Read Chiquitano MARCOS 9 Bible Online

MARCOS 9 - Chiquitano bible

MARCOS 9

¹Nantityo Jesús ɨmoma: — Sukanañɨ ta ñemanauntu, axɨpekukimia axɨbama aboma auna chɨkoiñopɨma chepe axtɨ astaimia iñatai niriakaxti Tupax.

²Pɨrɨkɨ axɨmanio seixh naneneka, sɨrotitɨ Jesús onɨ taman yirityux petaisɨrɨ sɨromatɨ uiti axti Peru, chepeti Santiago axtityo Kuan. Ta'a, isukarɨma, somoso nakaxti Jesús.

³Naibixhti kuara nuxia, champɨ takanache nipurusubikixh.

⁴Asaramatɨ ɨmoti Elías ichepeti Moisés, baparioma aɨbuti Jesús.

⁵Nanti Peru ɨmoti Jesús: — Maestro, ¡uxiampae nusaka auna! Supasamuna trex kɨpauka: taman aemo, kiatax ɨmoti Moisés kiatax ɨmoti Elías.

⁶Axɨbama nesaxti apóstoles taruku nikɨtobɨxɨma, tapɨti Peru chɨtabɨkopɨ uiti isane urapoboiboti.

⁷Isiukai, iñatai taman kɨsaɨbox sɨsio onɨma. Eanaki axɨmanu kɨsaɨbox rabotɨ manityakax, nantɨ sane: “Tyonenti Isaɨti naki taruku nikuaxti iñemo: Amonsapesio nuraxti.”

⁸Isiukai, asaramatato tyupekuma, kɨcheka esama, axtiatai Jesús anati.

⁹Naukiche tɨkuamatɨ tato onɨki yirityux, nanti Jesús ɨmoma tapɨ urapoimia axɨmanu astaimia, ichepe axtɨ tɨsɨborikoti tato Aɨtoxti noñɨnx.

¹⁰Sane naukiche champɨti manityana axɨpekukimia, tapɨ axɨma ñankitioma pɨnanakimiantoe kausanempɨ axɨrabotɨ sane asɨboriti tato.

¹¹Ñankitioma pɨnanakiti Jesús: — ¿Kausane namatɨ axɨbama manunekanama ɨmo bakɨpukux uiti Moisés ta axti Elías kusɨrɨboti ayetitɨ tato?

¹²Aiñumuti: — Ñemanauntu kusɨrɨboti Elías ayetitɨ, uiti aikoñokoti nanaiña. ¿Kausane monantɨ axɨba Nikorox axti Aɨtoxti noñɨnx takisɨrɨti ñana champɨityo nikuasɨrɨkɨxti?

¹³Sukanañɨ aume axti Elías chauki tanankati, ta axɨma isamutema aɨbuti isiu axɨna nixhankaxɨma, takana monantɨ axɨmanio Nikorox sane samamekana ɨmoti.

¹⁴Naukiche iñataimia tato kauta amonkoma axɨbama makiataka nesaxti apóstoles, tabɨkoma uimia chiyaupɨ nububikixhimia ityupekuma, amonkoma akamanu axɨpekukimia axɨbama manunekanama bakɨpukux uiti Moisés manityanama aɨbuma.

¹⁵Naukiche asaramatɨ ɨmoti Jesús, namanaiña ipiakɨnomakɨ ankimia nuxia ɨmoti taruku nikɨtobɨxɨma.

¹⁶Ñankitioti pɨnanakimia: — ¿Isane axɨna naupari aɨbuma?

¹⁷Tamanti axɨpekukimia axɨmanuma amonkoma akamanu aiñumuti: — Maestro, kuatati sobi isaɨ tauna aesakɨ, anati chobores kɨtɨpɨti uiti chɨmanityanatipɨ.

¹⁸Kauta tabɨkoti uiti, akamanu axti chobores iyaruraɨburuti akɨ. Atɨo aikiti, botokio no'oxti sɨsioti kɨsɨburuti akɨ'ɨ. Xhankitio pɨnanaki axɨbama aesa apóstoles yakɨna aikiaɨburumati chobores kɨtɨpɨkiti, chɨkaɨburutipɨ uimia.

¹⁹Aiñumuti Jesús: — ¡Axaño mañoñɨnka champɨ napakokonaunku! ¿Auchepɨpae iñokonaño apanauntaka? ¿Auchepɨ ñana aye aboi? Apikiasti tauna maniki ñaɨma.

²⁰Auki aikianamati maniki ñaɨma esati Jesús. Naukiche asaratitɨ chobores ɨmoti Jesús, maniki ñaɨma, taɨbɨkoti tatityo akɨ iñaxɨkɨnakanatiyɨ atɨo aikiti.

²¹Auki ñankitioti Jesús pɨnanakiti yaɨtoti: — ¿Tɨ koboi nakaxti aɨbu axɨna sane? Aiñumuti yaɨtoti: — Naukiche simiantiki.

²²Ane auche axti maniki chobores ipenenoti oto pes eanaintyo tux, yakɨna aityabairoti. Sane naukiche asamu nuxia suiñemo apukɨru suichaku.

²³Nanti Jesús ɨmoti: — ¿Kausane ukanɨ ‘axtɨ axianka’? ¡Nanaiña uxiante ɨmoti naki makokonaunx!

²⁴Auki atosibiti yaɨtoti maniki ñaɨma: — Ikokota. ¡Acheki uɨbo axɨna ikokota!

