Read Chipaya 2 PEDRO 2 Bible Online

2 PEDRO 2 - Chipaya bible

2 PEDRO 2

¹Niźaśa ni Israel wathkiśtan toskara Yöśkiśtan chïñi źoñinakaśaqaś źelatćha; niźtaśaqaś anćhukakiśtan toskara thaxiñi źoñinaka źelakićha. Ni źoñinakaki anćhukakiś ninakź aqñi tawqźtan niźaśa taqu kerhźku thaxnakićha, xalla nuź ninakaki ni ućhum liwrïñi Jesucriśtu Tata q'otćha; xalla tïki ni źoñinaka waxilla ujkiś thxotźnakićha.

²Niźaśa wakchi źoñinakaki ninakź anaśum qamaña apźnakićha, xalla ni źoñinakaź khen ni werar jikhśkin chhichñi tawqkiśtan ana śuma parlakićha.

³Niźaśa ninakź päś xamriś quśkiśtan ninakaki ni toskar thaxinśnakźtan anćhuk manta päqatakićha; ans ninakźtaki ni ujkiś t'aqhiśiśki ana atipchukaź thewźa, niźaśa ninakaki tukitanpacha ujchiś khitapanćha.

⁴Niźaśa Yöśki ni uj pächi anjilanaka ana pertunchićha, ans ninaka ni sumchi t'aqhiśiśkin thxotchićha niźaśa ni sumchi laqhkiś ekchićha, niźaśa jir karinźtan ćhelhta ni juchjiptayś thuñxapa śhoxtaćha.

⁵Niźaśa Yöśki ni tukita źoñinaka anapan pertunchićha, ans Yöśki ni ñexw źoñinakźkin ni chijñi mach'a kuchanźkichićha, neqhśtan Noeqaś liwrïchićha, xalla ti jilaki śuma śoq'u jikhś maśinchićha niźaśa towqu źoñinakami.

⁶Niźaśa Yöśki ni Sodoma niźaśa Gomorra chawkh wathanaka ujchiśśa khichićha, ni wathanaka qhup khiskama ujchićha, xalla ni ñexw źoñinakźta tshi yateqaś wakiśaxu.

⁷Ans Yöśki Lot liwrïchićha niźaśa ni Lotki źkayi quśśiś źoñitaćha, xalla nïźkiś ni anaśum ñexw qamañchiś źoñinakźxapa llakt'iźiñitaćha.

⁸Xalla ti źkayi quśśiś źoñiki ni źoñinakźtan chika qamñitaćha, niźaśa nïki ni źoñinakź anawali pätanaka śapuru nonśñitaćha niźaśa śapuruź cheratćha xalla niźtikiśtan añcha llakt'aśñitaćha.

⁹Niźaśa Yöś Tataki nïźkiś tassi qamñinaka ujnakkiśtan liwrïñićha, niźaśa ni ñexw źoñinaka kaśtikta ćhheliñićha ni juchjiptayś thuñikama.

¹⁰Ni Yöś Tataki ni ana śumanaka päś pekñi źoñinaka niźaśa ni Yöś jiliri iñarñinaka kaśtikakićha. Ni źoñinakaki choxru quśśiś niźaśa lisunakaćha, niźaśa ni źoñinakaki ni chawkh aśśiśnaka anaź ar arśmi jiwjatćha;

¹¹ans ni anjilanakaki qhaźta tshan aśśiśimi niźaśa aśśiś jilirimi, ni Yöś Tatź ćhhultaqinakkiśimi anaź mitiśićha, niźaśa ni chawkh aśśiśnaka ar arś niźaśa ujkiś thxotś eqhsa.

¹²Xalla ni źoñinakaki tshi uywanakaźtaqaśśa: Niźaśa ana näśñi źoñinakaćha niźaśa lulhśxapaqaś niźaśa aqśxapaqaś mathtaćha, ni źoñinakaki ninakź perśun ujkiś tikhźnakićha,

¹³niźaśa ni yaqha źoñinaka t'aqhiśsqatźku ninakaki t'aqhiśakićha. Niźaśa ninakaki śapuru añcha k'achha qamźku kuntintutqa khićha. ¡Ni źoñinaka ni phiśtikiś qhutś añcha aśićha, niźaśa ninakaki ninakź q'otś taqunakźtan juśtaśśa!

¹⁴Ni źoñinakaki tsha mätaq źon anaź ina cherźa; niźaśa ninakaki anaź uj päśkiśtan oćha. Niźaśa ninakaki ni upa quśśiś źoñinakaź tanćha; niźaśa ninakaki xamri khïkhiśxapa walxaćha; niźaśa ninakaki ñexw źoñinakapanćha.

¹⁵Niźaśa ninakaki ni śuma werar jikhśkiśtan śqhxeśkuki tshiqhutñipanź qamćha. Niźaśa ninakaki ni Balaamźkiśtan chïta taquź apźa, ni Balaamki Bosorź machhcha, xalla nïki ni ana śumanaka päqatźku päś kanqatchićha

¹⁶neqhśtan nïki nïź ujkiśtan ujźtaćha: Tsha up aśni źoñi irat tawqźtan nïźkiś chïchïnćha, niźaśa ana iya nïź quś kama oqhqatchinćha.

¹⁷Xalla ni thaxiñi źoñinakaki tshi ana qhaśśiś tujźtaqaśśa, niźaśa tshi thamiź chhichta tshiriźtaqaśśa; xalla ni źoñinakaki tshan sumchi laqhkiś watay wata źelax khitaćha.

¹⁸Niźaśa ninakaki khjusa taquźtaqaś chïñićha ans ni taqunakaki anaćha ćhhulumi, niźaśa ninakaki ni uj päśnakkiśtan ch'aman saraqchi jilanaka xañchiź quś pektakamźtan tanćha.

¹⁹Niźaśa ninakaki liwrïśxapa taqu onśñićha, niźaśa ninakpachaćha ni anawalinakź manta päñiki; niźaśa thappacha źoñinakaki ni anawali päśnakź manta päñićha.

²⁰Xalla ni ućhumnak liwrïñi Jesucriśtu Tata paxchiki, niźaśa ti yoq anaśum ćhhultaqkiśtan atipchinakami, ti źoñinakaki wiltaź ni ćhhultaqkiś thxotsnakiź nïki, ni tukita qamañkiśtan tshan anawalkiś thonakićha.

²¹Niźaśa ninakźtaki ni śoq'u jikhś anataźlan paxchukani, neqhśtan ni śoq'u jikhś paxźku niźaśa ni źkayi Yöś lï ninakźkiś thätikiśtan saraqś anapanćha waliki.

²²Ans ninakźkiś ni werara chïta kumlissićha, tuź khikan: “Ni pakuki nïź xothtikinź kephźkićha”, niźaśa na “uśhka wañti kuchki ni lhxaspikiś śunt'iźźa.”