Read Chiquitano MARCOS 5 Bible Online

MARCOS 5 - Chiquitano bible

MARCOS 5

¹Iñataimia tyopɨ axɨmanu narubaityu tux, au axɨmanu kɨx Gerasa.

²Naukiche tɨsɨroti akɨ Jesús auki axɨmanu canoa, kuatati esati tamanti ñoñɨnx anati chobores kɨtɨpɨti. Axti maniki ñoñɨnx anankati uturu nikɨ makoiñoka,

³ityopiki akamanu po'osoti. Champɨti kusɨuru ɨmoti, botopɨro uiti nityomoentopxti karenax.

⁴Tyopiki ane auche motomoeno ne'esti yochepe nipopesti ui karenax.

⁵Amenkoti au sapes au tobixh uturu yirityuka eanaintyo nikɨ makoiñoka, tosibikotiatai bacheboti ɨmotiatoe oboi kanka.

⁶Naukiche asaratitɨ auki iche'e kɨmenuti Jesús, ipiakɨnotiyɨ, achesoiti esati

⁷auki nityosibixhti nanti ɨmoti: — ¡Tapɨ asikia suatañɨ, Jesús, Aɨtoxti Tupax auki ape! ¡Asamu nuxia iñemo au nɨrixhti Tupax tapɨ ichakisɨrɨka obi!

⁸Sane nuraxti maniki chobores tyopiki axti Jesús tɨnanti ɨmoti: — ¡Axɨkɨ chobores aiñokosoxti naki ñoñɨnx!

⁹Axti Jesús ñankitioti pɨnanakiti: — ¿Isane nɨri? Aiñumuti nuraxti: — Axɨñɨ nisɨri Legión, tyopiki taruku sububiki.

¹⁰Nanti ɨmoti Jesús asamuti nuxia tapɨ penekoma uiti machoboreka auki axɨmanu kɨx.

¹¹Saimiantai auki axɨmanu, esa axɨmanu yirityux, amonkio sɨrɨmana nupaucheka bubaso,

¹²ñankitioma tatityo axɨmanuma machoboreka pɨnanakiti: — Aikɨpusu somɨ yobesa nupaucheka, cheboityo obi someno yokɨtɨpɨ.

¹³Toxio uiti Jesús ɨmoma, auki axɨmanu ikiaɨburumakɨ machoboreka kɨtɨpɨkiti maniki ñoñɨnx sɨroma yokɨtɨpɨ nupaucheka. Axɨmanio nupaucheka, saimia dos mil nububikixh, auki axɨmanu opipiakɨnaño kɨmama bupakio au tux, akamanu mokoiño.

¹⁴Auki axɨmanuma asaramatɨ yutaku nupaucheka besɨburuma, sɨromatɨ uraboimia au tube nanaiña axɨna astaimia. Namanaiña sɨromatɨ asaborimia.

¹⁵Naukiche aiñanaimia esati Jesús, asaramatɨ ɨmoti tɨmonsoti, ane naibixhti champɨ kausane uiti maniki amonkoma machoboreka kɨtɨpɨti. Namanaiña bixhubuma,

¹⁶axɨmanuma astaimia axɨmanu sane aɨbuti maniki anankati chobores kɨtɨpɨti yochepe axɨmanio nupaucheka, uimia uraboimia sukarɨ makiataka.

¹⁷Auki namatɨ ɨmoti Jesús asamuti nuxia tari yɨrakatitɨ auki axɨmanu axɨpekukimia.

¹⁸Naukiche tɨsɨroti tato Jesús au canoa, axti maniki ñoñɨnx amonkoma machoboreka kɨtɨpɨti ñankitioti pɨnanakiti nauki aɨrotitɨ isiuti.

¹⁹Axti Jesús chicheboɨ uiti, ta nanti ɨmoti: — Akosi tato au napo, ichepe axɨbama arukibokɨ, urasoi isukarɨma nanaiña axɨna isamutenti Yɨriabux atakukɨ, axɨnaintyo nipukɨruxti atakukɨ.

²⁰Axti maniki ñoñɨnx sɨrotitɨ tato, auki urapoiti au nanaiña axɨmanio tube au Decápolis axɨna isamutenti Jesús tyakuti. Namanaiña sɨsioma aɨbu nikɨtobɨxɨma.

²¹Naukiche sɨrotitɨ tato Jesús ta'a tyopɨ axɨmanu narubaityu tux, iyoberabaramankɨ tatityo sɨrɨmanama, tapɨti sɨsioti isiu nabeux.

