Read Chiquitano LUCAS 17 Bible Online

LUCAS 17 - Chiquitano bible

LUCAS 17

¹Nanti Jesús ɨmo axɨmanuma nesaxti apóstoles: “Oboi nenaxi axɨna kɨx tapenekoma mañoñɨnka. ¡Taruku ñana nityakisɨrɨkɨxti naki uiche atapenema makiataka au nomɨnantɨ!

²Uxiampɨ axtɨ kusɨrɨbo aiyaruraɨburumati au narubaityu tux aɨbu taman kanx sɨrɨmanax tomoeno ityɨti, tapɨ asioti aiñanti makokotox ɨmo axɨbama masiomanka.

³¡Amasasai nuxia! “Axtɨ axti aruki isamutenti nomɨnantɨ, aikuansomokosoxti. Tapɨ axtɨ uxia tato nisɨborikixhti, aixhimiaka tato ɨmoti.

⁴Champɨ nɨmoche axtɨ isamutenti siete nomɨnantɨ aemo au sapes, axtɨ siete niyekixhti aesakɨ nanti aemo: ‘Chanantopɨ sobi isamune’, aixhimiaka tato ɨmoti.”

⁵Axɨmanuma amonkoma isiuti Jesús mankioma pɨnanakiti: — Ache uɨbo axɨna sopikokota.

⁶Aiñumuti Yɨriabux nuraxɨma: — Axtɨ apikokotapɨ, simiantai takana nityabaiki taman niyo mostaza, amukanañopɨ ɨmo axɨna soes: ‘Aikiaɨbusɨ aukina akosi atɨrai kɨmuintya narubaityu tux’, tyone ikokotapɨ napakɨpuku.

⁷“Axtɨ tamanti abaxɨpekuki anati ikumanakataxti axtɨ aɨbo aiñanainti tato auki ñanaunx o auki xhoens yusiuki nobixhaka, ¿ensapɨ nanti ɨmoti: ‘Ariakupo ariaku atɨmo nauki aka’?

⁸Chɨsanempɨ, ta nanti ɨmoti: ‘Apache xhutuburiboñɨ, asikia auna yesañɨ asaratɨ chakuñɨ chepe axtɨ tɨchauki nixhaka chaukityo nichaka. Auki kaɨma a'aka achakaityo.’

⁹Chɨmachampienkanatipityo ɨmoti ikumanakataxti ityobo axɨna isamutenti axɨna yakɨpukuxti ɨmoti.

¹⁰Saneityo axaño, axtɨ tapisamute nanaiña axɨna yakɨpukuxti Tupax aume, sanempɨ nabura: ‘Axɨsomɨ kumanakax somɨ champɨ nanenekiche somɨ, ityopiki axɨna aikɨpuka somɨ tyoneantai sopisamute.’ ”

¹¹Isiu kutubiux niyɨkɨxti au Jerusalén, ikonɨtiyɨ Jesús auki axɨmanio poka au Samaria ichepe Galilea.

¹²Iñataiti au taman pox, kuamatɨ kɨmenuti diez mañoñɨnka maunxokonoma ui lepra, axɨma sɨsioma iche'eña pɨnanakiti

¹³aɨbu nityosibixhimia: — ¡Jesús, Maestro, apukɨru suichaku!

¹⁴Naukiche asaratitɨ Jesús ɨmoma, nanti: — Amekosi apityusiankanaño isukarɨ axɨbama sacerdotes. Isiu axɨna niyɨkɨxɨma, sɨrɨbu kɨtɨpɨkimia axɨmanu niñaunxokokoxɨma.

¹⁵Tamanti axɨpekukimia, naukiche astaiti uxiankati tato, basɨkɨbɨkoti tato omixha nuraxti kɨtɨpɨti Tupax rabotɨ nuxia nityosibixhti,

¹⁶bachesoiyoti esati Jesús, iñatai nisuxti akɨ'ɨ sane machampienkanati ɨmoti. Axti naki ñoñɨnx po'osoti au Samaria.

¹⁷Nanti Jesús: — ¿Chɨtɨpɨ diez axɨbama sɨrɨbu kɨtɨpɨkimia axɨna niñaunxokokoxɨma? ¿Kauta nakaxɨma makiataka nueve?

