Read Chiquitano MATEO 20 Bible Online

MATEO 20 - Chiquitano bible

MATEO 20

¹“Saneityo aɨbu axɨna nɨriakax au napes takana aɨbuti tamanti naki ane niyachɨkoiti au niyoxti, tansɨrapae sɨrotitɨ apacheti axɨbama sɨrobomatɨ ɨmo niyachɨkoiti au niyoxti.

²Manityanati aɨbuma mantukubu nikuax taman nanenes yachɨkoimia, auki bakɨpuruti ɨmoma aɨromatɨ au niyoxti.

³Koboi pariu sɨrotitɨ tatityo, tabɨkoma uiti makiataka au nusuara champɨ yachɨkoimia.

⁴Nanti ɨmoma: ‘Amekosityo axaño au niyo akamanu ane apachɨkoboibo, xhapakaka nuxia aume.’ Axɨma sɨromatɨ.

⁵Axti maniki iyoche sɨrotitɨ tatityo naukiche tɨtose, auki sɨrotitɨ tatityo kɨmuintya ɨmo nimɨmɨx, saneityo uiti.

⁶Tɨtɨmɨmɨka nuxia sɨrotitɨ tatityo au nusuara, tabɨkoma uiti akamanu makiataka champɨ yachɨkoimia. Ñankitioti pɨnanakimia: ‘¿Kausane abasikia auna axɨna sapes champɨ napachɨkoi?’

⁷Aiñumuma nuraxti: ‘Tyopiki champɨti naki manityana suiñemo.’ Auki nanti ɨmoma: ‘Amekosityo au niyo akamanu ane apachɨkoboibo.’

⁸“Naukiche tɨtobikia, nanti maniki iyoche ɨmoti maniki asaratitɨ tyaku niyoxti: ‘Aityasusuma tauna axɨmanuma amonkoma kuata niyachɨkoi, apaka ɨmoma kusɨrɨboma obi axɨmanuma kosotikimia aiñanaimia au nityakɨrux axɨmanuma kusɨrɨboma aiñanaimia.’

⁹Kuamatɨ axɨmanuma, yebomatɨ ɨmo niyachɨkoiti naukiche tɨtɨmɨmɨka nuxia, taikianati taman yasutiuti nikuax taman nanenes.

¹⁰Naukiche, sɨromatɨ axɨmanuma kusɨrɨboma aɨromatɨ ɨmo niyachɨkoiti, ñakionkoxɨma toxio ɨmoma chama pɨnanaki makiataka. Namanaiña yasutiuma nikuax taman nanenes.

¹¹Naukiche tɨtoxio ɨmoma, chuxiampɨ nuraxɨma ɨmoti maniki iyoche,

¹²namatɨ: ‘Axɨbama, kosotikimia aiñanaimia, tamantai horax niyachɨkoimia, tapɨ axɨkɨ apakaka ɨmoma isiu nisubaikixh takana suiñemo, axɨsomɨ suichakisɨrɨka ui nipeki sux nanaiña axɨna sapes.’

¹³Tapɨti maniki iyoche aiñumuti nuraxti maniki taman: ‘Churapa, chiñatachemakakapɨ aemo. ¿Unka tubaparikia mantukubu nikua taman nanenes nachɨkoi?

¹⁴Auna ane nikuax nachɨkoi akosi tato. Axtɨ ixhanka yache ɨmoti naki kosotikiti aiñanainti ɨmo niyachɨkoi isiu takana axɨna ityoximiata aemo,

¹⁵tyopiki nimoni isamute aɨbu isiu nixhanka. ¿Axɨkɨ ubatio axɨna taruku nipukɨru?’

¹⁶“Sane ñana axɨbama kaɨma aboma tyakɨru, tyonema ñana kusɨrɨboma. Tapɨ axɨbama kaɨma kusɨrɨboma, tyonema ñana sɨroma tyakɨru.”