²²Auki iñataiti taman yɨriabux ɨmo sinagoga, nɨrixhti Jairo, naukiche asaratitɨ ɨmoti Jesús matakonokonoti omonɨ nipopesti

²³nanti ɨmoti, asamuti nuxia: — Tɨ saimiampae aiñokonoñɨ nichakiumuku. Ariaku aiñasio ne'e kɨtɨpɨ, nauki uxia tato ɨmo.

²⁴Axti Jesús sɨrotitɨ ichepeti, sɨrɨmanama sɨromatityo isiuti ityaiñakanamakɨ tyupekuti.

²⁵Akamanu axɨpekuma ananka taman paɨx maunxokono doce naskɨbeka, narapaka notox kɨtɨpɨki.

²⁶Koboi nityakisɨrɨkɨx esa axɨbama ipiakama akurama, takɨrusu nanaiña nenaxixh, chuxiantempɨ tato. Yusiu naneneka onkisio taruku ɨmo.

²⁷Naukiche ipiate'e nɨrixhti Jesús, axɨmanu paɨx sɨrotɨ saimia ɨmoti chakukiti, axɨpekuki namanaiña, auki aiñe naibixhti.

²⁸Tyopiki nantɨ ɨmoantoe: “Axtɨ iñenta pariu naibixh, uxiankañɨ tato.”

²⁹Tochenaña, narapaka notox kɨtɨpɨki, onkisio nikɨtɨpɨx uxiantato axɨmanu noxokox.

³⁰Axti Jesús, tusinaunku ɨmoti axɨna sɨrotɨ kɨtɨpɨkiti nikusɨuxti, pebɨkoti asaratitɨ ɨmo namanaiña, ankirioti: — ¿Ñakuti naki iñentati nisaibi?

³¹Axɨbama nesaxti apóstoles namatɨ ɨmoti: — Namanaiñantai isimianamakɨ auki nanaiña, ta ankitioki ‘¿Ñakuti iñenotiñɨ?’

³²Tapɨti Jesús sɨsioti astayotitɨ ityupekuti, nauki atusi ɨmoti ñakuti iñenoti.

³³Axɨmanu paɨx, paichokonono ui nixhukux ui axɨna sane uxiante ɨmo, ariox achesoi esati, uraboi sukarɨti nanaiña.

³⁴Nanti Jesús ɨmo: — Nichakimuku, ityopiki nakokonaunku uxiankɨ tato. Akosi tato chauki tuxiankɨ tato ui axɨmanu noxokox.

³⁵Anankatiki manityanati Jesús, naukiche aiñanaimia auki nipoxti maniki yɨriabux ɨmo sinagoga uraboimia sukarɨti niyupu axɨmanu kupikimia: — Natakiumuku tɨkoiño. ¿Isane nɨmoche asikiaiki kuatati maestro?

³⁶Axti Jesús, champɨ nɨmoche uiti nuraxɨma, nanti ɨmoti maniki yɨriabux ɨmo sinagoga: — Tapɨ aixhuka. Akasiatai akokonau.

³⁷Chichebopɨ uiti aɨromatɨ isiuti axtiatai Peru, axti Santiago ichepeti Kuan, yarukityoxtiatoe.

³⁸Naukiche iñataimia au nipoxti maniki yɨriabux ɨmo sinagoga astaiti nareoxɨma aɨbu nityosibixhimia,

³⁹sɨrotitɨpo nanti ɨmoma: — ¿Kausane taruku nautosibi saneampae nabareo? Axɨna kupikimia chɨkoiñopɨ, ane manumu.

⁴⁰Namanaiña iyabomati Jesús, sɨromatɨ tyɨrɨpo uiti namanaiña, auki sɨrotitɨpo esa axɨmanu kupikimia ichepeti yupux, nipiapax axɨmanumaintyo amonkoma isiuti.

⁴¹Auki aiñenti ne'es nanti ɨmo: — Talitá, cum (axɨna nantɨ sane: “Kupikimia, sukanañɨ aemo, atɨsai.”)

⁴²Isiukai, axɨmanu kupikimia, abe doce naskɨbeka ɨmo, atɨraiyo amenko. Namanaiña sɨsioma aɨbu nikɨtobɨxɨma.

⁴³Auki axti Jesús axone nuxia yakɨpukuxti ɨmoma: tapɨ urapoimia sukarɨ makiataka, bakɨpurutityo asapanema axɨmanu kupikimia.