Read Chipaya APOCALIPSIS 18 Bible Online

APOCALIPSIS 18 - Chipaya bible

APOCALIPSIS 18

¹Xalla neqhśtan werhki ni tsewkta yoqkiśtan yaqha anjila śhujźkiñi cherchinćha, xalla ni anjilaki jilir achchiśtaćha; neqhśtan ti yoqaki thappacha nïź qhanźtan qhana khissićha.

²Niźaśa ni anjilaki thapa aśtan tuź khikan qhawatćha: “¡Xalla ni Babilonia wathaki waxa eśśićha, waxa eśśićha! ¡Niźaśa ni wathaki ni yenqhanakź qamaña khissićha, niźaśa thapaman yeqhanakź śhoxś qhuya khissićha, niźaśa thapaman anaśum weźlanakź thura khissićha niźaśa ni ñexw k'it uywanakź thxaśmi!

³Niźaśa thappacha ni chawkh wathanakaki näźa iź iś winuźtan likhchićha; niźaśa ti yoqkiś irpiñi jilirinakaki na źonatan iź iśśićha, niźaśa ti yoqkiś tuyśnakchiś źoñinakami na źon amtiñiź khen añcha źelinchiś khissićha.”

⁴Neqhśtan werhki tshïźtan ni tsewkta yoqkiśtan chïźkiñi nonśinćha: “Anćhuk wethta khiñi jila kullakinaka ni chawkh wathkiśtanź ulnalla, ana ninakź uj päśnakkiś mitiśxapa, niźaśa ninakź llakimi ana anćhukakiś wataxu;

⁵niźaśa ninakź uj pätanakaki ni tsewkta yoqa iranta tawqissićha, neqhśtan Yöśki ninakź uj pätanaka śiśśićha.

⁶niźaśa na źonaź yaqha źoñźkiś thätaki niźtapacha näkiś thepna; niźaśa na źonaź pätikiśtan tshi nuźtan phxoqa; niźaśa ni awarinti piśk nuźtanź t'axźina, na źonaź yaqhiźkiś t'axźintikiśtan;

⁷niźaśa anćhukki na źonakiś llakiśhiś niźaśa t'aqhiśiś thä, niźaśa na źon mita quśśiś ana näśku kaśtitikiśtan. Xalla na źonki näźa quśkiś tuź khićha: ‘Xalla teqhśi werhki tsha irpiñi jiliriźtaqal julśi źelućha. Werhki anaćha źewt niźaśa anal t'aqhiśasaćha.’

⁸Xalla niźtikiśtan na źona llakiki tshi nöxqaź thonakićha: Ni tikhśmi, llakimi, niźaśa ni ćhher mach'ami, neqhśtan na źonki ujkiś ujźtal khekićha; xalla ni Yöś Tataki walxa aśśiśśa, niźaśa nïćha na źon ujchiśpan khichiki.”

⁹Xalla ti yoqkiś na źonatan iź iźku irpiñi jilirinakaki, niźaśa ni inaru kaśtichinakami, qäkićha niźaśa näkiś uj tantikiśtanź llakiśhakićha.

¹⁰Neqhśtan ninakaki näźa kaśtiku cherźku aźkinź khisnakićha, niźaśa ninakaki tuź khekićha: “¡Aywira, am Babilonia chawkh wathaki, niźaśa ni aśśiś chawkh wathami! xalla ni am kaśtikuki ana pinsan thonchićha.”

¹¹Niźaśa ti yoqkiś tuyśiśnakami qäkićha, niźaśa ninakaki ni chawkh wathkiśtan llakt'iźinakićha, neqhśtan ninakź tuyśnaka anaź jëkhmi qhayñi źelakićha:

¹²Ninakźtaki qorinakataćha, päśnaka, k'achha maśnaka, champinaka, jila walurchiś pañunaka, niźaśa ni śhapilanakami, niźaśa thapaman tiñinaka niźaśa lhokhmi, niźaśa thapaman śuma samañchiś maśunakami, niźaśa ni marfil ćhhultaqinakami, niźaśa k'achha maśunakkiśtanami, niźaśa jirunakkiśtanami, niźaśa ni marmolkiśtanami;

¹³niźaśa ni kanel quźimi, niźaśa ni k'achha samañanakami, inśinśumi, k'achha samañami, winumi, jiñchi khewami, jak'umi, tirikumi, niźaśa ni quźñi uywanakami, üśanakami, kawallunakami, awtunakami, niźaśa ni źoñź manta päñi źoñinakami, xalla tinakaki źoñ źetchiśnakaćha.

