Read Chiquitano MATEO 22 Bible Online

MATEO 22 - Chiquitano bible

MATEO 22

¹Auki manityanati tatityo Jesús ɨmoma oboi machepekataka. Nanti ɨmoma:

²“Axɨna nɨriakax au napes tyoneantoe takana nauchiche basaparati taman yɨriabux naukiche posoti aɨtoxti.

³Bakɨpuruti ɨmo axɨmanuma ikumanakataxti nauki aɨromatɨ iyoma axɨmanuma ane batasukux ɨmoma, tapɨ axɨma chixhanxɨpɨma aɨromatɨ.

⁴Bakɨpuruti tatityo ɨmo makiataka ikumanakataxti, nanti ɨmoma: ‘Amukanaño ɨmoma axɨmanuma ane batasukux ɨmoma tɨchauki sobi pemakax. Xhakɨpuka aityabaimia niyabu numukianka axɨba mupaɨnakana, nanaiña chauki tɨkoño. Ausiapata auba.’

⁵Tapɨ axɨmanuma ane batasukux ɨmoma chikokotapɨma. Axti maniki taman sɨrotitɨ au niyoxti, axti kiatax sɨrotitɨ asaraiti nimonixhti,

⁶tapɨ makiataka enoma uimia axɨmanuma ikumanakataxti maniki yɨriabux, okɨsioma ɨmoma ichepe nikonkoxɨma uimia.

⁷Auki axti yɨriabux taruku nityɨborixhti, bakɨpuruti ɨmo axɨmanuma masortaboka aboma mekuti nauki aɨromatɨ aityabairoma axɨmanuma mayatabayoka nauki aiñonokomaintyo nipoxɨma.

⁸Auki nanti ɨmo axɨmanuma ikumanakataxti: ‘Chauki tɨkoñokono nanaiña ɨmo basapakax, tapɨ axɨmanuma ityasukama chɨkoñopɨtɨ ɨmoma ayematɨ.

⁹Amekosi, kaɨma, yusiu axɨba yarusɨrɨka kutubiuka, apatasu ɨmo axɨbama apikuñukama ɨmo niyasapata.’

¹⁰Axɨmanuma ikumanakataxti sɨromatɨ tatityo yusiu kutubiuka auki oberabarama uimia namanaiña axɨbama ikuñunuma, axɨbama uxia nɨsɨborikixhimia takanaintyo axɨbama chuxiampɨ nisɨborikixhimia. Sane naukiche ataso nipoxti uimia.

¹¹“Auki axti maniki yɨriabux sɨrotitɨpo asaboriti ɨmoma axɨmanuma ɨmoche batasuruti, asaratitɨ ɨmoti maniki taman ñoñɨnx champɨ kɨtɨpɨti axɨna uxia naibixhti.

¹²Nanti ɨmoti: ‘Churapa, ¿kausane ayetɨpo sane, chɨkuapɨtɨ obi axɨna uxia naibi?’ Axti maniki kiatax chɨmanityanatipɨ.

¹³Auki axti maniki yɨriabux nanti ɨmo axɨmanuma basaparama: ‘Apityomoensio nipopesti yochepe ne'esti apipenesoti tyɨrɨpo ɨmo tomikianene. Auki kuantio nareokox ichepe suchekixh.’

¹⁴Tyopiki sɨrɨmanama axɨbama tasuru, mɨmanamantai axɨbama samamekanama.”

¹⁵Yopɨrɨkɨ nanaiña axɨna sane, axɨmanuma fariseos sɨromatɨ apachema kausane nikiubuma nauki anityati Jesús uimia axɨna chɨkoñopɨtɨ ɨmoma nauki ane ityopikiche urabomati.

¹⁶Sane naukiche bakɨpuruma ɨmo makiataka axɨbama aboma isiuma, ichepe axɨmanuma aboma isiuti Herodes, nauki namatɨ ɨmoti: — Maestro, tusiu suiñemo axɨkɨ ukanɨ axɨna ñemanauntu, axɨkɨ ñemanauntu anunekaka kutubiux ɨmoti Tupax, chaiñatapɨ isiu niñapanaunku makiataka, chanityakapɨ nauki aye ɨmoma axɨna nixhantɨmoma.

¹⁷Urasoi, suisukarɨ, axɨna nakionko: ¿Taki uxia supapaka monixh ɨmoti emperador romano, o chuxiampɨ?

¹⁸Tɨtusiu ɨmoti Jesús axɨna chuxiampɨ ñakionkoxɨma ane au nityusixhimia, nanti ɨmoma: — Axaño axɨbama chapisamutempɨ axɨna amukanaño, ¿kausane apiña napakokoto iñemo?

¹⁹Apityusianka sukarɨñɨ monixh axɨna uiche apapaka impuesto. Ityusiankatama sukarɨti taman monixh denario,

²⁰ñankitioti Jesús pɨnanakimia: — ¿Ñakuti isuche axɨna ichepetyo axɨna nɨrixhti korobo auna?

²¹Axɨma aiñumuma nuraxti: — Nisuxti emperador. Auki nanti Jesús ɨmoma: — Apityoximia ɨmoti emperador axɨna nenaxixhti emperador, tapɨ ɨmoti Tupax nenaxɨxhti Tupax.

