Read Chipaya 1 JUAN 1 Bible Online

1 JUAN 1 - Chipaya bible

1 JUAN 1

¹Werhnakki anćhukakin ni qallantiśkiśtanpacha źelhñinakźkiśtan khjirźkućha, niźaśa werhnakaź nonźtanaka niźaśa werhnakaź perśun źhukźtan chertanakami. Niźaśa werhnakki cherchinpanćha niźaśa wethnaka qharźtan lanśinpanćha. Xalla nïki ni źetchiś tawqkiśtan chiyućha.

²Xalla ti źetiki maśintaćha: Niźaśa werhnakki cherchinćha neqhśtan ni taqukiśtan maśnućha, niźaśa werhnakki ni watay wata thurñi źetkiśtan maśnućha, xalla ni źetiki ni Ephźtantaćha neqhśtan ućhumnakakiś maśintaćha.

³Neqhśtan werhnakki ni werhnakaź chertanaka niźaśa werhnakaź nonźtanaka maśnućha, anćhuk wethnakatan chika khexu, xaqhnuź werhnakki ni Yöś Ephźtan niźaśa nïź Machh Jesucriśtuźtan chika khissinźlaxa xalla niźta irata.

⁴Werhnakki ti ćhhultaqinakal khjirźkućha, ućhum quśki thapa khexu.

⁵Xalla tïćha ni Jesucriśtuź wethnakakiś thaxinta taquki, neqhśtan werhnakki anćhukakiś thaxnućha: Xalla ni Yöśki qhanaćha niźaśa nïźkiśiki anaź ćhhul sumchimi źelhćha.

⁶Niźaśa ućhumnakki nïźtan chikaćhaź khićhax nïki, ni orapacha ućhumnakki ni sumchikiśśaqaś qamćhax nïki, toskaraćhumź chïćha niźaśa ućhumnakki anaź ni werar taqu waqaychićha.

⁷Ans ućhumnakki ni qhankiś qamćhax nïki, ni Yöś qhankiś qamñi irata, neqhśtan ućhumpora chika qamś źelasaćha, niźaśa nïź Machh Jesús lhokhki ućhum ujnaka axwźinćha.

⁸Niźaśa ućhumnakki ana ujchiśśa khićhax nïki perśunpachaź q'otćha, niźaśa ućhumnakakiś ni werar taqu anaź źelhćha;

⁹ans ućhumnakki ućhum ujnakaź arśhuśakiź nïki, ućhumnakki Yöś źkayi quśśiśśa khikanź tasnasaź nïki, Yöśki ućhum ujnakkiśtanź pertunasaćha niźaśa ućhum anawalinakkiśtan źhujźnasaćha.

¹⁰Niźaśa ućhumnakki ana uj pächinćha khićhax nïki, ućhumpachaź Yöś toskar źoñiźtaqaś khisqatćha, neqhśtan ućhumnakki nïź taqu ana cheqpacha tanźtaćha.