Read Chiquitano MATEO 18 Bible Online

MATEO 18 - Chiquitano bible

MATEO 18

¹Akamanuintyo axɨmanuma nesaxti apóstoles sɨromatɨ esati Jesús ankirioma pɨnanakiti: — ¿Ñakuti naki taruku nikuaxti au nɨriakax au napes?

²Auki axti Jesús aityasuruti tamanti ñaɨma, aiñanti akamanu kɨmuintya

³nanti: — Ñemanauntu sukanañɨ aume axtɨ axaño chapiñokotapɨ axɨna chuxiampɨ nausɨboriki chapisamutempɨ takanati naki simia, chiyebopɨ aboi kauta ane nɨriakax au napes.

⁴Axti naki taruku nikuaxti au nɨriakax au napes tyonenti naki simiamati takanati naki simia.

⁵Axti naki yasuriuruti tamanti simia au nisɨri takanati naki, iñemo axɨna yasuriurutiñɨ.

⁶“Axtɨ anati naki matapenekanati au nomɨnantɨ ɨmoti taman axɨpekukimia axɨbama masiomanka ikokoromañɨ, uxiampɨpae ɨmoti aruraɨburumati u narubaityu tux aɨbu taman kanx tomoeno ityɨti.

⁷¡Chɨkoñopɨtɨ ɨmo axɨna kɨx abe sɨrɨmana axɨba oboiche aɨromatɨ au nomɨnantɨ! Uxia axtɨ ane, ta ¡chiyaupɨ ñana nityakisɨrɨkɨxti naki ñoñɨnx uiche aɨromatɨ au nomɨnantɨ makiataka!

⁸“Sane naukiche, axtɨ ne'e ichepe napope oboi atapeneka au nomɨnantɨ, aityɨsɨnasio arusiumpu iche apɨnanakikɨ. Uxia axtɨ iyebo obi abaityux nasɨboriki champɨ taman ne'e champɨ taman napope, tapɨ apeneka oto pes axɨna chotochebopɨ yupu tox ne'e tox napope.

⁹Axtɨ ui nasɨto atapeneka au nomɨnantɨ, aikiaɨbu arusaɨbu iche apɨnanakikɨ. Tapɨ yupu tox nasɨto apeneka oto pes axɨna chotochebopɨ.

¹⁰“Tapɨ chɨkuasɨrɨpɨma aume axɨbama masiomanka. Tyopiki sukanañɨ aume au napes axɨbama nesaxɨma ángeles aboma asaramatɨ nantax ɨmo nisuxti Iyaɨ au napes.

¹¹Tyopiki axti Aɨtoxti ñoñɨnx kuatati yubapa axɨba amonkio omensoro.

¹²“¿Aburaño sane? Axtɨ tamanti ñoñɨnx abe cien niyabuxti nobixhaka ensoro taman pɨnanakiti, ¿ensapɨ chomonkonopɨ uiti axɨmanio pikiataka noventa y nueve au xhoens, nauki aɨrotitɨ apacherioti axɨmanu nobixhax ensoro?

¹³Axtɨ tabɨko uiti, taruku nipukɨnunkuxti kuata pɨnanaki axɨmanio noventa y nueve chomensoropɨ.

¹⁴Saneityo, axti Aubaɨ naki anati au napes, chixhanxtipɨ nauki anati ensoro axɨpekukimia axɨbama masiomanka.

¹⁵“Axtɨ isamutenti aruki aemo axɨna chuxiampɨ, anitya aɨbuti tamanti aityusianka sukarɨti nipɨnatenti. Axtɨ onkoiti nura chauki uxia tato naka aɨbuti aruki.

¹⁶Axtɨ chonkoitipɨ nura, aityasusuma toxɨma achepekɨ, nauki nanaiña axɨna urapoiti akɨtɨpɨkɨ tusiu ɨmo axɨbama trex.