²⁵Naukiche astaiti Jesús iyoberabaramakɨ sɨrɨmanama, manityomokonoti ɨmoti chobores, nanti sane: — Chobores naki chɨmanityanapɨ, chonauntipɨ, xhakɨpuka aemo akosi ikɨtɨpɨkiti naki ñaɨma tapɨ ananto obi aɨro kɨtɨpɨti.

²⁶Tosibikoti maniki chobores, konsaboti tatityo maniki ñaɨma uiti. Auki sɨrotitɨ kɨtɨpɨkiti, simia nikonkoxti uiti akamanu namatɨ, koiñotiapae.

²⁷Tapɨti Jesús, aiñenti ne'esti, aiñatɨnaiñakanati. Axti maniki ñaɨma atɨraiti.

²⁸Auki sɨrotitɨpo Jesús au taman pox, axɨbama nesaxti apóstoles ñankitioma pɨnanakiti axɨmantai ichepeti: — ¿Kausane axɨsomɨ champɨ nuiche sopikiaɨburuti maniki chobores?

²⁹Aiñumuti Jesús: — Axti naki chobores sane nakaxti, kaɨburuti oboi meankax.

³⁰Naukiche tɨsɨromatɨ aukimanu, ityarutama Galilea. Axti Jesús chixhanxtipɨ anati tusiu ɨmoti,

³¹ityopiki manunekanati ɨmo axɨbama nesaxti apóstoles. Nanti ɨmoma: — Axti Aɨtoxti naki noñɨnx toxiotiki meku mañoñɨnka, yakɨna aityabairomati. Ta yopɨrɨkɨ trex naneneka sɨborikoti tato.

³²Axɨma chisɨropɨ au ñakionkoxɨma axɨna nanti ɨmoma, ta bixhubuma ankirioma pɨnanakiti.

³³Iñataimia au axɨmanu ciudad Cafarnaún. Naukiche tɨtaboma au taman pox, ñankitioti Jesús pɨnanakimia: — ¿Isane nɨmoche axɨna naupari one isiu kutubiux?

³⁴Champɨti iñumuta, ityopiki isiu kutubiux ñankitioma pɨnanakimiantoe ñakutipɨ naki taruku nɨriakaxti axɨpekukimia.

³⁵Auki atɨmoti Jesús, atasuti ɨmoma axɨmanuma doce nesaxti apóstoles, nanti ɨmoma: — Axtɨ anati naki xhanx taruku nɨriakaxti, tari tyonenti naki tyakɨruxti pɨnanaki namanaiña tari aruku nuxia ɨmoti tyaku makiataka.

³⁶Auki aiñanati kɨmuintya kauta amonkoma tamanti simia, aikianati ape nanti ɨmoma:

³⁷— Axti naki yasuriuruti au nisɨri tamanti simia takanati naki, ta iñemo yasuriurutiñɨ. Axti naki yasuriurutiñɨ, chɨtɨpɨ iñemoantai yasuriurutiñɨ, ta ɨmotityo naki uiche aikɨpuruñɨ.

³⁸Nanti Kuan ɨmoti: — Maestro, sumasakati taman bakaɨburuti machoboreka au nɨri, suixhankapɨ chichebopɨ soboi ɨmoti, ityopiki chanankatipɨ ochepe.

³⁹Aiñumuti Jesús: — Tapɨ abasikia kuatati, ityopiki champɨti naki isamutenti axɨna champɨ tamastai au nisɨri nauki ta'aiki chuxiampɨ nuraxti sɨtɨpɨñɨ.

⁴⁰Naki uxia uiti oemo, anati ochepe.

⁴¹Axti naki makumananati aume champɨ nɨmoche axtɨ tamantai taropes tux tyopiki abaka isiuti Cristo, ñemanaunkuxatoe sukanañɨ aume, toxio ñana ɨmoti nikuaxti.

⁴²“Axtɨ anati naki iñatati makokotox ɨmo axɨbama ikokoromañɨ, uxiampɨpae axtɨ kusɨrɨbo aiyaruraɨburumati au narubaityu tux aɨbu taman kanx sɨrɨmanax tomoeno ityɨti.

⁴³Axtɨ ui ne'e aɨkatɨ au nomɨnantɨ, aityɨsɨna. Tyopiki uxia axtɨ iyebo nasɨboriki obi aɨbu tamantai ne'e, pɨnanaki aɨrotɨ yupu tox ne'e, au infierno, kauta chotochebopɨ pes,

⁴⁴kauta nikɨmɨka chɨmokoiñopɨ ichepe axɨna pes chotochebopɨ.

⁴⁵Axtɨ ui napope atapeneka au nomɨnantɨ, aityɨsɨna. Uxia axtɨ iyebo nasɨboriki obi aɨbu tamantai napope, pɨnanaki axtɨ apene au infierno yupu tox napope,

⁴⁶kauta nikɨmɨka chɨmokoiñopɨ ichepe axɨna pes chotochebopɨ.

⁴⁷Axtɨ ui nasɨto atapeneka au nomɨnantɨ, aikiaɨbu. Tyopiki uxia axtɨ aɨkatɨ aɨbu tamantai nasɨto esati Tupax, pɨnanaki aerotɨ au infierno yupu axɨmanio tox nasɨto,

⁴⁸Kauta axɨba nikɨmɨka chɨmokoiñopɨ ichepe axɨna pes chotochebopɨ nonkox.

⁴⁹“Tyopiki uiti Tupax kicheseñama ñana namanaiña ui pes ichepe siɨx.

⁵⁰Axɨna siɨx uxia. Axtɨ takɨrusu noripox, ¿kausane napachɨkoi yakɨna ane tato noripox? Saneityo axaño tapɨ ensoro aukɨtɨpɨki siɨx taikiana uxia aboi aumeampatoe.”