Read Chiquitano LUCAS 14 Bible Online

LUCAS 14 - Chiquitano bible

LUCAS 14

¹Au axɨmanu nanenes sabaru sɨrotitɨ Jesús a'ati au nipoxti maniki yɨriabux fariseo, tapɨ axɨmanuma makiataka fariseos amonkoma astayomatɨ ɨmoti.

²Anankatityo akamanu, kutakikiboti, tamanti ñoñɨnx maunxokonoti kichusabo nikɨtɨpɨxti.

³Ñankitioti Jesús pɨnanaki axɨmanuma manunekanama bakɨpukux uiti Moisés pɨnanakityo axɨmanuma fariseos: — ¿Uxia axtɨ kuraboti au axɨna nanenes sabaru axti naki maunxokono, o chuxiampɨ?

⁴Tapɨ axɨma sɨsioma etayoimia. Auki aiñenti ne'esti maniki maunxokono, uxiankati tato uiti auki nanti ɨmoti tari yɨrakatitɨ tato.

⁵Tapɨ ɨmo axɨmanuma fariseos nanti: — ¿Ñakuti abaxɨpekuki, axtɨ aɨtoxti chepe niyabuxti numukianx pakio au kɨtubixh, ensapɨ ane nɨmoche uiti axtɨ sabaru nauki aikiɨbuti?

⁶Axɨma chɨtusiupɨ ɨmoma isane urapoboiboma.

⁷Naukiche asaratitɨ Jesús ɨmo axɨmanuma tasuruma bapacheroma ityɨmoboma kauta nisuxatoe nauki a'ama, nanti sane ɨmoma:

⁸— Axtɨ ityasurumakɨ ɨmo taman tɨbɨbɨx nauki a'a, tapɨ atɨmoka kauta axɨna nisuxatoe, tyopiki kuatatiki naki kiatax tasuru ane nɨriakaxti apɨnanakikɨ.

⁹Auki axti maniki uiche aityasuruti año kuatati kaɨma nanti aemo: ‘Aityoximia natɨmo ɨmoti naki kiatax.’ Axɨkɨ kaɨma aɨbu nakɨso aɨkatɨ atɨmo tyakɨru.

¹⁰Tapɨ sane, axtɨ ityasurumakɨ, atɨmo tyakɨru, nauki axtɨ kuatati maniki uiche aityasurɨ, nanti aemo: ‘Churapa, ariaku kauta axɨna nisuxatoe.’ Sane tusiu nakua isukarɨ makiataka axɨbama tɨmonsoma akamanu achepekɨ.

¹¹Tyopiki axti naki uixhtiatoe taruku niyarusɨrɨkɨxti, simiamati tato ñana. Tapɨti naki simiamantiatai, taruku ñana niyarusɨrɨkɨxti.

¹²Nantityo ɨmoti maniki ñoñɨnx uiche aityasuruti: — Axtɨ axianka asapa, tapɨ aityasukama axɨbama aturapataiki, axɨbamaintyo arukityaiki, tapɨ aityasukamaintyo axɨbama arukibokɨ, isiuityo ɨmo axɨbama aposapa taruku nenaxixhimia. Tyopiki axɨma, ityasurumakɨtyo ñana, sane asutiu tato ityobo.

¹³Tapɨ sane obi, axtɨ asapaka, aityasusuma axɨbama taruku nityakisɨrɨkɨxɨma, axɨbama chuxiampɨ namensɨma, ɨmo axɨbama chasarapɨmatɨ.

¹⁴Sane taruku napukɨnunku. Tyopiki axɨma champɨ uiche apakama aemo, tapɨ axɨkɨ ane ñana toxiobo aemo ityobo au axɨmanu nanenes auche sɨborikoma tato axɨbama uxia nisɨborikixhimia.

¹⁵Naukiche onkoimia axɨna sane, tamanti axɨpekukimia axɨmanuma tɨmonsoma akamanu nanti ɨmoti Jesús: — ¡Taikiana chiyaupɨ nipukɨnunkuxti naki iyebo uiti a'ati kauta naka nɨriakaxti Tupax!

¹⁶Nanti Jesús ɨmoti: — Tamanti ñoñɨnx masamunuti yarusɨrɨx basapakax, axɨbama tasuruma uiti chiyaupɨ nububikixhimia.

¹⁷Naukiche tɨkoño nanaiña bakɨpuruti ɨmoti maniki ikumanakataxti uraboiti sukarɨ axɨmanuma ɨmoche batasukux: ‘Ausiapata, tyopiki axɨna amutuburibo chauki tɨkoño.’