¹⁷Axtɨ chonkoitipɨ nuraxɨma, urasoi sukarɨ namanaiña makiataka, auki kaɨma aiñata ɨmoti takanati naki chɨriotipɨ takanaintyo ɨmoti naki bakaɨburuti monixh ɨmo Roma.

¹⁸“Ñemanauntu sukanañɨ aume axɨna tomoeno aboi iku axɨna kɨx sisioityo ñana tomoeno au napes.

¹⁹“Sukanañɨ aume axɨna sane: Axtɨ toxɨma abaxɨpekuki chepe ñakionkoxɨma iku axɨna kɨx nauki ankimia au neankaxɨma, naki Iyaɨ anati au napes toxio uiti ɨmoma.

²⁰Tyopiki kauta aboma toxɨma o trexɨma iyoberabaramakɨ au nisɨri, akamanu ichepema yakaityo.

²¹Auki sɨrotitɨ Peru ankirioti pɨnanakiti Jesús: — Yɨriabux, ¿mantukubu niyɨkɨ esati isaruki ixhimiaka tato ɨmoti, axtɨ ane nipɨnatenti iñemo? ¿Taki siete niyɨkɨ?

²²Aiñumuti Jesús nuraxti: — Chɨsukanapɨñɨ aemo siete naɨkɨ, akosi setenta naɨkɨ.

²³“Saneityo, uxiante aɨbu nɨriakax au napes takana aɨbuti taman yɨriabux naukiche xhanxti asaraiti aɨbu axɨbama ikumanakataxti.

²⁴Aɨbapae aisamunenti naukiche iñataimia aɨbuti taman naki taruku nebekixhti ɨmoti.

²⁵Axti maniki kumanakax champɨ uiche apakati, auki maniki yɨriabux bakɨpuruti apabenteti takanati kumanakax, ichepe nikɨpostoti, axɨbamaintyo aɨtoxti nanaiñaintyo nenaxixhti, ityobo nanaiña nebekixhti.

²⁶Axti maniki kumanakax bachesoiyoti esati maniki yɨriabux, nanti ɨmoti asamuti nuxia: ‘Ane napukɨru saɨbuñɨ nanaiña ñana toxio tato sobi aemo.’

²⁷Axti maniki yɨriabux pukɨrusuti tyakuti. Xhimiakana uiti ɨmoti nebekixhti auki taesɨburuti uiti.

²⁸“Naukiche tɨtaesɨburuti maniki kumanakax, ikuñunuti kiatax naki ebeoti simiantai ɨmoti. Eenoti uiti aityumenoti, nanti ɨmoti: ‘¡Apaka iñemo nebeki!’

²⁹Axti maniki kiatax, bachesoiyoti esati, nanti ɨmoti asamuti nuxia: ‘Apukɨru chakuñɨ toxio tato sobi aemo nanaiña.’

³⁰Tapɨti kiatax chixhanxtipɨ, sɨrotitɨ aɨbuti nauki aiñamanatipo ichepe axtɨ bapakarati ɨmoti nebekixhti.

³¹Axɨna sane oxoneneapae ɨmo makiataka, auki sɨromatɨ uraboimia sukarɨti yɨriabux axɨna sane.

³²Auki axti maniki yɨriabux maemenkoti iyoti, nanti ɨmoti: ‘¡Champɨ napukɨru! Axɨñɨ ixhimiakata aemo nebeki iñemo tyopiki ankitio xhopɨnanakiñɨ.

³³Sanempityo obi apukɨru tyakuti maniki kiatax, takana axɨñɨ ipukɨruka atakukɨ.’

³⁴Sane naukiche ɨnantɨ nuxia ɨmoti maniki yɨriabux, auki bakɨpuruti nauki ane manityomokotox ɨmoti ichepe axtɨ bapakarati nanaiña nebekixhti.”

³⁵Nantityo Jesús: — Sanentyo isamutenti ñana aume axti Iyaɨ auki napes, axtɨ chepe año chiñemanauntupɨ axɨna apixhimiakata ɨmoti aubaruki.