Read Chipaya APOCALIPSIS 2 Bible Online

APOCALIPSIS 2 - Chipaya bible

APOCALIPSIS 2

¹“Amki ni Éfeso Yöś kirïchi qhuy jilanakź anjilźkin khjira: ‘Xalla ni źew qharkiś towqu warawarchiśki tuź khićha, niźaśa nïki ni towqu qor micha thëśkiś oqhlayñiki:

²Weril amiź ćhhulu pätanakami śiśućha; niźaśa werhki am chawkh oćha lanqśmi niźaśa amiź paśinśa apaśtami śiśućha, niźaśa amki anam ni anawalinaka awantasaćha, niźaśa amki ni apuśtula khïkhiñi źoñinaka yanśamćha niźaśa ninakaki anapanćha, neqhśtan amki ninaka toskara tanchamćha.

³Niźaśa amki weriź khen añcha paśinśiźtan t'aqhiśichamćha, niźaśa weth thü layku ana oćha nayźku śuma oqśñi quśtan lanqśamćha.

⁴Ans wethtaki amtaxapa tshi anawali źelhćha: Amki amiź qallantitikiśtan ana niźta irata oqśñi quśśiśamćha.

⁵Xalla niźtikiśtan amki khuñśna, amki tuki ćhhuluź chechi źoñimtata, niźaśa Yöśkin qhutźna niźaśa ni qallantikin pätanaka irata pä. Ans amki anam nuź päkiź nïki, werhki amkin thonźku ni am micha thëśkiś nonźta micha thëśl qhañaćha amim ana Yöśkin qhutźnakiź nïki.

⁶Ans amtaki tïź źelhćha, amki ni Nicolaitaź pätanakam iñarćha, niźtaśaqaś werhmi ni ćhhultaqinaka iñarućha.

⁷¡Niźaśa ni khuñchiśnakaki ni Yöś Espíritu ni Yöś kirïchi qhuyanakźkin chïtax nonźla! Niźaśa werhki ni atipñi źoñinakźkiś ni źetchiś muntikiśtanl luli thäćha, xalla ni muntiki ni Yöś añcha k'achha yoqkiśśa.’

⁸“Amki ni Esmirna Yöś kirïchi qhuy jilanakź anjilźkin khjira: ‘Xalla ni qallantiñiki niźaśa ni źerśñiki, niźaśa tikhśikiśtan źetchiś khissiki tuź khićha:

⁹Werhki am t'aqhiśiś niźaśa ni am t'aqhir qamaña śiśućha, ans amki cheqpachaki muspa źelinchiśśamćha. Niźaśa ni judiu źoñinaktćha khikan chuchñi źoñinakaki anapanćha nuźuki, ans ninakaki Saxriź akhs qhuyaćha.

¹⁰Niźaśa amki ni am t'aqhiśiśkiśtan ana eqhsnakićha, ni Saxraki anćhukakiśtan tshi qhaźultan karsilkiś makakićha, niźaśa thappacha anćhuk yanźta khexuki qhalu thuñi t'aqhiśiśtanćha. Niźaśa amki tikhśañkama thapa quśtan thurt'ichipan khella, neqhśtan werhki amkiś tshi onanśtaqaś źetil thäćha.

¹¹¡Niźaśa ni khuñchiśnakaki ni Yöś Espíritu ni Yöś kirïchi qhuyanakźkin chïtax nonźla! Xalla ni atipñi jilanakaki anax ćhhul llakinakami watla niźaśa ana wilta tikhśkiśimi.’

¹²“Amki ni Pérgamo Yöś kirïchi qhuy jilanakź anjilźkin khjira: ‘Xalla ti ni porapkin archiś paqh kuchillchiś khićha:

¹³Werhki am qamañal śiśućha, amki ni Saxriź cheqan qamañkiśim qamćha; niźaśa amki weriź khen thapa quśtanam werh apźa. Neqhśtan amki weth thapa ana anaź khichamćha, niźaśa ana Antipas thuñikiśimi, ni Antipaski weth cheqpacha cherñi źoñićha, niźaśa Antipaski ni Saxriź qamś chawkh wathkiś kontaćha.

