Read Chiquitano MARCOS 3 Bible Online

MARCOS 3 - Chiquitano bible

MARCOS 3

¹Sɨrotitɨpo tatityo Jesús au sinagoga. Anankati akamanu tamanti ñoñɨnx sɨɨbatai ne'esti.

²Astayomatɨ ɨmoti Jesús axtɨ uxiankati tato uiti au axɨmanu nanenes sabaru, nauki ane tyopikiche urabomati.

³Nanti Jesús ɨmoti maniki ñoñɨnx sɨɨbatai ne'esti: — Atɨsai ariaku auna kɨmuintya.

⁴Auki kaɨma ñankitioti pɨnanaki makiataka: — ¿Isane chebo uisamune au nanenes sabaru: axɨna uxia o axɨna chuxiampɨ? ¿Oñokɨma tyaku sɨborikixh o uiñamesoko? Axɨma sɨsioma chɨmanityanapɨma.

⁵Auki asaratitɨ Jesús aɨbu nityɨborixhti ɨmo axɨmanuma amonkoma tyupekuti, aɨbuityo nisuchekixhti ityopiki champɨ nipukɨru nausasɨxɨma nanti ɨmoti maniki ñoñɨnx: — Aipesɨnaka ne'e. Axti maniki ñoñɨnx ipesɨnakatati, auki axɨmanu ne'esti uxiante tato.

⁶Naukiche sɨromatɨ tyɨrɨpo axɨmanuma fariseos, bapacheroma nikiubuma chepe axɨmanuma nesaxti apóstoles Herodes kausane naukiche aityabairomati Jesús.

⁷Sɨromatɨ isiuti Jesús, sɨrɨmanama auki Galilea, sɨrotitɨ ichepe axɨbama nesaxti apóstoles abeu narubaityu tux.

⁸Naukiche tɨtusiu ɨmoma axɨna champɨ tubastai isamutenti, iñataimiaintyo sɨrɨmanama asaramati auki Judea, auki Jerusalén, auki Idumea, aukityo ɨmo tansɨrɨ pɨrɨkɨ Jordán aukityo Tiro ichepe Sidón.

⁹Sane naukiche, nanti Jesús ɨmo axɨbama nesaxti apóstoles apachema taman canoa, yakɨna tapɨ isimianamati axɨmanuma tarukapae nububikixhimia.

¹⁰Tyopiki sɨrɨmanama uxiankama tato uiti, namanaiña axɨbama maunxokonoma xhanxɨma aiñenomati.

¹¹Naukiche axɨbama machoboreka asaramati, bachesoiyoma esati aɨbu nityosibixhimia: — ¡Axɨkɨ tyonenti Aɨtoxti Tupax!

¹²Tapɨti Jesús axone nuxia yakɨpukuxti ɨmoma tapɨ manityanama kɨtɨpɨti sukarɨ namanaiña.

¹³Auki sɨrotitɨ Jesús onɨ taman yirityux, atasuti ɨmo axɨbama uxia auna ñakionkoxti. Naukiche toberabarama uiti,

¹⁴takɨmanaunkunuma uiti docema axɨpekukimia, nauki aɨromatɨ isiuti nauki akɨputi ɨmoma aɨromatɨ uraboimia axɨba omixhia nuraxti. Nɨrixhimia uiti axɨbama apóstoles,

¹⁵toxioityo uiti ɨriakaboma nauki apenema ɨmo machoboreka.

¹⁶Tyonema axɨbama doce takɨmanaunkunuma: Axti Simón, naki sɨro ɨriboti Peru.

¹⁷Axti Santiago ichepeti Kuan yarukityoxti, aɨtoxti Zebedeo, nɨrixhimiaintyo uiti Boanerges, (nantɨ sane, “Naɨto Nisɨux.”)

¹⁸Axti Andrés, Felipe, Bartolomé, Mateo, Tyomanxi axtityo Santiago, aɨtoxti Alfeo. Axtityo Tadeo, axti Simón auki Canaán,

¹⁹axtityo Judas Iscariote, naki uiche aityoximianati ñana Jesús.

²⁰Auki axɨmanu sɨrotitɨpo Jesús au taman pox, akamanu iyoberabaramakɨ tatityo sɨrɨmanama, akamanu chichebopɨ a'ati ichepe axɨbama nesaxti apóstoles.

²¹Naukiche ipiatema axɨbama yarukityoboti Jesús, sɨromatɨ aikianamati tato, tyopiki namatɨ, mameso nityanuxti.

²²Axɨmanumaintyo manunekanama bakɨpukux uiti Moisés iñataimia auki Jerusalén namatɨ: “Tyonenti Beelzebú, naki ɨriatuxɨmantoe machoboreka, tyonenti naki uiche ane nɨrɨakaxti naki ñoñɨnx nauki apeneti ɨmoma.”

²³Atasuti Jesús ɨmoma, aiñanti ɨmoma axɨna machepekatax, nanti sane: “¿Kausane apeneti Chobores ɨmotiatoe?

²⁴Axtɨ au taman nación tɨborikoma ɨmomantoe, iñaxioma uixhimiantoe.

²⁵Axɨbama yarukityoxɨmantoe, axtɨ tɨborikoma ɨmomantoe, iñaxiomaintyo.

²⁶Sanentityo, Axti Chobores axtɨ tɨborikoti ɨmotiatoe, chɨsɨsiotipɨ iñatai nityakɨrux ɨmoti.

²⁷“Champɨti sɨropo au nipoxti naki chiyaupɨ nikusɨuxti nauki akusɨpɨti nenaxixhti, axtɨ chityomoenotipɨ baeta. Auki kaɨma kusɨpɨoti.

²⁸“Ñemanaunkuxatoe xhimiakana uiti Tupax ɨmo mañoñɨnka tyopiki nanaiña axɨba nomɨnantɨ uimia tyopikityo axɨba chomixhampɨ nuraxɨma:

²⁹tapɨti naki chuxiampɨ nuraxti ɨmoti Espíritu Santo, champɨ maximiakatax ɨmoti, ta sɨsioti aɨbu ɨmo nanaiña naskɨbeka.”

³⁰Sane nuraxti Jesús ityopiki namatɨ ta anati chobores kɨtɨpɨti.

³¹Auki iñatai nipiakɨtoti ichepe axɨbama yarukityoxti Jesús, sɨsioma tyɨrɨpo auki maemenkoma iyoti.

³²Axɨmanuma tɨmonsoma ityupekuti Jesús namatɨ ɨmoti: — Napakɨma, axɨbamaintyo arukityaiki yochepe nakiasityaiki aboma ta'a tyɨrɨpo, yapacherioromakɨ.

³³Aiñumuti nuraxɨma: — ¿Ñakusane nipiakɨ ichepe masarukityaiki?

³⁴Auki, asaratitɨ ɨmo axɨmanuma tɨmonsoma ityupekuti, nanti: — Axɨbama aboma auna, tyone nipiakɨ ichepe axɨbama isarukityaiki.

³⁵Axti naki isamutenti noñemaxti Tupax, tyonenti isarukiti, nikiasi tyonentyo nipiakɨ.