Read Chipaya APOCALIPSIS 5 Bible Online

APOCALIPSIS 5 - Chipaya bible

APOCALIPSIS 5

¹Werhki ni chawkh julśkiś julśi źelhñi źoñź źew qharkiś tshi thüźta śqiś kë tukqhuttanam, wirqhuttanami khjirta cherchinćha, xalla ni thüźta śqiś këki towqu teqś chimpuźtan chimpitataćha.

²Neqhśtan werhki tshi chawkh aśśiś anjila kalaru xorźtan pewkśñi cherchinćha: “¿Jëkhpan ti thüźta śqiś kë khetźnasaxo uśh jerhźnasaya?”

³Niźaśa anapan jëkhmi ni tsewkta yoqkiś źelhñinakami, ti yoqkiś źelhñi źoñinakami, ti yoq qos źelhñinakami anapan ni thüźta śqiś kë jerhśñi atasaćha niźaśa anaź cherñimi atasaćha.

⁴Xalla niźtikiśtan werhki añcha qächinćha, ana jëkh źkayi quśśiś źoñi ni thüźta śqiśi jerhśñi niźaśa lïñi źelhtikiśtan.

⁵Ans ni qamchi ephnakźkiśtan tshïsuñaki wethkiś tuź khichićha: “Amki ana iya qä, xalla ni Judá t'aq liwunźkiśtan, niźaśa ni Davidź śep'ikiśtan oqhñiki ni thüźta śqiśi jerhśxapa atipchićha niźaśa nïź towqu teqźta chimpunaka khetśxapami.”

⁶Neqhśtan werhki ni chawkh julś taypikiś niźaśa ni paqhpik źetchiś źoñinakź taypikiś, niźaśa ni piśkqhalu paqhpikchiś qamchi ephnakź taypikiś tshi wilana thxotta üśa tshithchi cherchinćha, xalla ni üśaki towqu waxirchiśtaćha, niźaśa towqu źhukinakchiśtaćha, xalla ninakaki Yöś towqu Espiritunakataćha, niźaśa ni Espiritunakaki ti yoqkiś thapaqhutñi kuchantaćha.

⁷Neqhśtan ni üśaki thonźku ni chawkh julśkiś julśi źoñź źew qharkiś tanźta thüźta śqiśi tanśićha;

⁸neqhśtan ni thüźta śqiśi tanźtan, ni paqhpik źethñi źoñinakaki niźaśa ni piśkqhalu paqhpikchiś qamchi ephnakami ni üśiź tukkiś killśićha. Thappacha ninakaki arpichiśkamataćha, niźaśa ninakaki qor taskiś inśiñśu śhipichtaćha, xalla ni iñśiñśunakaki ni źkayi quśśiś źoñinakaź mayiśitanakataćha.

⁹Niźaśa ti ew wirsuź itsatćha: “Amćha źkayi quśśiśamki ni thüźta śqiśi tanśxapaki, niźaśa nïź teqźta chimpita jerhśxapami, niźaśa amki wilanaźtaqaś thxottamtaćha; neqhśtan am lhokh thawqźku, amki thapaman źoñinaka Yöśtaxapa śhikchamćha, niźaśa thapaman tawqchiś niźaśa thapaman chawkh wathchiś źoñinakami.

¹⁰Amki ni źoñinakźkiśtan ućhum Yöśta irpiñi jilirinaka timlu jilirinaka pächamćha, neqhśtan ninakaki ti yoqkiś irpakićha.”

¹¹Neqhśtan werhki cherśinćha, ni chawkh julś muytata tama anjilanakź xora nonśintćha, niźaśa ni źethñi źoñinakź xorami niźaśa ni piśkqhalu paqhpikchiś qamchi ephnakź xorami. Xalla ni anjilanakaki chawkh wathay, chawkh wathataćha,

¹²ninakaki thapa aśtan tuź khetćha: “¡Xalla ni wilana thxotta üśaki aśi niźaśa ni źelinś tanś wakiśićha, niźaśa ni śiśnakami niźaśa ni chawkh aśimi, niźaśa ni śuma źoñi khitami, niźaśa ni chawkh qhanami niźaśa ni thapa tiźtan palt'iśmi wakiśićha!”

¹³Niźaśa werhki nonśinśaqaśśa, thappacha ni tsewkta yoqkin Yöś päta ćhhultaqinakami, niźaśa ti yoqkiś päta ćhhultaqinakami niźaśa ti yoq qos päta ćhhultaqimi niźaśa ni chawkh qotkiś päta ćhhultaqinakami tuź khetćha: “¡Xalla ni chawkh julśkiś julśimi niźaśa ni üśami wirsunakźta aynaqtax khila, niźaśa śuma źoñinaka khitax khila, niźaśa ninakaź chawkh qhan aśiki thapa watay watax thurla!”

¹⁴Niźaśa ni paqhpik źetchiś źoñinakaki tuź qhäśnatćha: “¡Xalla nuźox khila!” Niźaśa ni piśkqhalu paqhpikchiś qamchi ephnakaki ni watay wata źethñiź tukkiś killśku amtichićha.