Read Chiquitano LUCAS 18 Bible Online

LUCAS 18 - Chiquitano bible

LUCAS 18

¹Urapoiti Jesús taman machepekatax isukarɨma nauki anunekati ɨmoma eama nantax, tapɨ ubata ɨmoma.

²Nanti ɨmoma: “Anati tɨkañe tamanti yɨriabux au axɨmanu tube champɨ nixhukuxti ñɨnanati Tupax champɨityo ñanaunkuxti ɨmo mañoñɨnka.

³Anentyo au axɨmanu tube taman biurax ane uixh chɨrɨri tyone yebotɨ esati yɨriabux nauki aisamunenti tyaku axɨna ñemanauntu uxia ñɨnanati maniki masamunuti chɨrɨri aɨbu.

⁴Tomenotɨ sɨrɨmana naneneka champɨ nɨmoche uiti maniki yɨriabux, auki kuatɨ au ñakionkoxti: ‘Axɨñɨ champɨ nixhuku ñɨnanati Tupax champɨityo nixhanaunku ɨmo makiataka,

⁵chɨsanempɨ, axɨna biurax chunapɨ, xhokɨmana tyaku, tapɨ asio ayetɨ auki kaɨma ichɨbori ɨmo.’ ”

⁶Nantityo Yɨriabux: “Sane nuraxti maniki yɨriabux chuxiampɨ nisɨborikixhti.

⁷Saneityo, ¿ensapɨ chokɨmanatipɨ Tupax tyaku axɨbama samamekanama uiti, axɨbama mankioma pɨnanakiti au sapes au tobixhtyo? ¿Ensapɨ koboi ane nɨmochema uiti?

⁸Sukanañɨ aume isiukai okɨmanati autaku. Axtɨ kuatati tato Aɨtoxti ñoñɨnx, ¿ensapɨ matamɨnanatiki axɨbama makokonaunxma iku axɨna kɨx?”

⁹Urapoitityo Jesús axɨna kiatax machepekatax ɨmo axɨbama, au ñakionkoxɨma uxia nisɨborikixhimia, chuxiampɨ uimia ɨmo makiataka:

¹⁰“Toxɨma mañoñɨnka yebomatɨ au nipo meankax eama: axti maniki taman fariseoti, tapɨti maniki kiatax naki bakaɨburuti monixh ɨmo Roma.

¹¹Axti maniki fariseo, auki natɨraikixhti, meaboti sane: ‘Axɨkɨ Tupax, ñachampienkaka aemo ityopiki axɨñɨ chɨtɨpɨ takana axɨbama makiataka, makusɨpɨka, chuxiampɨ nisɨborikixhimia chɨtamampɨ nikɨpostoxɨma, champɨityo axtɨ takanati maniki bakaɨburuti monixh.

¹²Axɨñɨ chixhakapɨ tox naneneka au semana toxioityo sobi aemo axɨna toxiobo.’

¹³Tapɨti maniki bakaɨburuti monixh sɨsioti iche'eña, chasaratitɨpɨ ape, ityusibiaɨrotiyɨ nanti: ‘¡Axɨkɨ Tupax, apukɨru chakuñɨ, axɨñɨ taruku nomɨnantɨ sobi!’

¹⁴Sukanañɨ aume axti naki bakaɨburuti monixh sɨrotitɨ tato au nipoxti tɨxhimiakana nomɨnantɨ uiti, tapɨti maniki fariseo chɨsanempɨ. Tyopiki axti naki au ñakionkoxti taruku napekixhti, tyonenti ñana champɨ nɨmocheti. Tapɨti naki iñoxonkonotiyɨ, sɨrotitɨ ñana ape.”

¹⁵Sɨromatityo aɨbu masiomanka esati Jesús, nauki aiñanti ne'esti kɨtɨpɨma. Naukiche astaimia axɨmanuma nesaxti apóstoles, makuansomokonoma ɨmo axɨmanuma sɨromatɨ aɨbuma.

¹⁶Auki tasuruma uiti Jesús nanti ɨmoma: — Tari chebo aboi ɨmo masiomanka ayematɨ yesañɨ, tapɨ abasikia kuatama, ityopiki axɨna nɨriakaxti Tupax ta ɨmo axɨbama takana nakaxɨma.

¹⁷Ñemanauntu sukanañɨ aume axti naki chiyasutiutipɨ nɨriakaxti Tupax takanati naki simiantiki, chiyebopɨ uiti kauta nakax.

¹⁸Tamanti axɨpekukimia axɨmanuma yɨriabuka ñankitioti pɨnanakiti Jesús: — Maestro axɨkɨ taruku nakumananaunku, ¿kausane nauki aye sobi isɨborikiboñɨ axɨna champɨ nityakɨrux?

¹⁹Aiñumuti Jesús nuraxti: — ¿Ityopikiche ukanɨ iñemo taruku nixhakumananaunku? Kunauntañati naki taruku ñakumananaunkuxti: axti Tupax.

