Read Chiquitano LUCAS 24 Bible Online

LUCAS 24 - Chiquitano bible

LUCAS 24

¹Au axɨmanu kusɨrɨbo nanenes ɨmo semana omenotɨ tatityo au nikɨxti tansɨrapae, omenotɨ oboi axɨmanio omixhantai noborixh niñusamukux.

²Naukiche topiñatai, tabɨko oboi axɨmanu kanx uiche atabuxi axɨmanu nikɨxti chanankapɨ kauta ananka.

³Auki omenotɨpo, chɨtabɨkopɨ oboi nikɨtɨpɨxti Yɨriabux Jesús.

⁴Chɨtusiupɨ ñome kausane ñupakionkox ui axɨna sane, isiukai umasaratɨ ɨmo tox mañoñɨnka atɨraimia yobesa, kuara nuxia naibixhimia.

⁵Taruku yupixhukux, patakonokono akɨ. Tapɨ axɨmanuma mañoñɨnka namatɨ ñome: — ¿Kausane apapache iyoti axɨpekuma axɨbama tɨkoiñoma axti naki sɨborikoti?

⁶Champɨti auna, chauki tɨsɨborikoti tato. Apakionsaño ɨmo nuraxti aume naukiche anankatiki au Galilea:

⁷axti Aɨtoxti ñoñɨnx toxioti ñana meku axɨbama chuxiampɨ nisɨborikixhimia, ityakubaxiromati kɨtɨpɨ kurusɨx yopɨrɨkɨ trex naneneka sɨborikoti tato.

⁸Auki upakionaño ɨmo axɨmanio nuraxti Jesús,

⁹naukiche pasɨkɨbɨko tato auki nikɨxti uburapoi nanaiña isukarɨ axɨmanuma once amonkoma isiuti isukarɨtyo makiataka.

¹⁰Axɨmanio oboiche aburaboi sukarɨ axɨmanuma amonkoma isiuti tyoneio Mariax Magdalena, Kuanax, Mariax nipiakɨtoti Santiago, ichepe axɨmanio pikiataka paɨka.

¹¹Tapɨ ɨmo axɨmanuma amonkoma isiuti namatɨ ta mameso niñutanux oboi axɨba nuburax sane, chixhanxɨpɨma aikokoma.

¹²Tapɨti Peru, sɨrotitɨ yarukuxti kauta naka nikɨxti. Naukiche asaratitɨpo, astaiti axɨmanio nikɨbuxixhtiai. Auki basɨkɨbɨkoti tato au pox, kɨtobɨsoti ui axɨna sane.

¹³Au axɨmanuinki nanenes, toxɨma axɨpekukimia axɨmanuma nesaxti apóstoles sɨromatɨ au axɨmanu tube nɨrixh Emaús, taki once kilómetros nichekixh pɨnanaki Jerusalén.

¹⁴Isiu niyɨkɨxɨma baparioma kɨtɨpɨ nanaiña axɨmanio omixhankio sane.

¹⁵Auki axɨna yaparikixhimia, sɨrotitɨ Jesús esama nauki chepe namensɨma.

¹⁶Axɨma tai asaramati, ane axɨna uiche chisuputaramatipɨ ñakuti.

¹⁷Ñankitioti Jesús pɨnanakimia: — ¿Isane ɨmoche axɨna naupari isiu axɨna kutubiux? Tochenkoma aɨbu nisuchekixhimia,

¹⁸tamanti axɨpekukimia, nɨrixhti Cleofás, aiñumuti nuraxti: — ¿Kunauntañankɨatai anankɨ au Jerusalén chɨtusiupɨ aemo axɨba omixhankio axɨba naneneka tomenotɨ?

¹⁹Ñankitioti pɨnanakimia: — ¿Isane axɨba omixhankio? Namatɨ ɨmoti: — Axɨmanu isamutema ɨmoti Jesús auki Nazaret, axti profeta taruku nɨriakaxti oboi axɨba isamutenti oboityo nuraxti sukarɨti Tupax isukarɨtyo namanaiña.

²⁰Kausane ɨriatu axɨbama sacerdotes ichepe axɨbama mayɨriabuka oemo ityoximianamati ɨmo nikonkoxti auki aityakubaxiromati kɨtɨpɨ kurusɨx.

²¹Tapɨ au axɨna supakionko tyonenti ñana naki uiche ataesɨbuma namanaiña axɨbama auki axɨna kɨx Israel. Chauki tomenotɨ trex naneneka nanaiña axɨmanu sane.

²²Abe axɨba paɨka amonkio suichepe opipixhumunusomɨ, tyopiki obebotɨ naukiche tɨkuatɨ nanenes kauta naka nikɨxti,

²³ityopiki chɨtabɨkopɨ oboi nikɨtɨpɨxti, pasɨkɨbɨko tato au pox. Monantɨ ityusiankanamakɨ yusukarɨ axɨbama ángeles namatɨ ñome axti Jesús sɨborikoti.

²⁴Subaxɨpekuki axɨbama amonkoma suichepe yebomatɨ au axɨmanu nikɨxti tabɨko uimia sane takana axɨna monantɨ axɨmanio paɨka, tapɨti Jesús chasaramatipɨ.

²⁵Auki nanti Jesús ɨmoma: — ¡Tarukapae champɨ iyebo aboi masamuñampae apikoko nanaiña axɨna urapoimia tɨkañe axɨbama profetas!

