Read Chiquitano LUCAS 19 Bible Online

LUCAS 19 - Chiquitano bible

LUCAS 19

¹Iñataiti Jesús au Jericó auki ityompɨkatati axɨmanio poka.

²Po'osoti tɨkañe akamanu tamanti ñoñɨnx taruku nenaxixhti nɨrixhti Zaqueo, ɨriatu axɨbama bakaɨburuma monixh ɨmo Roma.

³Axti Zaqueo xhanxti asuputarati Jesús, ta chichebopɨ ɨmoti ityopiki akamanu sɨrɨmanamampae tyopiki tyayomatiatai Zaqueo.

⁴Sane naukiche sɨrotitɨ kusɨrɨboti yarukuxti, nauki aiñanainti asarati, sɨrotitɨ ape kɨtɨpɨ soes axɨna aukiche ñana aikonɨtiyɨ Jesús.

⁵Naukiche iñataiti Jesús akamanu, asaratitɨ ape nanti ɨmoti: — Zaqueo, ariaku akɨ, ityopiki kaɨma sɨsioñɨ au napo.

⁶Auki kuatati akɨ Zaqueo kɨxuniñanti nuxia, aɨbu nipukɨnunkuxti yasuriuruti Jesús.

⁷Ui axɨna sane astaimia, namanaiña ɨnantɨ ɨmoma axɨna isamutenti Jesús, namatɨ ta sɨrotitɨ sɨsioti au nipoxti naki chuxiampɨ nisɨborikixhti.

⁸Atɨraiti Zaqueo nanti ɨmoti Yɨriabux: — Asasatɨ, Yɨriabux, ixhanka ityoximia kɨmuintya aruki nanaiña niñenaxi ɨmo axɨbama taruku nityakisɨrɨkɨxɨma. Axtɨ ane isusɨpɨtio pɨnanakiti kiatax, yacheka tato ɨmoti cuatro yopɨrɨkɨ.

⁹Nanti Jesús ɨmoti: — Axɨna nanenes taesɨburuma eanaki nomɨnantɨ axɨbama po'oso, tyopiki axti naki ñoñɨnx tyonenti nityakɨbaɨtuxti Abraham.

¹⁰Axti Aɨtoxti ñoñɨnx kuatati apacheti iyo axɨna ensoro nauki aikiaɨbutityo eanaki nomɨnantɨ.

¹¹Namanaiña amonkoma onsapetioma axɨba nuraxti Jesús, urapoitityo sukarɨma axɨna machepekatax, ityopiki tɨsaimia nakaxti ɨmo Jerusalén tapɨ axɨma au ñakionkoxɨma axɨna nɨriakaxti Tupax iñatai isiukai.

¹²Nanti ɨmoma: “Anati tɨkañe taman ñoñɨnx axɨpekukimia axɨbama taruku nenaxixhimia, sɨrotitɨ iche'e au kiatax kɨx, nauki atoxi ɨmoti yarusɨrɨx nɨriakaxti auki asɨkɨbɨti tato.

¹³Naukiche tɨsaimia niyɨkɨxti, batasuruti ɨmo axɨbama diez nikumanakataxti, aityoximiati taikiana ɨmoti taman chama monixh auki nanti ɨmoma: ‘Apapache apachɨkoboibo aɨbu nimoni chepe axtɨ isekatɨ tato.’

¹⁴Tapɨ axɨmanuma po'oso auki nikɨxti champɨti uxia uiti ɨmoti, bakɨpuruma isiuti axɨbama uiche namatɨ sane: ‘Chɨsuixhankapɨ nauki yɨriabuxti naki ñoñɨnx suiñemo.’

¹⁵“Axti toxio ɨriakaboti, auki basɨkɨbɨkoti tato au nikɨxti. Naukiche iñataiti tato, bakɨpuruti iyo axɨmanuma ikumanakataxti axɨbama mekuche aiñokoti nimonixhti, nauki atusi ɨmoti mantukubu isumainkianɨ uiti taman.

¹⁶Axti maniki kusɨrɨbo aiñanainti nanti: ‘Yɨriabux, namoni isumainkianɨ diez yopɨrɨkɨ'ɨ.’

¹⁷Aiñumuti maniki yɨriabux: ‘Uxiampae nachɨkoi. Axɨkɨ naki kumanakax uxia axɨna nachɨkoi. Axɨkɨ uxia nakionko aɨbu axɨna simiantai, yɨriabuxɨkɨ sobi ñome diez tube.’

¹⁸Aiñanainti kiatax nanti: ‘Yɨriabux, namoni isumainkianɨ cinco yopɨrɨkɨ'ɨ.’

¹⁹Saneityo nanti ɨmoti: ‘Axɨkɨ yɨriabuxɨkɨ ñana ñome cinco tube.’

²⁰“Tapɨti kiatax aiñanainti nanti: ‘Yɨriabux, auna naka namoni. Aɨburu sobi iku taman xɨrɨpɨtɨx.

²¹Ixhuka aɨnanakɨ, ityopiki axɨkɨ champɨ napukɨru, atapeonoka aukiche kauta champɨ toxio obi akiamutuka auki axɨna chankɨtukapɨ.’

²²Auki nanti maniki yɨriabux ɨmoti: ‘Axɨkɨ kumanakax champɨ nanenekichekɨ, oboi axɨba nanityaka sobi yasarai aemo. Axɨkɨ tusiu aemo ta axɨñɨ champɨ nipukɨru, xhatapeonoka aukina kauta champɨ toxio sobi xhakiamutuka aukina kauta chixhankɨtukapɨ,

²³¿kausane chaiñatapɨ nimoni esa axɨbama ipiakama ane yachɨkoimia aɨbu, nauki aityoximia tato iñemo aɨbu nisubaipox axtɨ iñatai tato au nipo?’

