Read Chipaya APOCALIPSIS 9 Bible Online

APOCALIPSIS 9 - Chipaya bible

APOCALIPSIS 9

¹Neqhśtan ni taxśnukukiś khiñi anjilaki nïź tothi thawśićha, neqhśtan werhki ni tsewkta yoqkiśtan tshi warawara thxotskiñi cherchinćha; xalla ni warawarźkiśiki ni tuj phet llawi thätaćha.

²Neqhśtan ni tujki khetsićha, niźaśa ni tujkiśtanaki tshi anawal tshoqchi źqeti ulanchićha tshi paqh jurnukiśtanźtaqaś; neqhśtan ni tuj źqetiki ni thuñi sumqatchićha niźaśa ti kerami.

³Niźaśa ni źqetkiśtanaki ti yoqkiś śher śherñinaka ulanźkichićha; neqhśtan ni śher śherñinakźkiśiki aśi thätaćha ni lleq'achunkaźtaqaś aśśiś.

⁴Neqhśtan ninakaki ana ti yoq ch'oxñi paśtunaka niźaśa ana ni ch'oxñi muntimi śhoxrichax khitaćha, ans ninakaki Yöś chimpu aykiś ana chimpuchiś źoñinakaqaś śhorichax khitaćha.

⁵Niźaśa ninakaki ti źoñinaka ana konax khitaćha, ans ni źoñinaka anawal konźtan taxśnuku jïś aśinsqatax khitaćha; xalla ni konaki tshi lleq'achunkaź ćh'attaźtaqaś khekićha.

⁶Neqhśtan xalla ni thuñiran ni źoñinakaki tikhś qhurakićha, ans anapanź tikhśuka khekićha; niźaśa ni źoñinakaki tikhś pekakićha ans ni tikhśti ninakźkiśtan aźkin oqakićha.

⁷Xalla ni śher śherñinakaki tshi kirxapa thakśta kawallunakaźtaqaśtaćha; niźaśa ninakź achkiśiki tshi qor pilluchśtaqaśtaćha, niźaśa ninakź yukhki źoñź yukh iratataćha.

⁸Niźaśa ninakź charaki mätaqź charaźtaqaśtaćha, niźaśa ninakź iźqimi ni liwunź iźqiźtaqaśtaćha.

⁹Niźaśa ninakź xañchiki tshi jir qhxapchiśtaćha; niźaśa ninakź qharaki wakchi awtuź xoraźtaqaśtaćha, ni kawallunaka tshi kirkiś luśhas xalla niźta iratataćha.

¹⁰Niźaśa ninakź khurśki ni lleq'achunkiź khurś archiśla khiñi niźta irata archiśtaćha, neqhśtan ninakaki ninakź khurśkiś ni źoñinaka taxśuku jïś śhoxrich aśśiśtaćha.

¹¹Xalla ni śher śherñinakź irpiñi jiliriki ni tuj phet anjilataćha, xalla ni hebreo tawqkiśtanaki Abadón khitataćha niźaśa ni griego tawqkiśtanaki Apolión khitataćha.

¹²Neqhśtan ni tukkin khiñi t'aqhiśiśnakaki watchićha, ans piśk t'aqhiśiśnakaź thonćha.

¹³Neqhśtan taqchukukiś khiñi anjilaki nïź tothi thawśićha, neqhśtan werhki ni qor paqhpik waxrichiś altarkiśtan tshi xora nonśinćha, xalla ni altaraki Yöś tukkiśtaćha.

¹⁴Xalla ni xoraki ni taqchuku anjilźkiś tuź khichićha: “Amki ni Éufrates khita chawkh pujkiśtan paqhpik anjilanaka ćhelhta źelhćha xalla ninaka jerhźna.”

¹⁵Neqhśtan ni paqhpik anjilanakaki kuchśtataćha, ni chhephkiś khiñi t'aqa źoñinaka konśxapa, xalla ni anjilanakaki ni orxapa, ni thuñxapa, ni jïśxapa, niźaśa ni watxapapan thakśtataćha.

¹⁶Neqhśtan werhki ni kawallchiś śultatunaka piśk chawkh watha qanta nonśinćha.

¹⁷Xalla nuź werhki qhanan ni kawallchiś śultatunaka cherchinćha, xalla ni kawallkiś yawchi źoñinakaki ninakź xañchiki lhokh niźaśa tshi ujźtaqaś qhxapźtan śhoxchitaćha, niźaśa ni zafiruźtaqaś, niźaśa ni azufriźtaqaśtaćha. Niźaśa ni kawallunakź achaki liwunź achaźtaqaśtaćha, niźaśa ninakź atkiśtanaki ujźtan azufriźtan t'axsi źqetiź ulnatćha.

¹⁸Neqhśtan chhephkiś khiñi źoñinakaki tikhśićha, ni kawallkiśtan chheph kona ulanchićha xalla ninakaki tinakataćha: Uj, źqeti niźaśa azufre, xalla ti chheph konkiś ni źoñinakaki tikhśićha.

¹⁹Xalla ni kawallunakź aśiki ninakź atkiśtaćha niźaśa ninakź khurśkiśimi; niźaśa ninakź khurśki śqoraźtaqaśtaćha, niźaśa ninakaki ninakź achśtan śhoxrichatćha.

²⁰Xalla ti konkiś ana tikhśi źoñinakaki, ninakź qharźtan päta ujnakkiśtan anapan arśićha, niźaśa ninakaki ni yenqhanaka amtiś anapan thatśićha, ana ni źoñiź päta qor yöśnakami, ana ni päśkiśtan pätanakami, ana ni chur jirkiśtan pätami, ana ni maśkiśtan pätami, ana ni qiñwikiśtan pätami, xalla ninakaki anaćha nonśñi niźaśa anaćha oqhlayñi.

²¹Niźaśa ninakaki anapan źoñi konś ekchićha, ana ni źoñinaka layqiśmi, niźaśa ni iź iśnakami thañi śäśnakami anapan ekchićha.