Read Chipaya APOCALIPSIS 15 Bible Online

APOCALIPSIS 15 - Chipaya bible

APOCALIPSIS 15

¹Neqhśtan werhki ni tsewkta yoqkin tshi iśpantichuk chimpu cherchinćha: Towqu anjilanaka ni uśhka thonñi towqu konanakchiś, xalla ti konźtan ni Yöś źaxwaki źernatćha.

²Niźtaśaqaś werhki tshi putilla ujźtan t'axźta chawkh qota cherchinćha; xalla ni putill qotkiśiki ni anawal uywanakźkiśtan niźaśa ni uywa irata pätanakźkiśtan atipchinaka ni Yöś kitarchiś tshithchi źelatćha, niźaśa ninakź qanś thü chimpunakkiśtanami.

³Neqhśtan ninakaki ni Moisés Yöś manta päñiź wirsuź itsatćha, niźaśa ni Üśiź wirsu itsatćha tuź khikan: “Ni amiź päta ćhhultaqinakaki añcha paqhi iśpantichukanakaćha, niźaśa amki thapa aśśiś Yöś Tatamćha; niźaśa am jikhśnakaki werar śoq'unakapanćha, amki ni chawkh wathanakź Reyimpanćha.

⁴¿Jëkhpan ana am eqhsnasaxo? ans am alaxamćha ch'uwa quśśiśamki; niźaśa thappacha ni chawkh wathanakaki amkin thonźku am amtakićha, niźaśa ni am juchjiptayśki maśintaćha.”

⁵Xalla tinakaź wattan werhki ni tsewkta yoqkin ni Yöś timlu qhanawita khetsñi cherchinćha, xalla nïki ni palt'ita taqutaćha.

⁶Neqhśtan ni timlu qhanawitkiśtan towqu anjilanaka ni towqu konanakchiś ulanźkichićha. Xalla ti anjilanakaki tshi jilawalurchiś źkayi niźaśa llijñi śkiti kuthchinakataćha, niźaśa ninakaki ninakź tuśhiź neqhśi tshi qor tshaychiśkamataćha.

⁷Neqhśtan tshïsuña ni paqhpik źethñi źoñinakźkiśtan śapa anjilźkiś tshi qor tasakama ni Yöś źaxwa śhijpi thächićha, xalla ni Yöśki watay wata źethñipanćha.

⁸Neqhśtan ni timlu qhanawitaki ni źqetiźtan śhipsićha, niźaśa nïź chawkh aś qhanźtanami; neqhśtan anaź jëkhmi ni timlu qhanawita luśhi atatćha ni towqu anjilanakź towku konanaka watśkama.