Read Chiquitano MARCOS 4 Bible Online

MARCOS 4 - Chiquitano bible

MARCOS 4

¹Manunekanati tatityo Jesús abeu narubaityu tux. Tyopiki iyoberabaramakɨ tarukapae nububikixhimia, axti Jesús sɨroti au taman canoa axɨmanu ananka akamanu isu tux, atɨmoti akamanu, tapɨ axɨma sɨsioma akamanu abeu tux.

²Auki manunekanati ɨmoma aruki nanaiñantai machepekataka. Auki axɨmanio ñanunekakaxti nanti ɨmoma:

³“Amonsapesio axɨna sane: Tamanti ñoñɨnx sɨrotitɨ anti kɨtu.

⁴Au niñankaxti kɨtu, abe axɨba bupakio isiu kutubiux, kuantio nutaumanka yubario.

⁵Pikiataka bupakio omeana kanka, kauta champɨ nuxia kɨx. Isiukai ubaɨro tyopiki charutabaipɨ axɨmanu kɨx.

⁶Naukiche tɨtane ape sux, kɨxubu uixh, ityopiki champɨ nixhanakax, sɨɨbo.

⁷Pikiataka bupakio eana nansaɨbox, axɨmanu nansaɨbox tabuxio uixh, sane naukiche chobɨtaupɨ.

⁸Pikiataka bupakio au axɨna uxia kɨx, sunau, ɨtau nuxia. Ane axɨna bachebo treinta nɨtax, kiatax sesenta, pikiataka obɨtau cien.”

⁹Nantityo Jesús: “Axɨbama ane uiche onsapema, tari onsaperioma.”

¹⁰Naukiche, onkonoti Jesús tamanti, axɨmanuma amonkoma akamanu saimia ɨmoti ichepe axɨmanuma doce nesaxti apóstoles ñankitioma pɨnanakiti isane xhanxti uraboiti oboi axɨmanio machepekataka.

¹¹Aiñumuti nuraxɨma: “Aume, ityusiankatati Tupax ausukarɨ axɨba umanekana uiti kɨtɨpɨ axɨna nɨriakaxti. Tapɨ ɨmo axɨbama aboma tyɨrɨpo ununekanama oboi machepekataka,

¹²sane nauki axɨbama asaramatɨ, tapɨ ane astaimia, axtɨ onsapekoma, tapɨ ane iyebo uimia, nauki tapɨ iyebo tato uimia esati Tupax, tapɨ xhimiakana nomɨnantɨ uiti ɨmoma.”

¹³Nanti ɨmoma: “¿Chiyebopɨ aboi axɨna machepekatax? ¿Kausanempɨ ayetyo aboi axɨba pikiataka?

¹⁴Axti maniki mankɨturu tyonenti takanati maniki urapoiti axɨba omixhia manityakax.

¹⁵Aboma axɨbama takana axɨmanio niyoma omenobo kɨtu bupakio isiu kutubiux: onkoimia axɨba omixhia manityakax, axtɨ tonkoimia kuatati Chobores aikiaɨbuti axɨba omixhia manityakax omeno au nausasɨxɨma.

¹⁶Makiataka takana axɨmanio niyoma omeno kɨtu omeana kanka: onkoimia axɨba omixhia manityakax yasutiuma aɨbu nipukɨnunkuxɨma,

¹⁷ityopiki champɨ niñuxanakax, chɨsɨsiopɨma yupu. Sane naukiche, axtɨ ityopiki axɨba omixhia manityakax takisɨrɨma oboi makokotoka, axtɨ matanekanama ñɨnana makiataka, iñokotama ñakokonaunkuxɨma.

¹⁸Abomaintyo makiataka takana axɨmanio niyomanka omeno kɨtu eana kɨmeka: onkoimia axɨba omixhia manityakax,

¹⁹chɨchebopɨ uimia nauki axɨmanio omixhia manityakax oboi aikoñokoma nisɨborikixhimia. Taruku nixhankaxɨma ɨmo monixh nauki aye uimia axɨna nixhantɨmoma, nauki taruku nipukɨnunkuxɨma iku axɨna kɨx.

²⁰Abomaintyo axɨbama onkoimia axɨba omixhia manityakax ta yasutiuma, isamutemaintyo axɨba omixhia, takana axɨmanu niyoma sɨro kɨtu eana axɨna uxia kɨx. Tyoneio, axɨmanio obɨtau treinta, pikiataka sesenta, pikiatakaityo cien auki taman.”