¹⁴Niźaśa wethtaki tshi qoluk amta anawali chïśxapa źelhćha: Amki ni am qhuykiś ni Balaamź thaxinśnakkiśtan ana saraqiś pekñi jilanakchiśamćha, niźaśa ninakaki ni Balacźkiś thaxinćha ni Israelź matinakźkiś aqacha thaxnaxu, xalla źoñiź päta yöśnakkiś thxotta wilananaka lulaxu niźaśa iźiwiri khiśxapa.

¹⁵Niźaśa ninakźkiśtanaki ni Nicolaitas thaxintanakźkiśtan ana saraqś pekñi źoñinaka źelhćha.

¹⁶Amki xalla niźtikiśtan Yöśkin qhutźna; anam Yöśkin qhutźnakiź nïki, werhki waxillal amkin oqaćha neqhśtan weth atkiśtan paqh kuchillu ulañiźtan ni źoñinakźtan qichasaćha.

¹⁷¡Niźaśa ni khuñchiśnakaki ni Yöś Espíritu ni Yöś kirïchi qhuyanakźkin chïtax nonźla! Werhki xalla ni atipñi jilanakźkiś ni śhoxta źelhñi manakiśtan lulhqataćha; niźtaśaqaś ninakźkiś tshi chiw maśl thäćha, xalla ni maśkiśiki tshi ew ana śiśta thü khjirtaćha xalla nïki anaź jëkhmi paxćha, ans ni tanśñi źoñiqaś śiśśa.’

¹⁸“Amki ni Tiatira Yöś kirïchi qhuy jilanakź anjilźkin khjira: ‘Xalla ni Yöś Matiki, niźaśa ni uj asñi źhukchiśtaqaś niźaśa chur jiru thaqinta qhxochchiśiki tuź khićha:

¹⁹Werhki amiź ćhhulu pätami śiśućha; niźaśa amiź oqźtami, am thapa quśmi, niźaśa amiź pätanami niźaśa am paśinśichiś quśmi, niźaśa anśi amki ni qallantitikiśtan tshant śumanakam päćha.

²⁰Ans wethtaki anćhuk tshi qoluk ujś źelhćha: Anćhukki na Jezabel źon Yöśkiśtan chïnćha khikan ni werh kirïñi jilanakźkiś thaxinta awantićha niźaśa na źonkil q'otćha, ni iź iśnakkiś niźaśa ni źoñiź päta yöśkiś thxotta wilan ćhherinaka lulaxu.

²¹Niźaśa werhki na źon Yöśkin qhutźnaxu tshi pacha thächinćha, ans na źonki anapan näźa ujkiśtan arśhuśśinćha niźaśa ana näźa iź iśkiśtanami.

²²Neqhśtan werhki na źon aphśkiś thxotaćha, niźaśa na źonatan chika iź iźñi źoñinakaki anawal t'aqhiśiśkiś thonakićha, ana näźa päta ujnakkiśtan arśhuśakiź nïki.

²³Niźaśa näźa matinakźkiśiki konśtanl śhoxrichaćha, neqhśtan thappacha ni Yöś kirïchi qhuy jilanakaki śiśakićha werhtćha źoñź acha śqepintki niźaśa źoñź quśmi; neqhśtan werhki śapamayniźkiś anćhukaź pätakamal thäćha.

²⁴Ans anćhukakiś, niźaśa ni Tiatir wathkiś źelhñi jilanakźkiśimi chïś pekućha, anćhukki anapan ni thaxintanaka śiśśinćhukćha, niźaśa anćhukki ninakaź Saxiź xamaśit thüsqatta anapan paxchinćhukćha, neqhśtan tuź chïkuki anćhukakiś anal wilta llaki thäwućha.

²⁵Ans anćhukki anćhukaź śiśtanaka weth thonśkama śhoxwakićha.

²⁶Xalla neqhśtan atipñi źoñinakaki niźaśa weth taqunaka ni thuñi źeranśkama śhoxñi źoñźkiśikiśimi, thapa ti chawkh wathanaka irpiś jiliril thäćha,

²⁷xalla ni jilirinakaki jir lantiźtanź irpakićha, neqhśtan ni uj päñi źoñinakaki tshi lhok maśkaźtaqaś qholźta khekićha; werhki niźtaśaqaś weth Ephźkiśtan tanśinćha;

²⁸niźaśa werhki ni qhantat chawk warawaral thäćha.

²⁹¡Xalla ni khuñchiśnakaki ni Yöś Espíritu ni Yöś kirïchi qhuyanakźkin chïtax nonźla!’