²⁰Tɨtusiu aemo axɨba yakɨpukuxti Tupax: ‘Tapɨ ane kiatax paɨx obi, tapɨ atabaikia, tapɨ akusɨpɨka, tapɨ apanka kɨtɨpɨti kiatax, tari akuasɨrɨti aemo aɨma chepe napakɨma.’

²¹Nanti maniki ñoñɨnx ɨmoti: — Nanaiña axɨmanu sane isamute naukiche simiañɨnki.

²²Naukiche onkoiti axɨna sane, aiñumuti Jesús nuraxti: — Aninki taman axɨna chaisamutempɨ: aipiaventeka nanaiña axɨba nenaxi aityoximia nikuax ɨmo axɨbama taruku nityakisɨrɨkɨxɨma. Sane ane enaxibokɨ au napes. Auki kaɨma ariaku isiuñɨ.

²³Naukiche onkoiti axɨna sane axti maniki ñoñɨnx, taruku nisuchekixhti, ityopiki taruku nenaxixhti.

²⁴Naukiche asaratitɨ Jesús ɨmoti axɨna sane nakaxti, nanti: — ¡Chiyaupɨ nityakisɨrɨkɨxɨma aye uimia esati Tupax axɨbama chiyaupɨ nenaxixhimia!

²⁵Sɨnanaunx taman camello auki nisɨto kɨmes, pɨnanakiti naki chiyaupɨ nenaxixhti aye uiti au napes.

²⁶Axɨmanuma onkoimia ñankitioma: — ¿Ñakutipɨ naki añekanati ñana?

²⁷Aiñumuti Jesús: — Axɨna chisamutempɨma mañoñɨnka axti Tupax isamutenti.

²⁸Nanti Peru ɨmoti: — Axɨkɨ Yɨriabux, axɨsomɨ sopiñokota nanaiña somenaxi nauki sobetɨ asiukɨ.

²⁹Aiñumuti nuraxɨma: — Ñemanauntu sukanañɨ aume axtɨ anati naki auki naka nɨriakaxti Tupax iñokotati nipoxti, iñokotatityo nikɨpostoti, yarukityoxti, axti yaɨtoti, ichepe axɨbama aɨtoxti,

³⁰toxio ɨmoti uɨboiki au axɨna kaɨma nisɨborikixhti, tapɨ au axɨna kuabotɨki nisɨborikixhti yasutiuti isɨborikiboti axɨna champɨ nityakɨrux.

³¹Batasuruti Jesús peese ɨmoma axɨmanuma doce nesaxti apóstoles, nanti ɨmoma: “Kaɨma uɨkatɨ au Jerusalén, kauta omixhankio ñana axɨba korobo ui axɨbama profetas kɨtɨpɨti naki Aɨtoxti ñoñɨnx.

³²Ityoximianamati ñana meku axɨbama auki ichee, unumati, chuxiampɨ nuraxɨma ɨmoti, utureurumati.

³³Okɨsioma ɨmoti, ityabairomati. Yopɨrɨkɨ trex naneneka sɨborikoti tato.”

³⁴Axɨma chiyebopɨ uimia, chɨtusiupityo ɨmoma isane nɨmoche axɨna nuraxti, chɨtoxiopɨ ɨmoma nauki aye uimia.

³⁵Naukiche tɨsaimia aiñanainti Jesús au Jericó, tamanti naki supusu anankati tɨmonsoti abeu kutubiux, mankioti monixh,

³⁶naukiche onkoiti namensɨma esakiti, ñankitioti isane axɨna sane.

³⁷Namatɨ ɨmoti axti Jesús auki Nazaret ikonɨtiyɨ aukimanu,

³⁸tapɨti atosibiti: — ¡Jesús, Aɨtoxti David, apukɨru chakuñɨ!

³⁹Axɨmanuma kusɨrɨboma ikuansomokonomati nauki etayoiti, tapɨti champɨ nɨmoche uiti anati tosibikoti nuxia: — ¡Aɨtoxti David, apukɨru chakuñɨ!

⁴⁰Auki tochenkoti Jesús bakɨpuruti iyoti. Naukiche tɨtanati saimia ɨmoti, ñankitioti pɨnanakiti:

⁴¹— ¿Isane naxiantɨmo isamune atakukɨ? — Aiñumuti maniki supusu: — Axɨkɨ Yɨriabux, ixhanka uxia tato niyasata.

⁴²Nanti Jesús ɨmoti: — ¡Asakatɨ tato! Ui nakokonaunku uxiankɨ tato.

⁴³Isiukai axti maniki supusu asaratitɨ tato, auki sɨrotitɨ isiuti Jesús omixhia nuraxti kɨtɨpɨti Tupax. Namanaiñaintyo axɨmanuma astaimia, omixhaintyo nuraxɨma kɨtɨpɨti Tupax.