²¹Nantityo ɨmoma: “¿Ensapɨ uiñonokota basarux nauki uiña kiana siukux o ikianaintyo kɨrux? Chɨsanempɨ, basarux sɨro petaisɨrɨ, nauki anentax uixh.

²²Saneityo, champɨ anekana nauki chɨtusiupɨ kauta nakax, champɨityo axɨna chɨtusiankanapɨ chisɨropɨ ñana au nanentax.

²³Axɨbama ane uiche onkoimia, tari onsaperioma.”

²⁴Nantityo Jesús ɨmoma: “Amasasai nuxia ɨmo axɨna amonsapetio. Axɨna apisamute ɨmo makiataka saneityo ñana uiti Tupax aume. Ta bachebotiki ñana uɨbo.

²⁵Tyopiki axti naki ane nenaxixhti, toxioki uɨbo ɨmoti. Tapɨti naki champɨ ane ɨmoti, axtɨ ane simiantai uiti kaɨburu pɨnanakiti.”

²⁶Nantityo Jesús: “Axɨna nɨriakaxti Tupax tyoneantoe takanati taman ñoñɨnx axtɨ manati kɨtu:

²⁷isiukiatai axtɨ manumuti astayotitɨ, axtɨ au tobixh au sapes, axɨmanu sɨrokɨtu ubaɨro sunau, chɨtusiupɨ ɨmoti kausane.

²⁸Axɨna kɨx tyone bachebo uixhatoe: ubaɨro baeta, ɨtau, ta'aiki chauki.

²⁹Axtɨ tuɨbabo, iyoberabatati, ityopiki tiñatai nanenes nauki aiñaɨbuti.”

³⁰Nantityo Jesús: “¿Takanache naka nɨriakaxti Tupax, aɨbuchepɨ uichepeka?

³¹Takana niyo mostaza axtɨ sɨro kɨtu. Axɨna simiamantai ñopɨnanaki nanaiña axɨba pikiataka abe ikuki axɨna kɨx,

³²axtɨ sɨro kɨtu, sunau isamunɨ sɨrɨmanax ñopɨnanaki nanaiña pikiataka axɨba omeno kɨtu ichepe au ñanaunx, sɨrɨmana nipiax kauta kuantio nutaumanka iyo nausɨpɨtux.”

³³Sane ñanunekakaxti Jesús ɨmoma axɨba omixhia manityakax, oboi machepekataka takana axɨba, isiu axɨna iyebo uimia.

³⁴Champɨ axɨna urapoiti sukarɨma chisiukipɨ machepekatax, tapɨ ɨmoma axɨbama nesaxti apóstoles axtɨ tamanti aɨbuma urapoiti nanaiña sukarɨma.

³⁵Naukiche aɨbapae ɨtobi axɨmanu nanenes, nanti Jesús ɨmoma axɨmanuma nesaxti apóstoles: — Kuri ta'a tyopɨ narubaityu tux.

³⁶Auki makiataka onkonoma uimia sɨromatɨ aɨbuti Jesús au axɨmanu canoa kauta anankati. Axɨmanio pikiataka canoa omenotityo ichepema.

³⁷Auki basukɨro yarusɨrɨx makiɨtɨx, supiuru tux uixh au axɨmanu canoa, tɨniyɨkɨx ata ui tux.

³⁸Tapɨti Jesús anankati manumuti ta'a tyakɨru axɨmanu canoa, onɨ nikɨruxɨma. Aisɨtopɨnanamati auki namatɨ ɨmoti: — ¡Maestro! ¿Champɨ nɨmoche obi tixhanx uɨro kiana tux?

³⁹Atɨraiti Jesús bakɨpuruti ɨmo makiɨtɨx, nanti ɨmo axɨmanu narubaityu tux: — ¡Etaiso! ¡Tapɨ aepokoka! Axɨmanu makiɨtɨx tochenko, nanaiña sɨsio etayoi.

⁴⁰Auki nanti Jesús ɨmo axɨmanuma nesaxti apóstoles: — ¿Uiche taruku naupixhuku? ¿Chapikokokapɨñɨ?

⁴¹Axɨma taruku nixhukuxɨma, ñankitioma pɨnanakimiantoe: — ¿Ñakutipɨ naki, nanaiña makiɨtɨx ichepe narubaityu tux opikokota yakɨpukuxti?