¹⁴Neqhśtan ninakaki ni chawkh wathkiś tuź khekićha: “¡Amki ana ni maśq'i ćhherchiśamćha xalla ti maśq'aki añcha pekñamtala; niźaśa ammi watay watxapa ni am k'achha źelinśnaka apt'ichamćha!”

¹⁵Niźaśa xalla ni ćhhultaqinakźtan niwuśhyu päñinakaki ni chawkh wathaź khen źelinchiś khissićha, neqhśtan ninakaki ni kaśtiktikiśtan qäkan niźaśa llakt'aśkan aźkinź khisnakićha,

¹⁶niźaśa ninakaki tuź khekićha: “¡Aywira ni chawkh watha! Xalla ni wathaki jila walurchiś śkiti kuthchitaćha, niźaśa chupika, lhokh tiñta śkitchiśtaćha, xalla ninakaki ni qorźtan t'ikhachtataćha, niźaśa ni champinakźtanmi, niźaśa ni k'achha maśnakźtanami.

¹⁷¡Neqhśtan ana pinsanqaś ti muspa źelinśnaka qatchićha!” Niźaśa thappacha ni walsa chhichñi kapitananakaki, niźaśa ni chawkh qot ata oqhñinakami, niźaśa ni chawkh qotkiś luśhiñinakami, niźaśa ni chawkh qotkiś lanqźku qamñinakami, aźkin eklichićha

¹⁸neqhśtan ninakaki ni chawkh watha tantikiśtan qhawchićha: “¿Xaqhsilta chawkh wathat ti chawkh watha irata khesaxo?”

¹⁹Neqhśtan ninakaki ninakź achkiś qäkan, llakt'iźinkan, qhawkan philźtan thatśićha: “¡Aywira ni chawkh watha! Xalla ni chawkh wath źelinśnakźtan muspa źelinchiś khissićha, thappacha ni chawkh qotkiś walsichiś źoñinakaki. ¡Neqhśtan ana pinsanqaś t'eśinta khissićha!”

²⁰Tsewkta yoqa amki ti chawkh wathaź khen chipźnalla; niźaśa anćhuk ch'uwa quśśiś jila kullakinaka chipźnalla, niźaśa ni apuśtulanakami niźaśa ni Yöśkiśtan chïñinakami, ans ni Yöśki ninaka juchjiptaykuki anćhuk juchjiptayta khisqatchićha.

²¹Neqhśtan tshi walxa aśśiś anjilaki tshi maś waytichićha, xalla nïki tshi paqh thax maśtaqaśtaćha, neqhśtan ni chawkh qotkiś thxotkan tuź khichićha: “Am Babilonia chawkh wathamki tiźta iratam thxotta khekićha, niźaśa ti źoñinakaki anaź iya am cherakićha.

²²Niźaśa ni am kallkiśtanaki anaź iya nonźnakićha, niźaśa ana ni am kitar wirsumi, niźaśa ana ni chut wirsumi, ana ni tothinakź xorami, niźaśa amkiśiki anaź iya lanqśñi źoñinaka źelakićha, niźaśa amkiśiki anaź iya ni thax maś xorami nonźta khekićha.

²³Niźaśa amkiśiki anaź iya ni mich qhanaki qhanakićha, niźaśa amkiśiki anaź iya ni phiśta päñi xoraki nonźta khekićha. Xalla ni am tuyś xoxoñinakataćha ti yoqkiś aśśiśki, niźaśa amki thappacha ti chawkh wathanaka ni layqiźku q'otchamćha.”

²⁴Xalla ni chawkh wathkiśiki ni Yöśkiśtan chïñinakź lhokh niźaśa ni ch'uwa quśśiś jila kullakinakź lhokhź wathźtaki, niźaśa thappacha ti yoqkiś kontanakami.