²⁴Nantityo ɨmo axɨmanuma amonkoma akamanu: ‘Apikiaɨbu pɨnanakiti axɨmanu monixh apityoximia ɨmoti maniki isumainkianɨ uiti diez yopɨpɨrɨkɨ'ɨ.’

²⁵Axɨma namatɨ ɨmoti: ‘Yɨriabux, ¡tɨtabe uiti diez nisubaipox!’

²⁶Aiñumuti yɨriabux: ‘Sukanañɨ aume axti naki ane nenaxixhti, toxioki uɨbo ɨmoti. Tapɨti naki champɨ nenaxixhti, axtɨ ane simiantai nenaxixhti nanaiña kaɨburu pɨnanakiti.

²⁷Tapɨ ɨmo axɨbama tɨborikomantai suatañɨ axɨbama chixhanxɨpɨma nauki yɨriabuxɨñɨ ɨmoma, apikiasama tauna apityabaisoma sukarɨñɨ.’ ”

²⁸Naukiche tɨnanti axɨna sane, sɨrotitityo Jesús niyɨkɨxti au Jerusalén.

²⁹Naukiche tiñataiti saimia Betfagé ichepe Betania, esa axɨmanu yirityux nɨrixh Olivos, bakɨpuruti ɨmo axɨmanuma toxɨma nesaxti apóstoles,

³⁰nanti ɨmoma: — Amekosi au axɨmanio poka ta'a ukutakɨkibo, axtɨ apiñatai akamanu tabɨko aboi taman burux tomoeno, champɨti tisɨroti chaku. Apityakisɨna apikia tauna.

³¹Axtɨ anati ñankitio amopɨnanaki kausane apityakisɨna, amukanaño ɨmoti axti Yɨriabux ane nɨmoche uiti.

³²Axɨmanuma nesaxti apóstoles yebomatɨ tabɨko uimia takana axɨmanu nuraxti Jesús.

³³Naukiche isokisɨnatama axɨmanu burux, axɨmanuma yabuche ñankitioma pɨnanakimia: — ¿Kausane apisokisɨna?

³⁴Axɨma aiñumuma: — Axti Yɨriabux ane nɨmoche uiti.

³⁵Aiñama nikɨbuxixhimia chaku axɨmanu burux, sɨrotɨ uimia ɨmoti Jesús auki sɨroti uimia chaku.

³⁶Isiu niyɨkɨxti Jesús, namanaiña ipiakumainkiatama nikɨbuxixhimia isiu kutubiux.

³⁷Naukiche tɨtaboma saimia kɨmama axɨmanu yirityux Olivos, namanaiña axɨbama aboma isuti tosibikoma ui nipukɨnunkuxɨma yarusɨrɨxtyo nɨrixhti Tupax uimia ityopiki nanaiña axɨba champɨ tastaimia.

³⁸Namatɨ: — ¡Yarusɨrɨxti naki yɨriabux naki kuatati au nɨrixhti Tupax! ¡Taikiana uxia au napes yarusɨrɨx nɨriakaxti Tupax!

³⁹Auki axɨmanuma fariseos axɨbama amonkoma ichepema namatɨ ɨmoti: — Maestro, aikuansomokosoma axɨbama kuamatɨ asiukɨ.

⁴⁰Tapɨti Jesús aiñumuti nuraxɨma: — Sukanañɨ aume axtɨ axɨbama mañoñɨnaka etayoimia, axɨba kanka botosibiko ityoboma.

⁴¹Naukiche tɨtanati saimia Jerusalén, naukiche asaratitɨ ñome poka, areoroti Jesús tyaku,

⁴²nanti sane: “¡Axtɨ au axɨna nanenes tusiupɨ aemo axɨna uiche uxia nasɨboriki! Tapɨ kaɨma ane anekana apɨnanakikɨ chaemopɨ asarikiarɨ.

⁴³Kuantionki aemo ñana naneneka auche asutiu natakisɨrɨkɨ, auche axɨbama chuxiampɨ uimia aemo pesuarama atupekukɨ, auki okɨsioma aemo auki nanaiñantai,

⁴⁴auki nanaiña kuamatɨ aiñaximiakanamakɨ. Koiñoma uimia namanaiña axɨbama po'oso, champɨ ñana onkono taman kanx onɨ kiatax, ityopiki chaxiankapɨ asuputarati Tupax naukiche kuatati asaratiyɨ.”

⁴⁵Pɨrɨkɨ nanaiña axɨna sane, sɨrotitɨpo Jesús au nipo meankax auki penekoma tyɨrɨpo uiti axɨmanuma mapaventekanama,

⁴⁶nantityo ɨmoma: — Iku Nikorox nantɨ sane: ‘Axɨna nipo tyone nipo meankax’, tapɨ axaño apisamute takana nipo makusɨpɨka.

⁴⁷Naneneka manunekanati Jesús au nipo meankax, tapɨ axɨmanuma ɨriatu axɨbama sacerdotes, axɨmanuma manunekanama bakɨpukux uiti Moisés axɨmanumaintyo mayɨriabuka auki axɨmanu tube bapacheroma nikiubuma kausane aityabairomati.

⁴⁸Chɨtabɨkopɨ uimia kausane aisamunema, ityopiki namanaiña amonkoma asaramatɨ ñome axɨba nuraxti.