Read Chiquitano MARCOS 11 Bible Online

MARCOS 11 - Chiquitano bible

MARCOS 11

¹Naukiche tɨtaboma saimia Jerusalén, saimia axɨmanio tube au Betfagé ichepe Betania, esa axɨmanu yirityux Olivos, bakɨpuruti Jesús ɨmo axɨmanuma tox nesaxti apóstoles,

²nanti ɨmoma: — Amekosi au axɨba ta'a poka, axtɨ apiñatai akamanu tabɨko aboi taman burux tomoeno, champɨti tɨsɨroti chaku. Apityakisɨna apikia tauna.

³Axtɨ anati ñankitio amopɨnanaki kausane sane aboi, amukanaño: Axti Yɨriabux ane nɨmoche uiti isiukai bakɨpuruti tato aɨbu.

⁴Sɨromatɨ, tabɨko uimia axɨmanu burux ane tomoeno abeu nusuara saimia ɨmo taman tyurux, aityakisɨnama.

⁵Axɨmanuma amonkoma akamanu ñankitioma pɨnanakimia: — ¿Isane napachɨkoi? ¿Kausane apityakisɨna axɨmanu burux?

⁶Axɨma aiñumuma takana nuraxti Jesús ɨmoma. Auki chebo uimia aɨromatɨ tato.

⁷Aiñama nikɨbuxixhimia chaku, aikiama ɨmoti Jesús. Axti Jesús aɨroti chaku.

⁸Sɨrɨmanama axɨbama iñatama nikɨbuxixhimia isiu kutubiux, makiataka omeno uimia nasusɨka axɨba botɨsɨro uimia eanaki nɨunx.

⁹Axɨbama kusɨrɨbo axɨbamaintyo kosotiki, tosibikoma: — ¡Hosana! ¡Yarusɨrɨxti naki kuatati au nɨrixhti Yɨriabux!

¹⁰¡Yarusɨrɨx axɨna kuatɨ nɨriakax, nɨriakaxti uyaɨ David! ¡Hosana au napetaikixh!

¹¹Iñataiti Jesús au Jerusalén aɨrotitɨ au nipo meankax. Basaborikoti au nanaiña auki axɨmanu aɨrotitɨ au Betania aɨbu axɨmanuma doce nesaxti apóstoles, ityopiki chauki tɨtɨmɨmɨka.

¹²Au kiatax nanenes, niyekixhimia tato auki Betania, axti Jesús kɨrɨpɨoti.

¹³Astaiti auki iche taman nutachens sɨrɨmana nasux, sɨrotitɨ asaraiti axtɨ abe nɨtax, champɨ tabɨko uiti nasuxtai abe'e, ityopiki chiñataikipɨ nanenes ɨmo nauki ɨta.

¹⁴Auki nanti ɨmo nutachens: — ¡Tapɨ ananto anati basoti akɨtɨpɨkikɨ! Axɨmanuma nesaxti apóstoles onkoimia nuraxti.

¹⁵Naukiche iñataimia au Jerusalén, sɨrotitɨpo Jesús au nipo meankax auki penekoma tyɨrɨpo uiti axɨmanuma mapaventekana ichepe axɨbama makomporara. Bopebɨko uiti nanaiña nityɨmoxɨma axɨmanuma makampiarama monixh, bopebɨkoityo uiti nityɨmo axɨmanuma mapabentekana nututakikia.

¹⁶Chichebopɨ uiti nauki aikotaimia aukipo yupu ausɨratai.

¹⁷Auki manunekanati, sane: — Yuku axɨba Nikorox nantɨ: ‘Axɨna nipo toxio ipobo meankax ɨmo namanaiña axɨbama ikuki axɨna kɨx’, tapɨ axaño apisamute takana nipo makusɨpɨka.

¹⁸Naukiche tonkoimia, axɨmanuma ɨriatu axɨbama sacerdotes ichepe axɨbama manunekanama ɨmo bakɨpukux uiti Moisés bapacheroma nikiubuma kausane aityabairomati Jesús, ityopiki bixhubuma ñɨnanati, namanaiña kɨtobɨsoma ui ñanunekakaxti.

¹⁹Naukiche aɨbapae ɨtobi, axti Jesús ichepe axɨmanuma nesaxti apóstoles sɨromatɨ tato.

²⁰Au axɨmanu tansɨrɨ au kiatax nanenes ikɨnomakɨ tatityo esaki axɨmanu nutachens, akamanu astaimia tɨsɨ'ɨbo aukiapae nixhanakax.

²¹Auki axti Peru, akionotiyɨ iyo axɨmanu isamutenti, nanti ɨmoti Jesús: — Maestro, asasatɨ, ɨmo axɨmanu nutachens axone aipiauxamata tɨsɨ'ɨbo.

²²Aiñumuti Jesús: — Apikokosoti Tupax.

²³Ñemanaunkuxatoe sukanañɨ aume axti anati naki nanti ɨmo axɨna yirityux: ‘¡Akosi aukina aiñemekasɨ au narubaityu tux!’, axtɨ champɨ kausane au ñakionkoxti, ta aɨbu ñakokonaunkuxti uxiante ñana ɨmoti axɨna nixhantɨmoti, auki iyebo ɨmoti.

²⁴Sane naukiche sukanañɨ aume nanaiña axɨna apankitio auki nameanka, apikoko ta tiyebo aboi, ta apasutiu ñana.

²⁵Axtɨ ameanka, apixhimiaka axɨna chuxiampɨ aboi ɨmoti kiatax, sanentyo naki Aubaɨ anati au napes ixhimiakatati aume axɨba nomɨnantɨ aboi.

²⁷Iyau nanaiña sɨromatɨ tato au Jerusalén. Anankati Jesús ikonɨtiyɨ au nipo meankax, auki sɨromatɨ esati axɨmanuma ɨriatu axɨbama sacerdotes ichepe axɨbama manunekana bakɨpukux uiti Moisés, axɨmanumaintyo mayɨriabuka,

²⁸auki ñankitioma pɨnanakiti: — ¿Isane naka nɨriaka aisamune axɨna sane? ¿Ñakuti naki uiche ache ɨriakabokɨ yakɨna aisamune?

²⁹Aiñumuti Jesús nuraxɨma: — Axɨñɨntyo xhankiriora amopɨnanaki. Aburasoi sukarɨñɨ, auki surapoi ausukarɨ aukiche nisɨriaka nauki isamunio axɨba sane.

³⁰Ñakuti uiche aikɨpuruti Kuan aunimiati, ¿uiti Tupax o ui mañoñɨnka? Apiñumu nisura.

³¹Auki ñankitioma pɨnanakimiantoe: “Axtɨ usukana oñɨ, uiti Tupax aikɨpuruti, nanti: ‘¿Kausane, chapikokotapɨ nuraxti?’

³²¿Kausane usukanaoñɨ yakɨpuku mañoñɨnka?...” Ta bixhubuma ñɨnana makiataka, ityopiki namanaiña ikokotama ta axti Kuan tyonenti profeta.

³³Auki namatɨ ɨmoti Jesús: — Chɨtusiupɨ suiñemo. Auki nanti Jesús ɨmoma: — Axɨñɨntyo chɨsurapoipɨ ausukarɨ aukiche nisɨriaka nauki isamune axɨna sane.