Read Chipaya APOCALIPSIS 13 Bible Online

APOCALIPSIS 13 - Chipaya bible

APOCALIPSIS 13

¹Werhmi ni chawkh qot at philkiś tshitsinćha, neqhśtan ni chawkh qotkiśtan tshi anawal uywa ulanźkiñi cherchinćha, xalla ni uywaki towqu achchiśtaćha niźaśa qhalu waxirchiśtaćha. Niźaśa śapa waxrikiś tshi pilluchiśtaćha, niźaśa ninakź achkiśiki Yöśtaxapa moq'u khjirtichiśtaćha.

²Xalla ti weriź cherta anawal uywaki tshi k'it miśhiźtaqaśtaćha, niźaśa nïz qhxochaki ni oso irata qhxochchiśtaćha, niźaśa nïź ataki liwunź ataźtaqaśtaćha. Neqhśtan ni towqu achchiś śqoraki nïźkiś nïź julś jilir aśi thächićha.

³Neqhśtan werhki ni anawal uywiź tshi acha śhoxrichta tikhśmaya cherchinćha, neqhśtan ni tikhśmaya śhoxrichtaki ćhhetintataćha; niźaśa thappacha ti źoñinakaki ni cherźku añcha iśpantichićha neqhśtan ni anawal uywa apśićha.

⁴Niźaśa ti źoñinakaki ni towqu achchiś śqora ni anawal uywiźkiś aśi thätikiśtan amtichićha tuź khikan: “¿Jëkhpan ti anawal uywa irata źelhxo, niźaśa jëkhpan ti anawal uywiźtan qichasasaxo?”

⁵Niźaśa ni anawal uywiźkiśiki Yöśtaxapa anawalinaka niźaśa chuchśnaka chïś thätaćha, neqhśtan ni anawal uywaki paqhpikqhalu piśk jïśiś irpiś jiliri thätaćha.

⁶Neqhśtan ni anawal uywaki nuź chïtakama Yöśtaxapa moq'u chïchićha, niźaśa Yöś thüxapa niźaśa Yöś thü moq'umi, niźaśa Yöś timlu qhanawitxapami niźaśa ni tsewkta yoqkin źelhñinakźxapami.

⁷Niźaśa ni anawal uywaki ni ch'uwa quśśiś źoñinakźtan kira śalax khitaćha atipañkama; niźaśa nïki thapaman saranakźkiśimi, wathanakźkiśimi, niźaśa ni thapaman taqu chïñi chawkh wathanakźkiśimi jiliri uchśtaćha.

⁸Neqhśtan thappacha ti yoqkiś qamñi źoñinakaki ni anawal uywa amtichićha, xalla ni źoñinakź thüki ni üśa wilanaźtaqaś konta źetchiś liwrukiś ti yoqa thulźtikiśtanpacha ana katoqtaćha.

⁹Niźaśa xaqhsiltaźlax khuñchiś nïkix nonźla:

¹⁰“Xalla ni tanta oqax khitaki, tantapanź oqakićha; niźaśa ni paqh kuchillźtan tikhźnax khitaki, ni paqh ar kuchilźtan kontapanź khekićha.” Xalla teqhśiź ni ch'uwa quśśiś thapa quśtan Yöś kirïchi jila kullakinaka juñsnakićha.

¹¹Neqhśtan werhki yaqha anawal uywa cherchinćha, xalla nïki ti yoqkiśtan ulanźkichićha. Niźaśa ni anawal uywaki piśk üśa irat waxirchiśtaćha, ans nïki ni towqu achchiś śqoraźtaqaś chiyatćha.

¹²Niźaśa nïki ni tukkin khiñi anawal uywiź tukkiś ni irata aśśiś jiliritaćha, niźaśa nïki ti yoq źoñinaka ni tukkin khiñi anawal uywa amtax khetćha, xalla nïki nïź tikhśmaya śhoxrichtikiśtan ćhhetintataćha.

¹³Niźaśa ni anawal uywaki paqh chimpunakaśaqaś pätćha, niźaśa nïki ni tsewkta yoqkiśtan ti yoqkiś ni źoñinakź tukkiś ujź thxotsqatźkatćha.

¹⁴Xalla ni śinalźtan ti yoqkiś qamñi źoñinaka q'otchićha ni anawal uywaź cheran, niźaśa ti źoñinaka ni anawal uywa tshi paqh kuchillźtan tikhśmaya śhoxrichtikiśtan źethchi xalla niźta irata päx khichićha.

¹⁵Niźaśa ni wiruñ thonchi anawal uywiźkiśiki, ni tuki thonchi anawal uywa irata päta źethśqatś aśi thätaćha, neqhśtan ni źoñiź päta anawal uywaki chiyax khitaćha, niźaśa ana ni amtiñi źoñinaka thappacha konqatax khekićha.

¹⁶Niźaśa nïki ni qolta khiñimi, paqhi khiñimi, źelinchiśnakami ana źelinchiśnakami, manta päñinakami niźaśa ana manta päñi źoñinakami ninakź źew qharkiś ananax ninakź aykiś tshi chimpuźtan chimpax khichićha.

¹⁷Niźaśa ana ni chimpuchiś źoñinakaki anaź qhayimi, tuyimi, atatćha, ans ni chimpita uśh ni anawal uywiź thüchiśnakaqas qhayimi niźaśa tuyimi atasaćha.

¹⁸Xalla teqhśiź ni źoñinakaź katoqtaki juñsnakićha, niźaśa ni anawal uywa qanta qana, xalla nïki źoñź qanićha. Xalla nïź qaniki tïćha: Taqchukuwatha taqchukuqhalu taqchukchiśśa.