Read Chiquitano MATEO 9 Bible Online

MATEO 9 - Chiquitano bible

MATEO 9

¹Yopɨrɨkɨ nanaiña axɨba sane, sɨrotitɨ Jesús au taman canoa, tompɨkana uiti axɨmanu narubaityu tux auki iñataiti au axɨmanu tube nikɨxtiatoe.

²Akamanu sɨromatɨ esati Jesús aɨbuti tamanti naki chɨpokorotipɨ, barɨkɨroti iku nikɨruxti. Naukiche astaiti Jesús axɨna ñakokonaunkuxɨma, nanti ɨmoti maniki maunxokono: — Aiña nuxia, isaɨ. Axɨba nomɨnantɨ obi tɨmoximiakana tato.

³Axɨmanuma manunekanama bakɨpukux uiti Moisés kuatɨ au ñakionkoxɨma: “Axɨna nuraxti naki chuxiampɨ kɨtɨpɨti Tupax.”

⁴Tɨtusinaunku ɨmoti Jesús axɨna sane ñakionkoxɨma, ñankitioti pɨnanakimia: — ¿Kausane chuxiampɨ napakionko?

⁵¿Isane uxia, sukanañɨ: ‘Axɨba nomɨnantɨ obi moximiakana tato’, o sukanañɨ: ‘Atɨsai ataru’?

⁶Sane ityusiankana ausukarɨ ta axti Aɨtoxti ñoñɨnx ane nɨriakaxti iku axɨna kɨx nauki aixhimiakati nomɨnantɨ. Auki nanti ɨmoti maniki chɨpokorotipɨ: — Atɨsai, aikia nakɨru akosi tato au napo.

⁷Axti maniki chɨpokorotipɨ atɨraiti sɨrotitɨ tato au nipoxti.

⁸Naukiche astaimia axɨna sane, namanaiña bixhubuma auki Machampienkanama ɨmoti Tupax ityopiki toxio uiti axɨna sane ɨriakabo mañoñɨnka.

⁹Sɨrotitɨ Jesús aukimanu auki asaratitɨ ɨmoti taman ñoñɨnx nɨrixhti Mateo, anankati tɨmonsoti kauta axɨna bakaɨburuma monixh ɨmo Roma. Nanti Jesús ɨmoti: — Ariaku isiuñɨ. Auki atɨraiti Mateo sɨrotitɨ isiuti.

¹⁰Au axɨmanu nanenes tɨkañe, anankati Jesús basoti au taman pox, iñataimia akamanu sɨrɨmanama axɨmanuma bakaɨburuma monixh ɨmo Roma, ichepe axɨbamaintyo makiataka chuxiampɨ nisɨborikixhimia, tɨmonsoma akamanu ichepeti Jesús nauki a'ama Ichepe axɨmanuma nesaxti apóstoles.

¹¹Axɨmanuma fariseos, naukiche astaimia axɨna sane ñankitioma pɨnanaki axɨmanuma nesaxti apóstoles: — ¿Kausane uiti maniki aubesa maestro basoti ichepe axɨbama bakaɨburuma monixh ichepemaintyo axɨbama chuxiampɨ nisɨborikixhimia?

¹²Onkoiti Jesús nuraxɨma nanti ɨmoma: — Axɨbama uxia ɨmoma champɨ nɨmocheti uimia naki ipiakati akurati, ta axɨbama maunxokonoma.

¹³Amekosi nauki aye aboi ñupanunekakax axɨba manityakax: ‘Axɨna nixhantɨmo tari taruku naupukɨru tyaku makiataka, tapɨ apakumanaka numukianka ɨmoti Tupax.’ Axɨñɨ chisekapɨtɨ ityasuruma axɨbama uxia nisɨborikixhimia, ta ɨmo axɨbama abe nomɨnantɨ uimia.

¹⁴Axɨmanuma nesaxti apóstoles Kuan Bautixhta sɨromatɨ esati Jesús ñankitioma pɨnanakiti: — Axɨsomɨ ichepe axɨbama fariseos ane auche chɨsubakapɨ ikonomo somea ɨmoti Tupax, ¿kausane axɨbama aboma asiukɨ chɨsanempɨ uimia?

¹⁵Aiñumuti Jesús nuraxɨma: — ¿Ensapɨ aboma sucheboma axɨbama tasuru ɨmo tɨbɨbɨx, axtɨ anati naki aɨbo apoti chepema? Iñatai ñana axɨmanu nanenes auche aikianamati maniki aɨbo apoti. Akamanu kaɨma tari chɨbasopɨma.

¹⁶“Champɨti naki ikoñokotati taman nanankatu naibixhti aɨbu maxupaxiankatax iyebo, ityopiki axɨna iyebo iñɨnanɨ kiopɨro uixh axɨmanu nanankax, axɨna kaɨma nikiopɨtux arubaesa.