¹⁸¿Kunauntañatiatai naki auki kiatax kɨx basɨkɨbɨkoti tato nauki achampienkati ɨmoti Tupax?

¹⁹Nanti ɨmoti maniki ñoñɨnx: — Atɨsai akosi tato. Tyopiki nakokonaunku uxiankɨ tato.

²⁰Axɨmanuma fariseos ñankitioma pɨnanakiti Jesús auche ñana aiñanai nɨriakaxti Tupax, aiñumuti nuraxɨma: — Axɨna niyeki nɨriakaxti Tupax chɨtɨpɨ ɨmo namanaiña ikuki axɨna kɨx asaraimia.

²¹Champɨti naki nanti ñana: ‘Auna nakax’, o ‘Ta'aityo nakax.’ Tyopiki nɨriakaxti Tupax tɨtane auna abaxɨpeku.

²²Auki nanti Jesús ɨmo axɨmanuma nesaxti apóstoles: — Iñatai ñana axɨmanu nanenes auche auxianka amasarai tamantai axɨmanu nanenes ñana iñemo axɨñɨ Aɨtoxti ñoñɨnx, ta chichebopɨ aume amasarañɨ.

²³Aboma axɨbama namatɨ ñana: ‘Auna nakaxti’, ‘ta'aityo nakaxti.’ Tapɨ amekatɨ isiuma.

²⁴Tyopiki sane takana axtɨ masɨnaka, anentax uixh, iku napes au nanaiña, sanenti ñana Aɨtoxti ñoñɨnx au axɨmanu nanenes niyekixhti tato.

²⁵Kusɨrɨbo ñana taruku nityakisɨrɨkɨxti chixhanxɨpɨma asuriurumati axɨbama auki axɨba naskɨbeka.

²⁶Takana axɨmanio naskɨbeka tɨkañe naukiche sɨborikotiki Noé, saneityo ñana axɨmanio naeneka niyekixhti tato naki Aɨtoxti ñoñɨnx.

²⁷Namanaiña basoma orisɨbaboma posoma, auki sɨrotitɨpo Noé au arca, auki kuatɨ axɨmanu tarukapae tax auki namanaiña koiñoma.

²⁸Saneityo tɨkañe au axɨmanio naskɨbeka naukiche sɨborikotiki Lot: namanaiña basoma chaboma, makomporarama mapaventekanama, mankɨturuma masamunuma poka.

²⁹Tapɨ naukiche tɨsɨrotitɨ Lot auki axɨmanio poka au Sodoma, xobeoka auki napes pes aɨbu azufre, auki namanaiña koiñoma.

³⁰Saneityo ñana au axɨmanu nanenes axtɨ kuatati tato Aɨtoxti ñoñɨnx.

³¹“Au axɨmanu nanenes ñana, naki tabɨkoti chaku nipoxti axtɨ abe nenaxixhti au nipoxti, tapɨ sɨrotitɨpo yubapa. Tapɨti naki anati au ñanaunx, tapɨ sɨrotitɨ tato au pox.

³²Apakionsaño ɨmo nikɨpostoti Lot.

³³Tapɨti naki kuasɨrɨ ɨmoti nisɨborikixhti, ensoro pɨnanakiti ñana. Tapɨti naki ensoro pɨnanakiti, sɨsioti aɨbu.

³⁴“Sukanañɨ aume axɨmanu tobixh ñana, axtɨ aboma toxɨma barɨkɨroma iku nikɨruxɨma, tamanti sɨrotitɨ tapɨti kiatax onkonoti.

³⁵Axtɨ abe tox paɨka patubaxio chepeio, taman sɨrotɨ kiatax onkono.”

³⁶Abomaintyo toxɨma mañoñɨnka au ñanaunx. Tamanti sɨrotitɨ tapɨti kiatax onkonoti.

³⁷Auki ñankitioma pɨnanakiti: — ¿Axɨkɨ Yɨriabux, kautapɨ ñana uxiane axɨna sane? Aiñumuti nuraxɨma: — Kauta naka nikuntux, akamanu opiyoberabaraño paxupakikia.