonan chipa, xalla nuź anćhukki Criśtu irataź t'aqhiśa, niźaśa ni Criśtuź chawkh aśi thonan chipśxapaki.

¹⁴Niźaśa Criśtuźkiśtan anćhukki ar arakiź nïki añcha walićha, xalla ni Yöś aśśiś Espirituki amtan chikapachapanćha.

¹⁵Niźaśa anćhukakiśtan tshïsuñat t'aqhuśićhax nïki, ana źoñi kontikiśtan, niźaśa ana thañi śätikiśtan, niźaśa ana wali pätikiśtan, niźaśa ana ni yaqha źoñź ćhhultaqkiś mitiśitikiśtanami.

¹⁶Ans ni źoñiki Yöś kirïtikiśtan t'aqhiśićhax nïki, ana aś wakiśićha, ans Yöś thü chhichku ni źoñiki Yöśkin amtiś wakiśićha.

¹⁷Xalla ni Yöś qhuy źoñinakź phalś thuñi irantiźkichićha. Xalla ni juchjiptayś thuñi irantiźkichiźlax nïki, ¿xaqhnuźupan ni ana Yöś śuma kintu kaśñi źoñinaka źernakixo?

¹⁸Niźaśa ni źkayi quśśiś źoñit ch'amanpan liwrïsnakiź nïki, ¿qhaźt khisnakhexo ni uj päñi źoñinaka niźaśa ni ana śumanaka päñinakaxo?

¹⁹Xalla ni Yöś quśkama t'aqhiśiñinakaki, tirapan ni śumanaka päkan qamśtanćha niźaśa ninakź animu Yöś qharkiś thïśtanćha, ni Yöś ućhumnak pächiki nïśaqaśa ni źerañiki.