²²Naukiche onkoimia axɨna sane, sɨsioma aɨbu nikɨtobɨxɨma. Auki onkonoti uimia sɨromatɨ tato.

²³Au axɨmanuinki nanenes, axɨmanuma saduceos sɨromatɨ asaramati Jesús. Axɨma chikokotapɨma axtɨ sɨborikoma tato axɨbama tɨkoiño, sane naukiche namatɨ ɨmoti sane:

²⁴— Maestro, nanti tɨkañe Moisés axtɨ anati naki koiñoti champɨma aɨtoxti, axti yarukityoxti tari aikianti ikɨpostoboti axɨmanu biurax, nauki anati aɨtoxti ɨmoti maniki yarukityoxti tɨkoiñoti.

²⁵Sane naukiche, auna, subaxɨpeku amonkoma tɨkañe sietema yarukityoxɨmantoe. Axti maniki kusɨrɨboti posoti, auki koiñoti. Champɨti aɨtoxti, onkono uiti nikɨpostoti ɨmoti maniki kiatax yarukityoxti.

²⁶Saneityo ɨmoti maniki segundo yarukityoxti, saneityo aɨbuti maniki tercero, saneityo aɨbuti maniki tyakɨrux yarukityoxɨma.

²⁷Pɨrɨkɨ nanaiña axɨna sane koiñointyo axɨmanu paɨx.

²⁸Sane, axtɨ sɨborikoma tato, ¿ñakuti axɨpekukimia axɨmanuma siete yarukityoxɨmantoe nikɨpostoti axɨmanu paɨx, tyopiki namanaiña posoma aɨbu?

²⁹Aiñumuti Jesús nuraxɨma: — ¡Axaño chaukoñonaunkapɨ, ityopiki chausuputakaipɨ Nikorox chausuputakaipityo nɨriakaxti Tupax!

³⁰Axtɨ sɨborikoma tato axɨbama makoiñoka, mañoñɨnka yochepe paɨka chɨposopɨmainki, tyopiki axɨna nakaxɨma tyone takana axɨbama ángeles auki napes.

³¹Kɨtɨpɨ axɨna asɨborimia tato axɨbama tɨkoiñoma, ¿chamastaipɨ axɨna uixhtiatoe Tupax nanti:

³²‘Axɨñɨ Tupaxɨñɨ ɨmoti Abraham, ɨmoti Isaac ɨmoti Jacob’? ¡Chɨtupaxtipɨ ɨmo axɨbama tɨkoiñoma, ta ɨmo axɨbama sɨborikoma!

³³Naukiche onkoimia axɨna sane, namanaiña kɨtobɨsoma ui axɨna sane ñanunekakaxti Jesús.

³⁴Axɨbama fariseos iyoberabaramakɨ naukiche tɨtusiu ɨmoma etayoimia uiti Jesús axɨmanuma saduceos,

³⁵tamanti, maniki manunekanati bakɨpukux uiti Moisés, nauki aiñanti makokotox ɨmoti ñankitioti pɨnanakiti:

³⁶— Maestro, ¿ñakusane axɨna bakɨpukux yarusɨrɨx axɨpekuki axɨba bakɨpukux uiti Moisés?

³⁷Nanti Jesús ɨmoti: — ‘Akuasɨrɨti aemo Yɨriabux naki Tupax aemo aɨbu nanaiña nausasɨ, aɨbu nanaiña nausɨpɨ aɨbuityo nanaiña nakionko.’

³⁸Tyone axɨna taruku niyarusɨrɨkɨx tyoneityo axɨna kusɨrɨbo omeanaki axɨba bakɨpukux.

³⁹Anentyo kiatax, tyoneantoe takana axɨna. Nantɨ: ‘Akuasɨrɨti aemo asɨborisapa takana nakua aemoantoe.’

⁴⁰Ubau axɨba tox bakɨpukuka akamanu nubakax nanaiña axɨba bakɨpukuka ui axɨbama profetas.

⁴¹Naukiche amonkomainki oberabarama axɨmanuma fariseos,

⁴²Ñankitioti Jesús pɨnanakimia: — ¿Kausane napakionko ɨmoti Mesías? ¿Ñakuti ityakɨbaɨtucheti? Aiñumuma nuraxti: — Nityakɨbaɨtuxti David.

⁴³Auki nanti Jesús ɨmoma: — ¿Kausane axti David, ui noñemaxti Espíritu, nɨrixhti uiti Yɨriabux? Tyopiki sane nanti David:

⁴⁴‘Axti Yɨriabux nanti ɨmoti naki Yɨriabux iñemo: Atɨmo au niñepanauntu, chepe axtɨ iñakama axɨbama chuxiampɨ uimia aemo ñokiana napope.’

⁴⁵¿Kausane axti Mesías atakɨbaɨti aukiti David, tyopiki axtiatoe David nɨrixhti uiti Yɨriabux?

⁴⁶Champɨti iñumutati tamampɨ pariu nuraxti, auki axɨmanu nanenes champɨtiki asioti ankirioti pɨnanakiti.