¹⁸Auki namanaiña bapacheroma ityopikiche tapɨ sɨromatɨ. Axti maniki kusɨrɨbo nanti: ‘Aɨbo aye sobi taman ñanaunx, yɨkatɨ baeta yasarai. Asamu nuxia tapɨ ɨnantɨ aemo.’

¹⁹Axti kiatax nanti: ‘Obebo sobi cinco yuntax nobioka, yɨkatɨ xhakone axtɨ omixhia. Asamu nuxia tapɨ ɨnantɨ aemo.’

²⁰Nanti kiatax: ‘Aɨboatai ipoka, sane naukiche chiyɨkapɨtanu.’

²¹Axti maniki kumanakax iñataiti tato urapoiti nanaiña sukarɨti maniki ɨmoche aserebiti. Auki axti maniki ɨmoche aserebiti tɨborikoti, nanti ɨmoti maniki kumanakax: ‘Akosi yusiu kutubiuka uturu axɨba poka, aikiasama tauna axɨbama taruku nityakisɨrɨkɨxɨma, axɨbama chasarapɨtɨ axɨbamaintyo chuxiampɨ namensɨma.’

²²Koboi pariu, nanti maniki kumanakax: ‘Yɨriabux, nanaiña isamute axɨna nakɨpuku iñemo, sɨrɨmanainki tɨmoka.’

²³Auki axti maniki ɨmoche aserebiti maniki kumanakax nanti ɨmoti: ‘Akosi yusiu kutubiuka yusiu nikɨtuka, ukanɨ ɨmoma ayematɨ, yakɨna atasopo au nipo.

²⁴Tyopiki sukanañɨ aume champɨti tamanti axɨpekukimia axɨmanuma kusɨrɨbo ityasuruma basoti niyasapata.’

²⁵Sɨrɨmanama sɨromatɨ isiuti Jesús. Basɨkɨbɨkoti tato nanti:

²⁶“Axtɨ anati naki xhanxti ayetitɨ isiuñɨ tari taruku nisua ɨmoti pɨnanakiti yaɨtoti, pɨnanaki nipiakɨtoti, pɨnanaki nikɨpostoti, pɨnanakityo axɨbama aɨtoxti, pɨnanaki axɨbama yarukityoxti nikiastyoti, pɨnanakitiatoe, chɨmotipɨ ayetitɨ isiuñɨ.

²⁷Axti naki chiyasutiutipɨ nikurusɨxtiatoe ayetitɨ isiuñɨ, chɨmotipɨ ayetitɨ isiuñɨ.

²⁸Axtɨ anati naki abaxɨpekuki xhanxti asamuti pox petaisɨrɨ, ¿chɨtɨmonsotipɨ baeta aipiakɨmunkuti mantukubu nikuax, nauki atusi ɨmoti axtɨ iñatai nimonixhti uiche atakɨru nuxiankax?

²⁹Tapɨ saneantai, axtɨ isamutenti nityɨmox champɨ uiche atakɨru aiñatɨnaiñakati, namanaiña axɨbama asaramati iyabomati,

³⁰namatɨ ɨmoti: ‘Axti naki ñoñɨnx xhanxtipɨ asamuti ipoboti, chiñataipɨ tyakɨru uiti.’

³¹Saneityo axtɨ tamanti yɨriabux sɨrotitɨ ɨmo baikixh kutakikiboti kiatax yɨriabux, ¿ensapɨ chɨkusɨrɨbopɨ atɨmoti apakɨmunkuti axtɨ aɨbu axɨbama diez mil masortaboka iñatai aɨbuche aɨrotitɨ kɨmenu axɨbama veinte mil nububikixhimia?

³²Axtɨ astaiti chiñataipɨ aɨbuche aɨrotitɨ kɨmenuti, axtɨ anatiki iche maniki kiatax yɨriabux, bakɨpuruti axɨbama uiche uraboimia tari uxia tato uimia ɨmomantoe.

³³Sanenti naki, chixhanxtipɨ aiñokoti nanaiña nenaxixhti, chɨmotipɨ aɨrotitɨ isiuñɨ.

³⁴“Axɨna siɨx uxia. Tapɨ axtɨ kaɨburu noripox eanaki, ¿kausanempɨ nauki aserebi tato?

³⁵Champɨki nɨmoche uxia ɨmopɨ kɨx ɨmopɨ semenux. Akasiatai baruraɨbu. Axɨbama ane uiche onsapema, tari onkoimia.”