²⁶¿Chɨtusiupɨ aume samamekanati Mesías atakisɨrɨti oboi nanaiña axɨba omixhankio ɨmoti kɨmenu atoxi ɨmoti nɨriakaxti?

²⁷Auki manunekanati ɨmoma nanaiña axɨba abe iku Nikorox axɨba panityana kɨtɨpɨti, kɨsɨrɨbo uiti ñakonomosoxti Moisés takanaintyo namanaiña axɨbama profetas.

²⁸Naukiche tiñataimia au axɨmanu tube kauta niyɨkɨxɨma, axti Jesús isamutenti takana axtɨ sɨrotitɨ ta'aiki.

²⁹Tapɨ axɨma ityochenakanamati, namatɨ sane: — Asikia auna suichepe, tyopiki chauki tɨtɨmɨmɨka. Tixhanx ɨtobi. Sɨrotitɨpo Jesús nauki sɨsioti chepema.

³⁰Naukiche tɨtɨmonsoma nauki a'ama, asuriuti mekuti axɨmanu pan, achampienkati ɨmoti Tupax, aichepesɨnati auki aityoximiati ɨmoma.

³¹Isiukai kaɨma asaramatɨ tato nuxia auki isuputaramati Jesús. Tapɨti ensoroti pɨnanakimia.

³²Auki namatɨ ɨmomantoe: — ¿Taityaku oñonkisio au nuyausasɨ nupukɨnunku naukiche baparioti oemo isiu kutubiux uityo axɨna urapoiti usukarɨ axɨba monantɨ iku Nikorox?

³³Auki isiukai, basɨkɨbɨkoma tato au Jerusalén, kauta tabɨkoma uimia oberabarama axɨmanuma once amonkoma isiuti ichepe makiataka nikutakikixhimia,

³⁴auki namatɨ ɨmoma: — Ñemanauntu sɨborikoti tato Jesús, ityusiankanatiyɨ sukarɨti Simón.

³⁵Auki axɨmanuma toxɨma urapoimia sukarɨma axɨna astaimia isiu kutubiux, kausaneityo asuputaramati Jesús naukiche ichepesɨnatati axɨmanu pan.

³⁶Naukiche amonkomainki baparioma ɨmo axɨna sane, auki ityusiankanatiyɨ Jesús akamanu kɨmuintya kauta amonkoma mankioti ɨmoma sane: — Taikiana uxia uiti Tupax aume.

³⁷Axɨma taruku nixhukuxɨma, au ñakionkoxɨma asaramati taman yausɨpɨx.

³⁸Tapɨti Jesús nanti ɨmoma: — ¿Kausane aupixhukatai? ¿Kausane apekiatai napakokonaunku au nautusi?

³⁹Amasasio niñee yochepe nipope. Unka axɨñɨ. Amasasai apiñensoñɨ: axti yausɨpɨx champɨ nañetuxti champɨityo nipiaixhti, takana axɨna amastai sɨtɨpɨñɨ.

⁴⁰Naukiche nanti ɨmoma axɨna sane, ityusiankatati sukarɨma ne'esti yochepe nipopesti.

⁴¹Axɨma chikokoromatipɨ nuxia, ityopiki nipukɨnunkuxɨma uinaintyo onkisioma nikɨtobɨxɨma, mankioti Jesús pɨnanakimia: — ¿Ane auna aboi umatamoebo?

⁴²Toxio uimia ɨmoti taman nopiokox obikio,

⁴³yasutiuti iñatenti sukarɨma.

⁴⁴Auki nanti ɨmoma: — Axɨba omixhankio sane iñemo tyoneio axɨmanio tɨsurapoi tɨkañe ausukarɨ naukiche anankañɨnki auchepe: chiyaupɨ nɨmoche omixhane axɨba abe iku Nikorox sɨtɨpɨñɨ uiti Moisés, ikuityo axɨmanio Nikorox ui axɨbama profetas ikuityo axɨmanio Salmos.

⁴⁵Auki aurɨbo uiti nipiakaxɨma nauki aye uimia axɨmanio Nikorox,

⁴⁶aukityo nanti ɨmoma: — Sane ane iku nikorox axti Mesías ane nɨmoche akonti, yopɨrɨkɨ trex naneneka sɨborikoti tato,

⁴⁷au nɨrixhti urapoimia ñana sukarɨ namanaiña iku axɨna kɨx nauki ayematɨ tato esati Tupax, nauki aixhimiakati tato axɨna nomɨnantɨ uimia. Kusɨrɨboma axɨbama auki Jerusalén,

⁴⁸axaño aburasoi sukarɨ makiataka nanaiña axɨna sane.

⁴⁹Axɨñɨ xhakɨpukaiki aume axɨna toxiobo uiti Iyaɨ aume, axaño abasikiatai, auna Jerusalén, chepe axtɨ apasutiu nɨriakax auki napes.

⁵⁰Auki sɨrotitɨ Jesús aɨbuma auki axɨmanio poka, iñataimia au Betania, akamanu aikiamperoti ne'esti kurusɨuma uiti.

⁵¹Isiu axɨmanu ñakunusɨankakaxti ɨmoma, sɨrotitɨ pɨnanakimia auki sɨrotitɨ au napes.

⁵²Axɨma, iyau ñanaunkuxɨma ɨmoti, basɨkɨbɨkoma tato au Jerusalén taruku nipukɨnunkuxɨma.

⁵³Taikiana aɨromatɨ au nipo meankax, nauki anauma ɨmoti Tupax.