¹⁷Numo, tɨniyɨkɨxti Jesús au Jerusalén, batasuruti peese ɨmo axɨmanuma doce nesaxti apóstoles nanti ɨmoma:

¹⁸— Takana axɨna amastai, kaɨma uɨkatɨ au Jerusalén, kauta naki Aɨtoxti ñoñɨnx taxioti ɨmo ɨriatu axɨbama sacerdotes ɨmointyo axɨbama manunekanama bakɨpukux uiti Moisés, ityoximianamati ɨmo nikonkoxti

¹⁹ityoximianamatityo ɨmo axɨbama auki iche nauki unumati, okɨsimia ɨmoti nauki aityakubaxiromatityo kɨtɨpɨ kurusɨx. Yopɨrɨkɨ trex naneneka sɨborikoti tato.

²⁰Nipiakɨtoxɨma axɨmanuma aɨtoxti Zebedeo, ichepe axɨbama aɨx, sɨrotɨ esati Jesús bachesoiyo nantɨ ɨmoti asamuti nuxia ɨmo.

²¹Ñankitioti Jesús pɨnanaki: — ¿Isane naxiantɨmo? Tyone nantɨ ɨmoti: — Akɨpu nauki au nɨriaka taman axɨna nisaɨ tari tɨmonso au nepanauntu tapɨ kiatax au nepautu.

²²Aiñumuti Jesús: — Axaño chɨtusiupɨ aume axɨna apankitio. ¿Ensapɨ apichabauta ñana axɨmanu pichananene ichɨpoboñɨ? Axɨma namatɨ: — Sopichabauta.

²³Iñumutati Jesús nuraxɨma: — Axaño apichabauta ñana axɨna pichananene ichɨpoboñɨ, nauki autɨmo au niñepanauntu au niñepautu axɨñɨ champɨ nisɨriaka ityoximia, tyone ñana toxiobo ɨmo axɨbama ɨmoche tɨsamamekanama uiti Iyaɨ.

²⁴Naukiche axɨmanuma makiataka diez nesaxti apóstoles onkoimia axɨna sane, tɨborikoma ɨmoma axɨmanuma toxɨma yarukityoxɨmantoe.

²⁵Tapɨti Jesús batasuruti ɨmoma auki nanti: — Axaño tusiu aume, axɨpekukimia axɨbama chɨriopɨma axɨbama mayɨriabuka isamutema isiu nixhankaxɨma aɨbu axɨbama champɨti okɨmana tyakuma, saneityo axɨbama makiataka taruku nɨriakaxɨma iñatama numi nɨriakaxɨma onɨma.

²⁶Axaño tapɨ apisamute sane aumeampatoe. Chisanempɨ, axti naki xhanxti taruku nɨriakaxti abaxɨpekuki, tari asaratitɨ tyaku makiataka.

²⁷Axtɨ anati naki abaxɨpekuki xhanxti kusɨrɨboti aɨbu makiataka, tari tyonenti naki kumanakaxti ɨmoma.

²⁸Tyopiki, sanentityo Aɨtoxti ñoñɨnx, chɨkuatatipɨ nauki aserebimia ɨmoti, ta kuatati nauki aserebiti nauki aityoximiatityo nisɨborikixhti ityoboma axɨbama taruku nububikixhimia.

²⁹Naukiche tɨsɨromatɨ auki Jericó, sɨrɨmanama sɨromatɨ isiuti Jesús.

³⁰Toxɨma axɨbama supusuma amonkoma tɨmonsoma abeu kutubiux, naukiche onkoimia ta ikonɨtiyɨ Jesús aukimanu, tosibikoma: — ¡Axɨkɨ Yɨriabux, Aɨtoxti David, apukɨru suichaku!

³¹Axɨmanuma makiataka makuansomokonoma ɨmoma nauki etayoimia, tapɨ axɨma rabotɨ nuxia nityosibixhimia: — ¡Axɨkɨ Yɨriabux, Aɨtoxti David, apukɨru suichaku!

³²Auki tochenkoti Jesús, tasuruma uiti axɨmanuma supusu ñankitioti pɨnanakimia: — ¿Isane nauxiantɨmo isamune autaku?

³³Axɨma iñumutama nuraxti: — Yɨriabux, suixhanka uxia tato sumasata.

³⁴Pukɨrusuti Jesús tyakuma, iñentati nisɨtoxɨma. Isiukai axɨmanuma supusu uxia tato nastaxɨma, auki sɨromatɨ isiuti Jesús.