Read Chiquitano MATEO 19 Bible Online

MATEO 19 - Chiquitano bible

MATEO 19

¹Naukiche tɨnanti nanaiña axɨba sane, sɨrotitɨ Jesús auki Galilea iñataiti au axɨmanu kɨx Judea axɨna ane ɨmo tansɨrɨ pɨnanaki Jordán.

²Sɨrɨmanama sɨromatɨ isiuti, akamanu uxiankama tato uiti axɨbama maunxokono.

³Axɨmanuma fariseos sɨromatɨ esati Jesús nauki aiñama ñakokotoxɨma ɨmoti, ñankitioma pɨnanakiti: — ¿Ensapɨ uxia uiñana oñɨ peese pɨnanaki nokɨposɨ ityopiki chɨtamampatai?

⁴Aiñumuti Jesús nuraxɨma: — ¿Chamastaipɨ Nikorox naki uiche aisamunuti año aukiapae tɨkañe, ‘axti ñoñɨnx ichepe paɨx uxiantema uiti’?

⁵Sane nanti: ‘Sane naukiche naki ñoñɨnx onkonoti yaɨtoti uiti ichepe nipiakɨtoti nauki asaratitɨ tyaku nikɨpostoti, axɨmanuma toxɨma kaɨma takanati naki taman nakaxɨma.’

⁶Sane naukiche chɨtoxɨpɨmainki, ta kunauntañati kaɨma nakaxɨma. Saneityo naukiche axti ñoñɨnx tapɨ iñatati peese axɨna uiti Tupax sɨroma chepe nakaxɨma.

⁷Axɨma ñankitioma pɨnanakiti: — ¿Kausanemo, bakɨpuruti Moisés atoxi ɨmo axɨna poso taman nikorox uiche atusi ta onkono uiti ikiana, sane peneko uiti?

⁸Nanti Jesús ɨmoma: — Tyopikiapae axɨna sane chauxiankapɨ amonkoi nuraxti, sane naukiche chebo aume uiti Moisés apiñoko naukɨposɨ. Tapɨ aukiapae tɨkañe chɨsanempɨ.

⁹Sukanañɨ aume axti naki iñokotati nikɨpostoti, axtɨ chɨposotipɨ aɨbu, axtɨ posoti tato aɨbu kiatax, ane nipɨnatenti.

¹⁰Namatɨ ɨmoti axɨmanuma nesaxti apóstoles: — Axtɨ sane ñakionkoxti ñoñɨnx aɨbu nikɨpostoti, chuxiampɨ apoti.

¹¹Aiñumuti Jesús nuraxɨma: — Chɨtɨpɨ ɨmo namanaiña aye uimia axɨna sane, kunauntañamantai axɨbama samamekanama uiti Tupax aye uimia.

¹²Sɨrɨmana axɨba yotopikiche chɨposopɨma mañoñɨnka: aboma axɨbama aukiapae mamesoma uixh kaɨma chɨposopɨma, aboma axɨbama mamesoma ui makiataka, tapɨ makiataka aboma takana axɨbama mamesoma ityopiki nɨriakax au napes. Naki iyebo uiti axɨna sane, tari aipiati ɨmo.

¹³Yebomatɨ aɨbu masiomanka esati Jesús, nauki aiñanti ne'esti kɨtɨpɨma naukityo eanti tyakuma. Tapɨ axɨmanuma nesaxti apóstoles kuasoma uimia axɨmanuma sɨromatɨ aɨbuma.

¹⁴Auki nanti Jesús: — Asioma sane tari yebamatɨ masiomanka tauna yesañɨ, tapɨ chichebopɨ aboi, ityopiki nɨriakax au napes tyone ɨmo axɨbama takana nakaxɨma.

¹⁵Iñatati ne'esti kɨtɨpɨ masiomanka, auki sɨrotitɨ auki axɨmanu kɨx.

