Read Chiquitano MATEO 14 Bible Online

MATEO 14 - Chiquitano bible

MATEO 14

¹Au axɨmanio naneneka tɨkañe, axti Herodes, yɨriabuxti au axɨmanu kɨx Galilea, ipiatenti nɨrixhti Jesús,

²nanti ɨmo axɨmanuma ikumanakataxti: “Axti maniki tyonenti Kuan Bautixhta, sɨborikoti tato. Sane naukiche ane nɨriakaxti asamuti axɨba champɨ tu bastai.”

³Yakɨpukuxti Herodes tɨkañe nauki aiñenomati Kuan nauki aiñamanamatipo. Isamutenti sane auki naka Herodías nikɨpostoti Filipo naki yarukityoxtiatoe,

⁴ityopiki axti Kuan nanti tɨkañe ɨmoti Herodes: “Chuxiampɨ aikiata asiukɨ takana nakɨposɨ.”

⁵Axti Herodes, xhanxtipɨ aityabairoti Kuan, aɨbu nixhukuxti ñɨnana makiataka, ityopiki namanaiña ikokotama axti Kuan profetati.

⁶Axɨmanu nanenes tɨkañe nesaxti cumpleaño Herodes, axɨmanu nicheche Herodías atɨrai atoko sukarɨ axɨmanuma tasuruma, axɨmanu nityokokox uxiampae au niñakionkoxti Herodes

⁷auki nanti ɨmo au nɨrixhti Tupax ta ityoximiatati ɨmo axtɨ ane isane mankio pɨnanakiti.

⁸Tyone kaɨma, ununekana ui nipiapax, nantɨ ɨmoti Herodes: — Aityoximia iñemo nityanu Kuan Bautixhta au taman kuxabix.

⁹Auki axti yɨriabux Herodes taruku nisuchekixhti. Tyopiki tɨnanti au nɨrixhti Tupax isukarɨ namanaiña axɨmanuma amonkoma ichepeti, auki bakɨpuruti nauki atoxi ɨmo.

¹⁰Isiukai bakɨpuruti, nauki, aityɨsɨnama nityanuxti Kuan kauta anankati amanatipo.

¹¹Auki sɨromatɨ aɨbu nityanuxti au taman kuxabixh aityoximiama ɨmo axɨmanu kupikixh, uixh aityoximia ɨmo nipiapax.

¹²Iñataimia axɨmanuma amonkoma isiuti Kuan, sɨrotɨ uimia nikɨtɨpɨxti aiñama kɨtu. Auki sɨromatɨ uraboimia sukarɨti Jesús.

¹³Naukiche tɨtusiu ɨmoti Jesús, sɨrotitɨ aukimanu kunauntañati, au taman canoa, axɨna kauta kɨcheka. Tapɨ makiataka tusinaunku ɨmoma sɨromatɨ auki nanaiña axɨmanio tube isiuti auki akɨ.

¹⁴Naukiche tɨsɨroti akɨ Jesús auki axɨmanu canoa, asaratitɨ ɨmoma taruku nububikixhimia. Taruku nipukɨruxti tyakuma uxiankama tato uiti axɨbama maunxokono axɨpekuma.

¹⁵Naukiche aɨbapae ɨtobi, axɨmanuma nesaxti apóstoles sɨromatɨ esati namatɨ ɨmoti: — Chauki tɨtɨmɨmɨkapae, auna champɨ sɨborikixh. Aikɨpusuma tato, nauki aɨromatɨ ubau poka apachema utuburiboma.

¹⁶Aiñumuti Jesús nuraxɨma: — Champɨ nɨmoche aɨromatɨ tato, axaño apasapasama.

¹⁷Axɨma aiñumuma nuraxti: — Champɨ soboi auna akasiatai cinco pan yochepe tox nopiokoka.

¹⁸Nanti Jesús ɨmoma: — Apikiasio tauna iñemo.

¹⁹Nanti ɨmo namanaiña nauki atɨmoma onɨ naxchopɨro. Auki aikianiontiño mekuti axɨmanio cinco pan yochepe axɨmanio tox nopiokoka, asaratitɨ ape, machampienkanati bochepesɨro uiti axɨmanio pan, toxio uiti ɨmo axɨmanuma nesaxti apóstoles uimia aityoximiama ɨmo namanaiña.

²⁰Namanaiña basoma iñatai nuxia ɨmoma. Ityakɨmanaunkutama nanaiña axɨmanio yochepesɨtuka, ubataso oboi doce nokonoka.

²¹Axɨmanuma basoma cinco mil mañoñɨnka nububikixhimia, chɨmupakɨmunkunupɨ paɨka ichepe masiomanka.

²²Auki bakɨpuruti Jesús ɨmo axɨmanuma nesaxti apóstoles aɨromapo au taman canoa, nauki akusɨrɨma aityompɨkama axɨmanu narubaityu tux pɨnanakiti, tapɨti bakɨpuruti tato ɨmo axɨmanuma amonkoma esati.

²³Naukiche tɨsɨromatɨ tato, sɨrotitɨ Jesús onɨ taman yirityux nauki eanti tamanti. Naukiche tɨtobikia, anankati akamanu tamanti,

²⁴tapɨ axɨmanu canoa tɨtane iche pɨnanaki nabeux. Axɨmanu tux ikiamperɨ supiuru au axɨmanu canoa, ityopiki makiɨtɨka kɨmenuma.

²⁵Naukiche tɨkuatɨ nanenes, axti Jesús sɨrotitɨ kɨmenuma amenkoti isuki tux.

²⁶Axɨmanuma nesaxti apóstoles naukiche asaramatɨ kɨmenuti kuatati isuki tux, kɨtobɨsoma, tosibikoma ui nixhukuxɨma: — ¡Axti yausɨpɨx!

²⁷Tapɨti Jesús manityanati ɨmoma, nanti sane: — ¡Akamanatai! ¡Unka axɨñɨ: tapɨ aupixhuka!

²⁸Auki aiñumuti Peru nuraxti: — Yɨriabux, axtɨ ñemanauntu axɨkɨ, akɨpu yɨrotɨ tanu akɨmenukɨ onɨki tux.

²⁹— Ariaku — nanti Jesús. Auki axti Peru tobɨsoti auki canoa amenti isuki tux niyɨkɨxti kɨmenuti Jesús.

³⁰Naukiche onkisioti nikusɨu makiɨtɨx, bixhubuti. Auki tɨniyɨkɨxti ubakati, tosibikoti: — ¡Asasatɨ chakuñɨ, Yɨriabux!

³¹Isiukai, iñentati Jesús ne'esti nanti ɨmoti: — ¡Chimiampae axɨna nakokonaunku! ¿Kausane kiatax nakionkoko?

³²Naukiche tɨsɨroma au axɨmanu canoa, tochenko makiɨtɨx.

³³Auki axɨmanuma amonkoma au canoa bachesoiyoma esati Jesús, namatɨ ɨmoti: — ¡Ñemanauntu axɨkɨ Aɨtoxti Tupax!

³⁴Tompɨkana uimia axɨmanu narubaityu tux iñataimia au axɨmanu kɨx Genesaret.

³⁵Axɨmanuma po'oso isuputaramati Jesús, tusinaunku au nanaiña axɨmanu kɨx. Sɨromatɨ esati aɨbu axɨbama maunxokono,

³⁶ñankitioma pɨnanakiti asamuti nuxia chebo uiti aiñema pariu nabeu naibixhti. Namanaiña axɨbama iñentama, uxiankama tato.