¹⁷Chuiñaɨbutapityo axɨna aɨbo akaɨbu vino au namonkoka tyakikia, tyopiki axɨmanio tyakikia bokiopɨro, axɨmanu vino takanaintyo axɨmanio tyakikia omensoro. Sane naukiche aɨburu iyebo vino ubau iyebo tyakikia, sane axɨmanio tox chomensoropɨ.”

¹⁸Naukiche anankati Jesús manityanati ɨmoma, tamanti ɨriatu axɨmanuma judíos iñataiti, achesoiti esati nanti ɨmoti: — Nichakiumuku aɨbo ako. Axtɨ ayekatɨ aiña ne'e kɨtɨpɨ, sɨboriko tato.

¹⁹Atɨraiti Jesús, aɨbuma axɨmanuma nesaxti apóstoles sɨrotitɨ isiuti.

²⁰Akamanu axɨpekuma ananka taman paɨx maunxokono doce naskɨbeka, narapaka notox kɨtɨpɨki, sɨrotɨ saimia ɨmoti Jesús chakukiti aiñe nabeu naibixhti.

²¹Tyopiki nantɨ ɨmoantoe: “Axtɨ iñenta pariu naibixh, uxiankañɨ tato.”

²²Tapɨti Jesús basɨkɨbɨkoti tato, asaratitɨ ɨmo axɨmanu paɨx nanti ɨmo: — Aiña nuxia nichakiumuku, ui axɨna nakokonaunku uxiankɨ tato.

²³Naukiche iñataiti Jesús au nipoxti maniki ɨriatu axɨbama judíos, astaiti nanaiña tɨkoñokono ɨmo niyɨkɨx kɨtu namanaña amonkoma areoroma aɨbu nityosibixhimia,

²⁴nanti ɨmoma: — Apakicho aukina, axɨna kupikixh chɨkoiñopɨ, ane manumu. Namanaiña iyabomati Jesús,

²⁵auki namanaiña penekoma tyɨrɨpo uiti, auki sɨrotitɨpo asuriuti ne'es axɨmanu kupikixh, tyone atɨrai tato.

²⁶Au nanaiña axɨmanio poka tusiu ɨmoma axɨna uxiante sane.

²⁷Naukiche tɨniyɨkɨxti Jesús aukimanu, toxɨma axɨbama supusu sɨromatɨ isiuti, aɨbu nityosibixhimia: — ¡Apukɨru suichaku, Aɨtoxti David!

²⁸Naukiche tɨsɨrotitɨpo Jesús au axɨmanu pox, axɨmanuma supusu kuamatɨ esati, ankirioti pɨnanakimia: — ¿Apikokota axɨñɨ isamute axɨna sane? — Sopikokota, Yɨriabux — iñumutama nuraxti.

²⁹Auki iñentati Jesús nisɨtoxɨma, nanti ɨmoma: — Tari uxiante takana axɨna napakokonaunku.

³⁰Asaramatɨ tato. Nanti Jesús ɨmoma: — Apasamu nuxia tapɨ tusiu ɨmo makiataka.

³¹Tapɨ axɨma, aɨbapae aɨromatɨ tyɨrɨpo, urapoimia au nanaiña axɨna isamutenti Jesús ɨmoma.

³²Naukiche axɨmanuma supusu tɨsɨromatɨ tyɨrɨpo, makiataka iñataimia esati Jesús aɨbuti kiatax naki chɨmanityanatipɨ anatityo chobores kɨtɨpɨti.

³³Naukiche penekoti chobores uiti Jesús, axti maniki ñoñɨnx manityanati tato. Namanaiña, kɨtobɨsoma, namatɨ: — Champɨ tubastai au Israel takana axɨna sane.

³⁴Tapɨ axɨmanuma fariseos namatɨ: — Axti naki tyonenti ɨriatuxɨmantoe machoboreka tyonenti naki uiche ane nɨriakaxti nauki apenema uiti.

³⁵Axti Jesús ikonɨtiyɨ auki axɨmanio tube, manunekanati ubau sinagoga axɨna kauta iñataiti. Urapoiti axɨba omixhia manityakax ɨmo nɨriakax au napes, uxiankama tato uiti axɨbama abe noxokoka kɨtɨpɨma.

³⁶Naukiche asaratitɨ ɨmo axɨmanuma po'oso, taruku nipukɨruxti tyakuma, ityopiki batacheboma, takana axobe nobixhaka champɨti asarabotɨ yutaku.

³⁷Auki nanti Jesús ɨmo axɨmanuma nesaxti apóstoles: — Ñemanauntu kɨtɨpɨx axɨna pakɨtaurubu, tapɨ axɨbama uiche aiñaɨbuma chɨsɨrɨmanapɨma.

³⁸Sane naukiche, apankisio pɨnanakiti naki yakiyoche tari akɨputi axɨbama uiche aiñaɨbuma.