¹⁶Tamanti yaɨx yebotitɨ asarati Jesús, ñankitioti pɨnanakiti: — Maestro, ¿isane axɨna uxia isamune nauki aye sobi nisɨboriki champɨ nityakɨrux?

¹⁷Aiñumuti Jesús nuraxti: — ¿Kausane ankirio xhopɨnanakiñɨ yokɨtɨpɨ axɨba omixhia? Kunauntañantai axɨna uxia. Axtɨ axianka aye obi au napes, aikokosio axɨmanio bakɨpukux.

¹⁸— ¿Ñakusabe? — ñankitioti maniki yaɨx. Nanti Jesús ɨmoti: — ‘Tapɨ atabaikia, tapɨ axianka ɨmo kiatax paɨx, tapɨ akusɨpɨka, tapɨ apanka kɨtɨpɨti kiatax,

¹⁹akuasɨrɨti aemo aɨma ichepe napakɨma, akuasɨrɨtityo aemo asɨborisapa takana nakuasɨrɨkɨ aemoantoe.’

²⁰— Nanaiña axɨmanio chauki tisamukio — nanti maniki yaɨx — . ¿Isane axɨna sɨrotiki isamune?

²¹Aiñumuti Jesús nuraxti: — Axtɨ axianka uxia nasɨboriki, akosi, aipiabentekasio nenaxi nikuax aityoximia ɨmo axɨbama taruku nityakisɨrɨkɨxɨma. Sane ane nenaxi au napes. Auki kaɨma ariaku isiuñɨ.

²²Naukiche axti maniki yaɨx onkoiti axɨmanu sane, sɨrotitɨ tato aɨbu taruku nisuchekixhti, tyopiki taruku nenaxixhti.

²³Auki nanti Jesús ɨmo axɨbama nesaxti apóstoles: — Ñemanauntu sukanañɨ aume naki ane nenaxixhti takisɨrɨti nauki aye uiti nɨriakax au napes.

²⁴Sukanañɨ tatityo aume sɨnanaunx taman camello auki nisɨto kɨmes, pɨnanakiti naki taruku nenaxixhti aye uiti esati Tupax.

²⁵Naukiche onkoimia, axɨmanuma nesaxti apóstoles taruku nikɨtobɨxɨma uixh, namatityo: — Axtɨ sane, ¿ñakutipɨ naki añekana?

²⁶Axti Jesús asaratitɨ ɨmoma auki aiñumuti nuraxɨma: — Ɨmo mañoñɨnka axɨna sane chisamutempɨma, tapɨ ɨmoti Tupax nanaiña uxiante.

²⁷Auki nanti Peru ɨmoti: — Axɨsomɨ sopiñokota nanaiña axɨna ane soboi, nauki sobetɨ asiukɨ. ¿Isane axɨna toxiobo suiñemo?

²⁸Aiñumuti Jesús nuraxɨma: — Ñemanauntu sukanañɨ aume axtɨ iñatai ñana axɨmanu nanenes auche nanaiña mukampiabo ityobo pikiataka, auche axti Aɨtoxti ñoñɨnx tɨmonsoti au nityɨmoxti, axaño axɨbama amonkaño isiuñɨ autɨmokaityo au doce tɨmoka nauki amasarai ɨmoma axɨbama doce aɨtoxti Israel.

²⁹Namanaiña axɨbama ichopikiñɨ iñokotama nipoxɨma, yarukityoxɨma, nikiasixhimia, yaɨtoxɨma, nipiakɨtoxɨma, aɨtoxɨma, niyoxɨma, yasutiuma ñana cien yopɨrɨkɨ, yasutiumaintyo nisɨborikixhimia champɨ nityakɨrux.

³⁰Sɨrɨmanama axɨbama kaɨma kusɨrɨboma, tyonema ñana axɨbama sɨsioma tyakɨru. Sɨrɨmanamaintyo axɨbama kaɨma aboma au nityakɨrux, tyonema ñana axɨbama kusɨrɨboma.